ނިއުރޭޑިއަންޓްގެ ޗެއާމަންއަކަށް މޮސްޓާ

ނިއުރޭޑިއަންޓް ސްޕޯޓްސް ކްލަބްގެ ޗެއާމަންކަމަށް ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ (މޮސްޓާ) ހަމަ ޖައްސައިފިއެވެ.

މިކަން އިޢުލާން ކުރައްވާ މޮސްޓާ މިއަދު ކުރެއްވި ޓުވީޓެއްގައި ބުނެފައިވަނީ الحمد لله، ހަޔާތުގެ އެންމެ ބޭނުންވި ދެވަނަ ކަންތައްވެސް ހާސިލްވެއްޖެ ކަމަށެވެ.

ކޮމިޝަނަރ އޮފް ސްޕޯރޓްސް އިން މިއަދު އެކުލަބަށް ދީފައިވާ "ކުޅިވަރު ޖަމިއްޔާގެ ހިންގާ ކޮމެޓީގެ ރަޖިސްޓްރީ" ވަނީ މޮސްޓާގެ ޓުވީޓުގައި ހިމަނާފައެވެ. އެކުލަބުގެ ވައިސް ޗެއަރމަން އަކަށް ސައްޔިދު އަލީ ގެ އިތުރުން 7 ބޯޑު މެންބަރުންވެސް ވަނީ ހިމަނާފައެވެ.

Alhamdulillah...
Hayaathuga emme baynun vi dhevana kan thah ves haasiluvejje. pic.twitter.com/PSuVenG9pE

— Mohamed Nasheed Abdulla (@MNA_MosTaaA) March 3, 2020

މޮސްޓާ އަކީ ފެށުނީންސުރެެއް ނިއުރޭޑިއަންޓްގެ ހާރޑުކޯ ސަޕޯޓަރެކެވެ. ނިއުރޭޑިއަންޓް ވެއްޓިފައިވާ ދަނޑިވަޅުން އަރައިގަތުމަށް ވަރަށް ބުރަކޮން މަސައްކަތް ކުރަމުން އައި ފަރާތެއްގެ ގޮތުގައި މޮސްޓާ ވަނީ ފާހަގަ ކުރެވިފައެވެ.

Minister @AhmedMahloof met with senior supporters of @nrsc_mv this morning and assured them on the ministries support for their efforts in salvaging the club. pic.twitter.com/rVOJCAnPZS

— Ministry of Youth,Sports and Community Empowerment (@MoYSCEmv) February 13, 2020

ކުޅުންތެރިންނަށް މުސާރަ ނުދީގެން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ސަސްޕެންޑްކޮށްފައިވާ ނިއުރޭޑިއަންޓުގެ ސަސްޕެންޝަން މިދިޔަ އަހަރު އެފްއޭއެމްގެ އަހަރީ ޢާންމު ޖަލްސާގައި ކްލަބުތަކުން ވަނީ ދަމަހައްޓާފައެވެ.

އެކަމަކު މިއަހަރުގެ މާޗު މަހު އޮންނަ އަހަރީ ޢާންމު ޖަލްސާގައި އެ ސަސްޕެންޝަން އުވާލުމުގެ ފުރުޞަތު އެބައޮތެވެ. އެއާއެކު ނިއުރޭޑިއަންޓުގެ ސަޕޯޓަރުން އަންނަނީ ނިއުރޭޑިއަންޓަށް ދިމާވެފައިވާ ޙާލަތުން އަރައިގަތުމަށް ހާއްސަ މަސައްކަތްތަކެއް ކުރަމުންނެވެ.

ނިއުރޭޑިއަންޓުގެ ޗެއަރމަން މުހައްމަދު ޒިޔާދު އިސްތިއުފާ ދެއްވުމާ އެކު، ސައްޔިދު އަލީ އެކްޓިން ޗެއަރމަނަކަށް ހަމަޖައްސާ ބޯޑް މެންބަރުންނާއި، ސަޕޯޓަރުން ހިމެނޭ ގޮތަށް މީގެ ކުރިން ވަނީ ކޮމެޓީއެއް އުފައްދާފައެވެ. އަދި އެ ކޮމިޓީންވެސް މީގެ ކުރިން ވަނީ ނިއުރޭޑިއަންޓުގެ ދަރަނިތައް ދެއްކުމަށް މަސައްކަތްތަކެއް ކޮށްފައެވެ.

ފުޓްބޯޅައިގެ ހުރިހާ ކަމަކުން މިދިޔަ އަހަރު ނިއުރޭޑިއަންޓް ސަސްޕެންޑު ކުރިއިރު، ނިއުރޭޑިއަންޓުން ދިވެހި ކުޅުންތެރިންނަށް މުސާރައިގެ ގޮތުގައި 2.4 މިލިއަން ރުފިޔާ ދޭން އޭރު ޖެހުނެވެ. އެކަމަކު އެފްއޭއެމްގައި ހުރި ނިއުރޭޑިއަންޓުގެ ފައިސާއިން ދިވެހި ކުޅުންތެރިންނަށް ވަނީ މިހާރު މުސާރަ ދީފައެވެ. ނަމަވެސް އަފްޣާނިސްތާނުގެ ޑިފެންޑަރު ހާރޫން އަމީރީ އަށް މުސާރައިގެ ގޮތުގައި އަދި އުސޫލުން ބޭރުން އެއްބަސްވުން ބާތިލުކޮށްފައިވާތީ 703،707 (ހަތްލައްކަ ތިންހާސް ހަތްސަތޭކަ ހަތް ރުފިޔާ) ދޭން ފީފާއިން ވަނީ ނިއުރޭޑިއަންޓަށް އަންގާފައެވެ. އަދި ކުރީގެ ކޯޗު ބެނާޑޯ ޓަވަރޭޒް އަށް 511،342 (ފަސްލައްކަ އެގާރަހާސް ތިންސަތޭކަ ސާޅީސްދެ ރުފިޔާ) ދޭންވެސް ވަނީ އަންގާފައެވެ.

ނިއުރޭޑިއަންޓް ސްޕޯޓްސް ކްލަބް އަކީ ރާއްޖޭގެ މަޝްހޫރު ކްލަބެކެވެ. ނިއުރޭޑިއަންޓް އުފައްދާފައިވަނީ 19 އޮގަސްޓް 1979 ގައެވެ. ނިއުރޭޑިއަންޓް ގެ ފައުންޑަރ މެންބަރުންނަކީ އަހުމަދު ވަޙީދު(ހ.ކްއީން) އަދި އަހުމަދު މަނިކް (ލައްޓި އައްމަޑޭ) އެވެ.