ސްވިޒަލޭންޑުގެ ލޭކް ލޫސާން ސަމިޓުގައި އެމެރިކާ އާއި އީރާނާ ދެމެދު ކުރިއަށްދިޔަ މަތީ ފަންތީގެ މަޝްވަރާތަކުގެ ފުރަތަމަ ބުރު ނިމި، ދެ ގައުމުގެ ދެމެދުގައި އޮތް ނުތަނަވަސްކަން ހައްލުކުރުމަށް ބޮޑެތި ކުރިއެރުންތަކެއް ލިބިފައިވާކަން ގަތަރާއި ޕާކިސްތާނުން ހޯމަ ދުވަހުގެ ފަތިހު އިއުލާންކޮށްފިއެވެ.

މި މަޝްވަރާތަކުގައި ދެ ގައުމުން ވަނީ ކުރިއަށް އޮތް 60 ދުވަހުގެ ތެރޭގައި ދާއިމީ އެއްބަސްވުމަކަށް އައުމަށްޓަކައި ރޯޑްމެޕަކަށް އެއްބަސްވެފައެވެ. މީގެ އިތުރުން، ލުބުނާނުގައި ހިންގާ އަސްކަރީ ހަރަކާތްތައް ހުއްޓާލުމަށް ބާރުއެޅުމުގެ ގޮތުން "ޑީ-ކޮންފްލިކްޝަން ސެލް" އެއް އުފެއްދުމަށް ވެސް ވަނީ ނިންމާފައެވެ. އަދި ހޯރްމޫޒް ކަނޑުއޮޅިން ދަތުރުކުރާ އުޅަނދުފަހަރުގެ ރައްކާތެރިކަން ކަށަވަރުކުރުމަށްޓަކައި ދެ ގައުމުގެ ދެމެދުގައި މުއާސަލާތީ ގުޅުމެއް ގާއިމުކުރުމަށް ވެސް ވަނީ އެއްބަސްވެފައެވެ.

Ad
rt

"ލޭކް ލޫސާން ސަމިޓް ކުރިއަށްދިޔައީ އުންމީދީ އަދި ބިނާކުރުވަނިވި މާހައުލެއްގައެވެ. ފަންނީ މަޝްވަރާތައް ކުރިއަށް ގެންދާނެ ނިޒާމެއް އެކުލަވާލުމާއެކު، ހިތްވަރު ލިބޭ ފަދަ ކުރިއެރުންތަކެއް ވަނީ ހޯދިފައެވެ." މި މަޝްވަރާތަކާ ގުޅޭގޮތުން ނެރުނު ގުޅިފައިވާ ބަޔާނުގައި ބުނެފަވެއެވެ.

މި އެއްބަސްވުމުގެ ދަށުން އީރާނުން ވަނީ އަރަބި ގަލްފުން ފެށިގެން އޮމާން ކަނޑާ ހަމައަށް ވިޔަފާރި އުޅަނދުތަކަށް އެއްވެސް ފީއަކާ ނުލައި ރައްކާތެރިކަމާއެކު ދަތުރުކުރެވޭނެ މަގު ފަހިކޮށްދިނުމަށް އެންމެ ފުރިހަމައަށް މަސައްކަތް ކުރާނެ ކަމުގެ ޔަގީންކަން ދީފައެވެ.

އެމެރިކާގެ ވައިސް ޕްރެޒިޑެންޓް ޖޭޑީ ވެންސް އަދި އީރާނުގެ މަޖިލީހުގެ ރައީސް މުހައްމަދު ބާގިރު ގާލިބާފް އިސްކޮށް ތިއްބަވައިގެން ބޭއްވި 100 މިނެޓުގެ މި ބައްދަލުވުމުގައި، ޖޫން 17 ގައި ސޮއިކުރި އިސްލާމްއާބާދު އެމްއޯޔޫ ތަންފީޒުކުރާނެ ގޮތްތަކާ މެދު ވަނީ މަޝްވަރާކޮށްފައެވެ. މި މަސައްކަތްތައް ބެލެހެއްޓުމަށްޓަކައި މަތީ ފަންތީގެ ކޮމިޓީއެއް އުފެއްދުމަށް ވެސް ވަނީ ނިންމާފައެވެ.

މި ކޮމިޓީން އީރާނުގެ ނިއުކްލިއާ ޕްރޮގްރާމާއި، ދަތިކުރުމުގެ ފިޔަވަޅުތަކާ ގުޅޭ ކަންކަމާއި، އަދި މައްސަލަތައް ހައްލުކުރުމަށް އެކުލަވާލާފައިވާ ނިޒާމުތައް ހިނގާ ނުހިނގާ ގޮތް ބަލަމުންދާނެއެވެ. މި ހަފުތާގެ ބާކީ އޮތް ދުވަސްތަކުގައި ވެސް ބާގެންސްޓޮކް ރިސޯޓުގައި ފަންނީ ފެންވަރުގެ މަޝްވަރާތައް ކުރިއަށްދާނެ ކަމަށް ބަޔާނުގައިވެއެވެ.

މެދުވެރިއެއްގެ ދައުރު އަދާކުރާ ޕާކިސްތާނާއި ގަތަރުން ވަނީ އެމެރިކާ އާއި އީރާނުން ސުލްހަވެރި ހައްލަކަށް ދައްކަމުންދާ ސާބިތުކަމަށް ޝުކުރު އަދާކޮށްފައެވެ. އަދި މި މަޝްވަރާތަކަށް އެހީތެރިކަން ފޯރުކޮށްދޭ އެކުވެރި ގައުމުތަކުގެ ދައުރު ވެސް އެ ދެ ގައުމުން ވަނީ ފާހަގަކޮށްފައެވެ.