ބަރަކާތްތެރި ރަމަޟާން މަހުގެ ހުކުރު ނަމާދުތަކަށް، ހިފާފައިވާ އިރުމަތީ ގުދުސްގައި ހުންނަ އަލްއަޤްޞާ މިސްކިތަށް ވަދެވޭނެ ފަލަސްޠީނުގެ ހުޅަނގު އައްސޭރީގެ ރައްޔިތުންގެ އަދަދު އިސްރާއީލުން ވަރަށް ބޮޑަށް މަދުކޮށް، ހަރުކަށި އުސޫލުތަކެއް ކަނޑައަޅައިފިއެވެ.

އިސްރާއީލުގެ "ކޯޑިނޭޓަރ އޮފް ގަވަރމަންޓް އެކްޓިވިޓީޒް އިން ދަ ޓެރިޓަރީޒް" (ސީއޯޖީއޭޓީ) އާއި، އަނަޑޯލޫ އެޖެންސީ، އަޝަރުޤު އަލްއައުސަތު އަދި މިޑްލް އީސްޓް މޮނިޓަރ ފަދަ ޚަބަރު ފަތުރާ ވަސީލަތްތަކުން މަޢުލޫމާތު ދޭ ގޮތުގައި، މި އަހަރުގެ ރަމަޟާން މަހު އަލްއަޤްޞާ މިސްކިތަށް ހުކުރު ނަމާދަށް ދެވޭނެ ހުޅަނގު އައްސޭރީގެ ރައްޔިތުންގެ އަދަދު ކޮންމެ ހުކުރު ދުވަހަކު ވަނީ 10,000 މީހުންނަށް ލިމިޓްކޮށްފައެވެ. މިގޮތަށް ދާން ބޭނުންވާ ކޮންމެ މީހަކުވެސް ކޮންމެ ހުކުރު ދުވަހަކަށް ވަކިން ޚާއްޞަ ހުއްދައެއް ކުރިން ހޯދުން ވަނީ މަޖުބޫރުކޮށްފައެވެ.

Ad
rt

އިސްރާއީލުން އަލަށް ކަނޑައެޅި ހުރަސްތަކުގެ ތެރޭގައި ހިމެނެނީ:

ފިރިހެނުންގެ ތެރެއިން ވަދެވޭނީ އުމުރުން 55 އަހަރުން މަތީގެ މީހުންނަށް އެކަންޏެވެ.
އަންހެނުންގެ ތެރެއިން ވަދެވޭނީ އުމުރުން 50 އަހަރުން މަތީގެ މީހުންނަށް އެކަންޏެވެ.
ކުޑަކުދިންގެ ތެރެއިން ވަދެވޭނީ އުމުރުން 12 އަހަރުން ދަށުގެ ކުދިންނަށް، އެކުދިންގެ ގާތް ތިމާގެ މީހަކާ އެކުގައެވެ.

މި ސިޔާސަތަކީ މީގެ ކުރީ އަހަރުތަކުގައި ވެސް ކޮންމެވެސް ވަރަކަށް ޢަމަލުކޮށްފައިވާ އުސޫލުތަކެއް ނަމަވެސް، މިއަހަރުގެ ރަމަޟާން މަހަށް މިކަން މިހާރު ވަނީ ވަރަށް ބޮޑަށް ކަށަވަރުކޮށްފައެވެ.

މި ހުރަސްތަކަކީ ޚާއްޞަކޮށް ހުޅަނގު އައްސޭރީގައި ދިރިއުޅޭ ފަލަސްޠީނު ރައްޔިތުންނަށް އަމާޒުކޮށްފައިވާ ކަންކަމެވެ. ރިޕޯޓްތައް ބުނާގޮތުން، އިސްރާއީލުން ވަނީ ސަލާމަތީ ފިޔަވަޅުތައް ވަރުގަދަކޮށް، ގިނަ އަދަދެއްގެ ފުލުހުން ނެރެ، ވަކިވަކި ފަރުދުންނަށް މިސްކިތަށް ނުވަދެވޭ ގޮތަށް ހުރަސްއަޅަން ފަށާފައެވެ.

އިސްރާއީލުގެ މި ނިންމުމަށް ފަލަސްޠީނުގެ އޮފިޝަލުންނާއި ސިޔާސީ މުޙައްލިލުން ދަނީ ވަރަށް ބޮޑަށް ފާޑުކިޔަމުންނެވެ. އެފަރާތްތަކުން ސިފަކުރާ ގޮތުގައި މިއީ ބަރަކާތްތެރި ރަމަޟާން މަހު މުސްލިމުންނަށް އަޅުކަން ކުރުމުގެ މިނިވަންކަމަށް ހުރަސް އެޅުމަށް ހިންގާ ލާއިންސާނީ އަމަލެކެވެ. ނަމަވެސް، އިސްރާއީލުގެ ސަލާމަތީ ބާރުތަކުން ބުނަމުންދަނީ މިއީ އެ ސަރަޙައްދުގައި އޮތް ނުތަނަވަސްކަމާ ގުޅިގެން، މީހުން ގިނަވުން ކޮންޓްރޯލްކޮށް ސަލާމަތީ ކަންކަން ބެލެހެއްޓުމަށް އަޅާފައިވާ ފިޔަވަޅެއް ކަމަށެވެ.

މި ނިންމުމާ ގުޅިގެން ފަލަސްޠީނުގެ ގިނަ ބަޔަކަށް އަލްއަޤްޞާ މިސްކިތުގައި އަޅުކަން ކުރުމުގެ ފުރުޞަތު ވަނީ ގެއްލިފައެވެ.