ޤާނޫނީ ވެރިކަން ކުރުމުގައި ތަފާތެއް ނުކުރައްވާކަމަށާއި، އެކަމުގައި ތަފާތު ނުވެސް ކުރައްވާނެކަމަށް ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.

ރައީސް މުޢިއްޒު މިހެން ވިދާޅުވެފައިވަނީ މީސް މީޑިއަށް ފޮނުއްވި މެސެޖެއްގައެވެ.

Ad
rt

މި މެސެޖުގައި ރައީސް ވިދާޅުވީ، ޤާނޫނު އަސާސީ އާއި ޤާނޫނުތައް ތަންފީޒުކުރުމުގައި، ޤާނޫނުގެ ވެރިކަން (ރޫލް އޮފް ލޯ) މި ޤަައުމުގައި ހިންގުމުގައި އެއްވެސް މީހަކު ތަފާތެއް ނުކުރަށްވާކަމަށެވެ. އަދި އެކަމުގައި ތަފާތު ނުވެސް ކުރައްވާނެކަމަށް ވެސް ވިދާޅުވިއެވެ.

''އެ މީހެއްގެ ޙަސަބަކަށް، ނަސަބަކަށް، މަޤާމަކަށް، މުއްސަނދިކަަމަކަށް، ރަޙްމަތްތެރިކަމަކަށް، ޢާއިލީ ތިމާގެ ކަމަކަށް، ސިޔާސީ ފިކުރަކަށް، އަދި އެ ނޫންވެސް ކަމަކަށް ބަލާ، މިކަމުގައި ކުރާނެ ތަފާތު ކުރުމެއް ނުއޮންނާނެ!'' ރައީސް ވިދާޅުވިއެވެ.

ހެންވޭރުގައި ހުންނަ ގުދަނެއްގެ ފުރާޅު މައްޗަށް އުމުރުން 21 އަހަރުގެ އަންހެނަކު ވެއްޓިފައި އޮއްވައި މިދިޔަ ހުކުރު ދުވަހުގެ ހެނދުނު ފެނިފައިވާއިރު، އެ މައްސަލާގައި އާންމުންގެ ތެރޭގައި ވަނީ ކަންބޮޑުވުން އުފެދިފައެވެ.

ރައީސް މިފަދައިން ވިދާޅުވިއިރު، އެ މައްސަލައާއި ގުޅުން ހުރިކަމަށް އަޑުފެތުރިފައިވާ ރައީސް އޮފީހުގެ އަންޑަރ ސެކްރެޓެރީ ފޮރ ސްޓްރެޓެޖިކް ކޮމިޔުނިކޭޝަން މަގާމުގައި ހުންނެވި އިޒްދިޔާން މުޙައްމަދު މައުމޫން، މިއަދު ވަނީ މަގާމުން ވަކިކޮށްފައެވެ. އަދި އެ އޮފީހުގެ އަންޑަރ ސެކްރެޓެރީ ފޮރ ޑިޖިޓަލް ސްޓްރެޓެޖީގެ މަގާމުގައި ހުންނެވި ދާއޫދު އަޙްމަދު، މުސާރަ ނުލިބޭ ގޮތަށް މިއަދުން ފެށިގެން ސަސްޕެންޑްކޮށް، އޭނާ އަދާކުރަމުން ދިޔަ "ދިވެހި ޒުވާނުންގެ ޤައުމީ ލަފާދޭ ކޮމިޓީ"ގެ ރައީސް ކަމުގެ މަގާމުން ވަނީ ވަކިކޮށްފައެވެ.