ތިލަފުށީ ފަޅުގައި އަޅާފައި އޮތް ލޯންޗެއް ގެއްލިގެން ހޯދަން ފަށައިފިއެވެ.

ގެއްލިގެން ހޯދަމުންދާ ލޯންޗަކީ 18 މީހުންގެ ޖާގައިގެ "ލިޔޯ ފްލެސް" ނަމަކަށް ކިޔާ ލޯންޗެކެވެ.

Ad
rt

މި ލޯންޗު ގެއްލިފައިވަނީ ރޭ ދަންވަރު، ތިލަފުށީ ލިޔޯ ސައިޓުގައި އަޅާފައި އޮއްވައެވެ. މި މައްސަލަ މިހާރު ދިވެހި ފުލުހުންގެ ޚިދުމަތަށް ހުށަހަޅާފައިވާކަމަށް މަޢުލޫމާތު ލިބެއެވެ.

"ތިލަދުން" އަށް މަޢުލޫމާތުދެމުން ފުލުހުން ބުނެފައިވަނީ މިފަދަ މައްސަލައެއް ހުށަހެޅިފައިވާކަމަށެވެ. އަދި މިމައްސަލަ ތަހުޤީގުކުރަމުންދާކަމަށެވެ.

މި ލޯންޗާ ގުޅޭ އެއްވެސް މަޢުލޫމާތެއް ލިބިފައިވާނަމަ 9517007 ނަންބަރާ ގުޅުމަށް އެފަރާތުން ވަނީ އެދިފައެވެ. ފުލުހުންވެސް މިވަގުތު ލޯންޗު ހޯދުމުގެ މަސައްކަތް ދަނީ ކުރަމުންނެވެ.

ފާހަގަކޮށްލެވޭ ކަމަކީ، މިދިޔަ ހަފްތާގައިވެސް މާފުށީ ފަޅުގައި އަޅާފައި އޮއްވާ ޓްރިޓޮން ހޮޓެލްސްގެ "ތޭރަވާ" ލޯންޗު ވަގަށް ނެގި މައްސަލައެއް ރިޕޯޓުކުރެވުނެވެ. އެ ލޯންޗު ފަހުން ފެނުނީ މާލޭގެ ފަޅުގައި އަޅާފައި އޮއްވައެވެ.

މީގެ އިތުރުން، 2024 ވަނަ އަހަރު މ. އަތޮޅުގެ ރަށަކުން ލޯންޗެއް ވަގަށް ނަގައިގެން ގިނިކަންޏާ މާލެއަށް އައި 14 އަހަރުގެ ކުއްޖެއްގެ މައްސަލަވެސް ވަނީ ފެންމަތިވެފައެވެ.

މިފަދަ މައްސަލަތައް އިތުރުވަމުން ދިއުމާ ގުޅިގެން، ފަޅުތެރޭގައި އަޅާފައި ބާއްވާ އުޅަނދުތަކުގެ ސަލާމަތީ ފިޔަވަޅުތައް ވަރުގަދަ ކުރުމަށް ސަމާލުވާންޖެހެއެވެ.