ގްރީސް އަދި ޓަރކީގައި ހޫނުގަދަވެ، އަލިފާނުގެ ގިނަ ހާދިސާތަކެއް

ބަރުސާ އިރުމަތީ ސަރަހައްދުގެ ރަށްތަކުން 1،765 މީހުން ސަލާމަތްކުރެވި، 1،900 އަށްވުރެ ގިނަ ފަޔަރ ފައިޓަރުން އަލިފާން ނިއްވުމުގެ މަސައްކަތުގައި ދަނީ ހަރަކާތްތެރިވަމުންނެވެ. އަލިފާން ރޯވުމުގެ ސަބަބުން އަންކާރާއާއި ބަރުސާ ގުޅުވައިދޭ މައި މަގު ވަނީ ބަންދުކުރެވިފައެވެ. މިއަދު ހެނދުނު ވައި މަޑުވުމާއެކު އަލިފާން ނިއްވުމުގެ މަސައްކަތަށް ކޮންމެވެސް ވަރެއްގެ ފަސޭހައެއް ލިބުނު ނަމަވެސް، މީޑިއާގައި އާންމުވެފައިވާ ވީޑިއޯތަކުން ފެންނަ ގޮތުގައި ކުރިން ހުރި ދަނޑުބިންތަކާއި ފަރުބަދައިގެ ގަސްތައް ވަނީ އަނދާ އަޅިއަށް ވެފައެވެ.

ޓަރކިއޭގެ ޖެނެރަލް ޑިރެކްޓަރޭޓް އޮފް މެޓިއޮރޮލޮޖީން ބުނެފައިވާ ގޮތުގައި، ހުކުރު ދުވަހު އިރުމަތީ-ދެކުނު ސަރަހައްދުގެ ސިރްނަކް ޕްރޮވިންސްގައި ރެކޯޑު ކުރެވުނު 122.9 ޑިގްރީ ފެރެންހައިޓަކީ ޤައުމުގެ ތާރީޚުގައި ރެކޯޑު ކުރެވުނު އެންމެ މަތީ ފިނިހޫނުމިނެވެ.

މި ވަގުތު ޓަރކިއޭގެ އިތުރުން ގްރީސް، ބަލްގޭރިއާ އަދި މޮންޓެނީގްރޯގައިވެސް އަލިފާނުގެ ހާދިސާތަކާ ކުރިމަތިލަމުން ދެއެވެ. ގްރީސްގެ ކިތޭރާ ޖަޒީރާގައި އަލިފާނުގެ ހާދިސާތަކާ ކުރިމަތިލަމުންދާއިރު، ގިނަ ސަރަހައްދުތަކުގައި ފިނިހޫނު މިނުގެ މިންވަރު 38 ޑިގްރީ ސެލްސިއަސް (100 ޑިގްރީ ފެރެންހައިޓް) އަށްވުރެ މަތިވެފައިވެއެވެ.