ކުޅުދުއްފުށި ސިޓީގެ ޖޫލިއެޓް ހިނގުމުގެ ހުޅަނގުކޮޅުގައިވާ ކަރަންޓު ކޭބަލަކަށް ލިބުނު ގެއްލުމުގެ ސަބަބުން ރަށުގެ ބޮޑު ބަޔަކުން ކަރަންޓު ކެނޑުނު މައްސަލައަށް މިހާރު ވަނީ ވަގުތީ ހައްލެއް ގެނެވި، މުޅި ރަށަށް އަލުން ކަރަންޓު ދީފި އެވެ.
ފެނަކަ ކޯޕަރޭޝަނުގެ ކުޅުދުއްފުށި ބްރާންޗުން މިއަދު ބުނެފައިވަނީ، މި މައްސަލައަށް ދާއިމީ ހައްލެއް ހޯދުމުގެ މަސައްކަތް ކުރިއަށްދާ ވަގުތުތަކުގައި ރަށުގެ ބައެއް ސަރަހައްދުތަކުން ކަރަންޓު ކެނޑުމަކީ އެކަށީގެންވާ ކަމެއް ކަމަށެވެ. އަދި ކަރަންޓު ކެނޑޭނެ ސަރަހައްދުތަކުގެ މަޢުލޫމާތު ކުރިއާލާ ހިއްސާކުރެވޭނެ ކަމަށްވެސް ބަޔާނުގައި ބުނެފައިވެއެވެ.
"މި މަސައްކަތުގައި ހަރަކާތްތެރިވާ އަޅުގަނޑުމެންގެ ހީވާގި މުވައްޒަފުންނަށާއި މިކަމުގައި އެއްބާރުލުންދެއްވާ ހުރިހާ ފަރާތްތަކަށް ޝުކުރު ދަންނަވަން،"
ފެނަކައިން ބުންޏެވެ.
މި ހާދިސާއާ ގުޅިގެން ކުޅުދުއްފުށީގެ ގިނަ އަދަދެއްގެ ރައްޔިތުންނަށް ދަތިތަކާ ކުރިމަތިލާން ޖެހުނު ކަމަށް ބެލެވެއެވެ. ނަމަވެސް، ފެނަކައިގެ އަވަސް ފިޔަވަޅުތަކާއެކު މައްސަލަ ހައްލުކުރެވި، ރައްޔިތުންނަށް އާންމު ދިރިއުޅުމަށް އަނބުރާ ދެވުނެވެ.
ފެނަކައިން އިތުރަށް ބުނީ، ދާއިމީ ހައްލެއް ހޯދުމުގެ މަސައްކަތް ކުރިއަށްދާއިރު ރައްޔިތުންގެ އެއްބާރުލުން އެދޭ ކަމަށެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!