ރާއްޖޭގެ ރައްޔިތުން ތިބީ ފަލަޞްޠީނުގެ ރައްޔިތުންނާއިއެކު: ރައީސް

ދިވެހިރާއްޖޭގެ ރައްޔިތުން ތިބީ ފަލަޞްޠީނުގެ ރައްޔިތުންނާއި އެކު ކަމަށް ރާއްޖޭގެ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވެފައިވަނީ ''އިންޓަރނޭޝަނަލް ޑޭ އޮފް ސޮލިޑާޓްރީ ވިތް ފަލަޞްޠީން'' ފާހަގަ ކުރުމުގެ ގޮތުން ކުރެއްވެވި ޓްވީޓެއްގައެވެ.

އެ ޓްވީޓެއްގައި ވިދާޅުވެފައިވަނީ، ރާއްޖޭގެ ރައްޔިތުން ތިބީ ފަލަޞްޠީނުގެ ރައްޔިތުންނާއިއެކު ތެދުވެ ކަމަށާއި، އެ ޤައުމުގެ ކަރާމަތާއި ރައްކާތެރިކަން އަދި ޤައުމިއްޔަތު ދިފާޢު ކުރުމަށްވެސް ދިވެހި ރައްޔިތުން މި ތިބީ ފަލަޞްޠީނުގެ ރައްޔިތުންނާއި އެކުކަމަށެވެ.

ދުނިޔޭގެ ފެންވަރުގައި ފާހަގަ ކުރަމުން އަންނަ އިންޓަރނޭޝަނަލް ސޮލިޑާރޓްރީ ދުވަހުގެ މުނާސަބަތުގައި ރައީސް ކުރެއްވެވި ޓްވީޓުގައި އިތުރަށް ވިދާޅުވެފައިވަނީ، ރާއްޖޭގެ ފަރާތުން ދުނިޔެއަށް ގޮވާލާ ގޮވާލުމެއްގެ ގޮތުގައި ފަލަޞްޠީނުގެ ރައްޔިތުންގެ ޤައުމު ހިމާޔަތް ކުރުމަށާއި، އެ ޤައުމުގެ ރައްޔިތުންނަށް އެ ޤައުމުން ހައްޤުވާ މިންވަރު ލިބުމަށްވެސް ގޮވާލާކަމަށެވެ.

The Maldives stands with the people of Palestine in their quest for dignity and statehood. On the International Day of Solidarity with the Palestinian People we call on the world community to recognize the legitimacy of their grievances and their right to a homeland.

— Ibrahim Mohamed Solih (@ibusolih) November 29, 2020

އިސްލާމީ ގިނަ ޤައުމުތަކަކުންވެސް ވަނީ މީގެ ކުރިން ފަލަޞްޠީނު ރައްޔިތުންގެ ހައްޤުގައި ބަސްބުނެ، އެ ޤައުމުގެ ރައްޔިތުންނަށް ހައްޤު މިންވަރު ހޯދައިދިނުމަށް ގޮވާލާފައެވެ.

ކޮންމެ އަހަރެއްގެވެސް ނޮވެމްބަރ މަހުގެ 29 ވަނަ ދުވަހަކީ އިންޓަރނޭޝަނަލް ޑޭ އޮފް ސޮލިޑާޓްރީ ވިތް ފަލަޞްޠީންއެވެ. އަދި މިއީ 1977 ވަނަ އަހަރު ޔޫއެންގެ ޖެނެރަލް އެސެންބްލީއިން ނިންމާފައިވާ ނިންމުމެކެވެ.