ކޯވިޑް-19 އާއި ގުޅިގެން ކަރަންޓީން ކުރެވޭ ހދ.ކުޅުދުއްފުށީގައި މަސައްކަތްކުރާ ފުލުހުން އެކަހެރިކޮށް ބެއިތިއްބުމަށްޓަކައި ހދ.އަތޮޅު ސްޓޭޓް ހައުސް ކުއްޔަށް ހިފައިފި އެވެ.

ފުލުހުން ބުނީ، ކަރަންޓީން ކުރެވޭ ހދ.ކުޅުދުއްފުށީގައި މަސައްކަތްކުރާ ފުލުހުން އެކަހެރިކޮށް ބެއިތިއްބުމަށްޓަކައި ދައުލަތު މާލިއްޔަތު ޤަވާއިދުގެ 10.26 ގެ (ހ) ގެ 2 ނަމްބަރަށް ރިޔާޢަތްކޮށް ސިންގަލް ސޯސް ޕްރޮކިއުމަންޓް އުސޫލުން، ތިލަދުންމަތީ ދެކުނުބުރީ އަތޮޅު ކައުންސިލް އިދާރާގެ ބެލުމުގެ ދަށުގައިވާ ''ހދ.އަތޮޅު ސްޓޭޓް ހައުސް'' 09 އޮކްޓޯބަރ 2020 ވަނަ ދުވަހުން ފެށިގެން 15 ދުވަހުގެ މުއްދަތަށް މޯލްޑިވްސް ޕޮލިސް ސަރވިސްއަށް ކުއްޔަށް ހިފުމަށް ބިޑް ކޮމެޓީ ޖަލްސާއިން ނިންމާފައިވާކަމަށެވެ.

Ad
rt

މިމަހުގެ 5 ވަނަ ދުވަހު ކުޅުދުއްފުށީ ޕޮލިސް ސްޓޭޝަންގައި މަސައްކަތްކުރާ ފުލުހަކު ކޯވިޑް19 އަށް ޕޮޒިޓިވްވުމާއި ގުޅިގެން މިހާތަނަށް 137 ސާމްޕަލެއް ވަނީ ނަގާފަ އެވެ. އޭގެ ތެރެއިން 7 މީހުންވަނީ ކޯވިޑަށް ޕޮޒިޓިވް ވެފައެވެ.

ފުލުސް މީހާ ޕޮޒިޓިވް ވުމާއި ގުޅިގެން ކުޅުދުއްފުށި ސިޓީ ހިމެނޭހެން، މާލެއިން ފުލުހުންގެ ޓީމު ދަތުރުކުރި 6 ރަށެއް މޮނިޓަރިންގ ހާލަތަށް ވެސް ގެނައެވެ. ޖެހިގެންއައި ދުވަހު އެރަށްތައް ވަނީ މޮނިޓަރިން ހާލަތުން ނަގާފައެވެ.

އުތުރު ޕޮލިސް ކްލަސްޓާއާއި ގުޅިގެން ތިން އަތޮޅުން ޖުމްލަ 180 މީހަކު މި ވަގުތު ހޯމް ކަރަންޓީނުގައި އެބަ ތިއްބެވެ. އަދި މިމަހުގެ 7 ވަނަ ދުވަހު ދިއްދޫއިން ފައްސި ވި ތިން މީހުންނާއި އިއްޔެ ފޯކައިދޫއިން ފައްސިވި މީހަކާއި ގުޅިގެން އެ ދެ ރަށުގައި ކޮންޓެކްޓް ޓްރޭސިން ނެގުމުގެ މަސައްކަތް ވަނީ ކުރިއަށް ގެންގޮސްފަ އެވެ.

ކުޅުދުއްފުށީ ސިޓީގެ ކޯވިޑްގެ ހާލަތު ހާމަކުރަށްވަމުން ކުޅުދުއްފުށީ ރީޖަނަލް ހޮސްޕިޓަލްގެ މެނޭޖަރު އަޙްމަދު ދާއޫދު އިއްޔެ ވިދާޅުވީ އެ ސިޓީން މިވަގުތު ޕޮޒިޓިވް ވެފައި ތިބީ ފާޅު ބޯޓް ކޭސްއާއި ގުޅިގެން 4 މީހުންނާއި، ޕޮލިސް ކޭސްއާއި ގުޅިގެން 2 މީހުން އަދި ހޯމް ކަރަންޓީނު ރިލީސް ސާމްޕަލް ޕައްސިވުމާއި ގުޅިގެން އެކަކު ކަމަށެވެ.

https://thiladhun.wonstasite.com/44308

ޕޮޒިޓިވްވެފައިވާ ބައެއް މީހުންގެ ކިބައިން އަލާމާތްތައް ފެނުނު ނަމަވެސް، އެންމެންގެ ހާލު ވެސް އާންމު ގޮތެއްގައި ރަގަޅު ކަމަށާއި އަދި ޕޮޒިޓިވްވި ހުރިހާ މީހުންނަށް ވެސް އަވަސް ޝިފާއަކަށް އެދޭކަމަށް ދާއޫދު ވިދާޅުވިއެވެ. އަދި ކުޅުދުއްފުށީ ރީޖަނަލް ހޮސްޕިޓަލްގެ މުވައްޒަފުންގެ ފަރާތުންނާއި، ކަމާ ގުޅުންހުރި އެންމެހާ ފަރާތްތަކުން އަދި ރައްޔިތުންގެ ފަރާތުން ލިބެމުން އަންނަ އެއްބާރުލުން ފާހަގަކޮށް، އަޙްމަދު ދާއޫދު ވަނީ ޝުކުރު އަދާ ކުރަށްވާފައި އެވެ.

އަޙްމަދު ދާއުދު ވަނީ އެކުވެރިކަމާއި އެއްބައިވަންތަކަމާއެކު އެންމެން ގުޅިގެން ކުރިއަށް ދިއުމަށް ވެސް އެދި ވަޑައިގެންފައި އެވެ.

ޕޮލިސް ކްލަސްޓާއާ ގުޅިގެން ކުޅުދުއްފުށީގެ އިތުރުން 9 ރަށަކުން ވަނީ ޑައިރެކްޓް ކޮންޓެކުޓުގެ ގޮތުގައި މީހުން ފާހަގަ ވެފައެވެ. އެއީ ހދ ކުރިނބީ، ށ އަތޮޅުން ފުނަދޫ، މިލަންދޫ، ފޯކައިދޫ އަދި ކަނޑިތީމެވެ. އަދި ހއ އަތޮޅުން ދިއްދޫ، ހޯރަފުށި އަދި ބާރަށެވެ.

ހދ. އަތޮޅު ކައުންސިލުން ވަނީ މިއަހަރުގެ މޭ މަހުގެ ތެރޭގައި ކޯވިޑް 19 ގެ ބަލިމަޑުކަމާ ގުޅިގެން، ހދ.އަތޮޅު އިމަޖެންސީ އޮޕަރޭޝަން ސެންޓަރުން ބޭނުންވެއްޖެ ހިނދެއްގައި، ހދ.އަތޮޅު ސްޓޭޓް ހައުސް، އައިސޮލޭޝަން ފެސިލިޓީއެއްގެ ގޮތުގައި ދޫކުރުމަށްވެސް ނިންމަވާފަ އެވެ.