މާލޭ ވޯޓާ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ)އިން މާލޭ ސިޓީގައި ފެން ރައްކާ ކުރާ އިތުރު ދެ ތާންގި ބެހެއްޓުމުގެ މަސައްކަތް ފަށައިފި އެވެ.
މި މަސައްކަތަކީ އެ ކުންފުނިން ހިންގާ "ވޯޓާ ސެކިއުރިޓީ ޕްލޭނިން"ގެ ދަށުން މާލޭ ސިޓީގައި ކުރިއަށް ގެންދާ މަސައްކަތެކެވެ.
އިއްޔެ އެ މަސައްކަތް ރަސްމީކޮށް ފަށްޓަވައިދެއްވާފައިވަނީ އެމްޑަބްލިއުއެސްސީގެ މެނޭޖިން ޑިރެކްޓަރު ހަސަން ޝާހުގެ އިތުރުން ކުންފުނީގެ މެނޭޖްމެންޓް ބޭފުޅުންނެވެ.
މި މަޝްރޫއުގެ މަގްސަދަކީ މާލޭގައި އެ ކުންފުނިން ފެން ރައްކާކުރެވޭ މިންވަރު އިތުރުކޮށް މެދުކެނޑުމެއްނެތި ދެމެހެއްޓެނިވި ގޮތެއްގައި ރައްކާތެރި ސާފު ބޯފެން ފޯރުކޮށްދިނުން ކަމަށް އެ ކުންފުނިން ބުންޏެވެ.
އެމްޑަބްލިއުއެސްސީ އިން ބުނީ މި ދެ ތާންގީ ބެހެއްޓުމަށް ހަމަޖެހިފައި ވަނީ ކުރިން އެސްޓީއޯގެ ރެޑީ މިކްސް ކޮންކްރީޓް މަސައްކަތް ކުރަމުން އައި މާލޭގެ 378 ނަމްބަރު ކޮށީގައި ކަމަށެވެ.
MWSC Managing Director @hassanshaahu and Executive Team Members groundbreak the Storage Tank development project in Male’ today.
The storage tank development is part of the #WaterSecurityPlan for the greater Male’ Region#MWSCProject pic.twitter.com/SZDfKyZkeG— Male' Water and Sewerage Company Pvt. Ltd. (@MWSC_Official) September 7, 2020
އެ މަޝްރޫއުގެ ދަށުން ދެ ތާންގީގެ އިތުރުން ފެން ފޯރުކޮށްދިނުމަށް ޕަމްޕް ރޫމެއް ގާއިމުކުރާނެ އެވެ. އަލަށް ބަހައްޓާ ދެ ތާންގީން ކުރެ ކޮންމެ ތާންގީ އަކުވެސް 13،648 ކިއުބިކް މީޓަރުގެ ފެން ރައްކާކުރެވޭނެ ކަމަށް ފެން ކުންފުނީން ބުނެއެވެ. އަދި މިމަސައްކަތްތައް ނިމުމުން އެމްޑަބްލިޔުއެސްސީ އިން މާލޭ ސިޓީގައި ފެން ރައްކާކުރެވޭ މިންވަރު ޖުމްލަ 50،296 ކިޔުބިކް މީޓަރަށް އިތުރުވެގެންދާނެ ކަމަށްވެސް ބުންޏެވެ.
އެ މަޝްރޫއު ނިންމާލުމަށް ކަނޑައަޅާފައިވަނީ ތާރީހަކީ އަންނަ އަހަރުގެ ޑިސެމްބަރުގެ ނިޔަލަށެވެ. އެ މަސައްކަތަށް ޖުމްލަ 82 މިލިއަން ރުފިޔާ ހަރަދުވާނެ ކަމަށް އެކުންފުނީން ބުނެއެވެ.