މެޖޯރިޓީ ނެތި ސަރުކާރު ހިންގަންޖެހޭ ދުވަހަކުން ރައްޔިތުންގެ ސަލާމަތާއި ރައްކައުތެރިކަން ގެއްލިދާނެ ފަދަ ގޮތަކަށް މިއަދު ގާނޫނެއް ފާސްކުރުމަކީ ރަނގަޅު ކަމެއް ނޫންކަމަށް ކެންދޫ ދާއިރާގެ މަޖިލިސް މެމްބަރު ޢަލީ ޙުސައިން ވިދާޅުވެއްޖެއެވެ.

މަޝްޙޫރު ޤާނޫނީ ވަކީލު ޢަލީ މިހެން ވިދާޅުވީ، "ހެލްތު އިމަޖެންސީ ގަރާރު މަޖިލީހަށް ހުށަހަޅަން ޖެހުން ގޯހެއް ނޫން: ޑރ. އަޒީ" މި ސުރުޚީ ދަށުގައި ނޫހެއްގައި ގެނެސްދީ ފައިވާ ޚަބަރެއް ހިމަނުއްވައި ކުރެއްވި ޓުވީޓެއްގައެވެ.

Ad
rt

އެ ޓްވީޓްގައި ޢަލީ ވިދާޅުވެފައި ވަނީ މަޖިިލީހުގެ މެޖޯރިޓީ ނެތި ސަރުކާރު ހިންގަންޖެހޭ ދުވަހަކުން ރައްޔިތުންގެ ސަލާމަތާއި ރައްކައުތެރިކަން ގެއްލިދާނެ ފަދަ ގޮތަކަށް މިއަދު ގާނޫނެއް ފާސްކުރުމަކީ ރަނގަޅު ކަމެއް ނޫންކަމަށް އިހުތިރާމާއެކު ދަންނަވާ ކަމަށެވެ.

ރާއްޖޭގައި އޮތީ ރިޔާސީ ނިޒާމެއްކަންވެސް ހަނދާންކުރަންޖެހޭ ކަމަށްވެސް ޢަލީ ވަނީ ވިދާޅުވެފައެވެ.

"އިހުތިރާމާއެކު ދަންނަވަން ޖެހެނީ މަޖިިލީހުގެ މެޖޯރިޓީ ނެތި ސަރުކާރު ހިންގަންޖެހޭ ދުވަހަކުން ރައްޔިތުންގެ ސަލާމަތާއި ރައްކައުތެރިކަން ގެއްލިދާނެ ފަދަ ގޮތަކަށް މިއަދު ގާނޫނެއް ފާސްކުރުމަކީ ރަނގަޅު ކަމެއް ނޫންކަމަށް. މިއީ ރިޔާސީ ނިޒާމެއްކަންވެސް ހަނދާންކުރަންޖެހޭ."

މެމްބަރު ޢަލީ ޙުސައިން

ސިއްހީ ކުއްލި ނުރައްކަލުގެ ހާލަތު އިއުލާނުުކުރާ ގަރާރު ރައްޔިތުންގެ މަޖިލީހަށް ހުށަހަޅައި ފާސްކުރަން ޖެހޭ ގޮތަށް ގާނޫނަށް ބަދަލު ގެނައުން އާއްމު ސިއްހަތު ރައްްކާތެރިކުރުމުގެ ގާނޫނަށް ފުވައްމުލަކު އުތުރު ދާއިރާގެ މެމްބަރު މުހައްމަދު ރަަޝީދު ހުށަހަޅުއްވާފައިވާ އިސްލާހާ މެދު ސިއްހީ މާހިރުންނާއި އާއްމުންގެ ދަނީ ދެކަފި ޚިޔާލުތައް ފާޅު ކުރަމުންނެވެ.

އެ އިސްލާހަށް ހިޔާލު ހޯދަން މަޖިލީހުގެ އިދާރާގައި ރޭ ބޭއްވި ޕެނަލް ޑިސްކަޝަންގައިވެސް ޑޮކްޓަރުން ވަނީ އެ އިސްލާހާއިމެދު ހުރި ކަންބޮޑުވުންތައް ފާޅުކޮށްފައެވެ. އަދި މީސް މީޑިއާގައިވެސް ދަނީ މިއިސްލާހާއިމެދު ޚިޔާލު ފާޅުކުރެވެމުންނެވެ.

އެ ޕެނަލް ޑިސްކަޝަންގައި ޑރ. އަލީ ނިޔާފް ޚިޔާލު ފާޅުކުރަށްވާފައި ވާއިރު، އެ ޚިޔާލަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު އަދި އެމްޑީޕީގެ ޗީފް ވިޕް ރޮޒެއިނާ އާދަމް ތާއީދުކުރެއްވުމުން މެދުހެންވޭރު ދާއިރާގެ މެމްބަރު އަދި އެމްޑީޕީގެ ޕާލިމެންޓަރީ ގްރޫޕުގެ ލީޑަރު އަލީ އާޒިމް ނުރުހުން ފާޅުކުރައްވައި ފައެވެ.

ޑރ. ނިޔާފް އެ ޕެނަލް ޑިސްކަޝަންގައި ދެއްކެވި ވާހަކައިގެ ބައެއް ފެންނަ ވީޑިއޯ ހިއްސާކުރަށްވައި ކުރެއްވި ޓުވީޓެއްގައި ރޮޒެއިނާ ވަނީ، ޑރ. ނިޔާފް ދެއްކެވި ވާހަކައާ އެއްބަސްވެވަޑައިގަންނަވާ ކަމަށް ވިދާޅުވެ، އަދި އޭނާގެ ހުށަހެޅުންތައް ކޮމެޓީއިން ބަލައިގަންނާނެ ކަމަށް އުންމީދު ކުރައްވާ ކަމަށް ވިދާޅުވެފައެވެ.

ރޮޒެއިނާގެ ޓްވީޓަށް ރައްދުދެއްވައި އާޒިމް ވިދާޅުވީ، ޕާޓީގެ ޗީފް ވިޕް ކަމަށްވާ ރޮޒެއިނާގެ ހިޔާލުތައް ޕީޖީ ގްރޫޕުގެ ތެރޭގައި މަޝްވަރާ ކުރެއްވޭނެ ކަމަށެވެ. އެކަން ކުރަންވީ ސޯޝަލް މީޑިއާގައި ނޫން ކަމަށް އޭނާ ވިދާޅުވިއެވެ. އަދި މިއީ ތާއީދު ހޯދުމުގެ މުބާރާތެއް ނޫން ކަމަށާއި، އަމިއްލަ ފައިދާއަށް "ޕޮޕިއުލިސްޓް އެޖެންޑާ" ކުރިއެރުވުމަކީ ރަނގަޅު ގޮތެއް ނޫން ކަމަށް ވިދާޅުވިއެވެ.

ރޮޒެއިނާ ކޮމެންޓު ކުރެއްވީ ބިލު ވިދާޅުނުވެހެން ހީވާ ކަމަށް ވިދާޅުވެ، މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީވެސް ވަނީ ރޮޒެއިނާގެ ޓްވީޓަށް ފާޑުވިދާޅުވެފައެވެ.

މޯލްޑިވްސް ނޭޝަނަލް ޔުނިވާސިޓީ (އެމްއެންޔޫ) ގެ ކައުންސިލްގައި ހިމެނޭ، ޓުވީޓާގައި އެމްޑީޕީގެ ވަރަށް ހަރަކާތްތެރިއެއް ކަމަށްވާ ހާމިދު އަބުދުލް ޣަފޫރުވެސް ވަނީ ޑރ. ނިޔާފަށް ނިސްބަތްކޮށް "ހެޔޮގޮތަކީ މަޖިލީހަށް ކުރިމަތި ލެއްވުން ކަމަށް" ބުނެ ޓްވީޓް ކޮށްފައެވެ. މި ޓުވީޓާއިމެދުވެސް މީހުން އަންނަނީ ހިތްހަމަ ނުޖެހުން ފާޅު ކުރަމުންނެވެ.

ޑރ. ނިޔާފް ފާޅުކުރެއްވި ޚިޔާލާއި ގުޅިގެން މަޖިލީހުގެ އަހަވަންދޫ ދާއިރާގެ މެމްބަރު ކުރެއްވި ޓުވީޓެއްގައި ބަސްމަގު ގެންނަވާފައިވާ ގޮތަށް އިއްޔެވަނީ ވަރަށް ބޮޑަށް ޝިފާޢުއަށް އާންމުންގެ ފާޑުކިޔުން އަމާޒުވެފައެވެ.