އިޓަލީގެ ރެގިއުލޭޓަރުން ސޯޝަލް މީޑިއާގެ ބޮޑު ކުންފުނި މެޓާ 805 މިލިއަން ޔޫރޯ (887 މިލިއަން ޑޮލަރު ނުވަތަ 670 މިލިއަން ޕައުންޑް) އިން ޖޫރިމަނާކޮށްފިއެވެ.

މި ފިޔަވަޅު އަޅާފައިވަނީ އެންޑްރޮއިޑް ފޯނު ބޭނުންކުރާ ފަރާތްތަކުގެ ޚާއްޞަ ހުއްދައަކާ ނުލައި، އެ މީހުންގެ ފޯނުގައި ހުރި ފޮޓޯތައް ބެލި މައްސަލައެއްގައެވެ.

Ad
rt

އިޓަލީގެ ޑޭޓާ ޕްރޮޓެކްޝަން އޮތޯރިޓީން ބުނީ ފޭސްބުކް އެޕްލިކޭޝަންގެ ފީޗާއެއް މެދުވެރިކޮށް އެ މީހުންގެ ފޮޓޯ އަދި ވީޑިއޯތައް ބެލުމުގެ ފުރުސަތު މެޓާއަށް ލިބިފައިވާކަން، ސްމާޓްފޯން ބޭނުންކުރާ ގާތްގަނޑަކަށް 20 މިލިއަން މީހުންނަށް އެ ކުންފުނިން ރަނގަޅަށް އަންގާފައި ނުވާ ކަމަށެވެ. މިއީ އިޓަލީގެ އިދާރާއަކުން ޓެކްނޮލޮޖީގެ ބޮޑު ކުންފުންޏަކާ ދެކޮޅަށް މިހާތަނަށް އަޅާފައިވާ އެންމެ ބޮޑެތި ޖޫރިމަނާތަކުގެ ތެރޭގައި ހިމެނޭ އަދަދެކެވެ.

މި މައްސަލަ އުފެދިފައިވަނީ، ޔޫޒަރުންގެ ފޯނުގެ ގެލެރީގައި ހުންނަ ފޮޓޯ އަދި ވީޑިއޯތައް ބޭނުންކޮށްގެން ޕޯސްޓް ހެދުމަށް ޚިޔާލު ހުށަހަޅައިދޭ ފީޗާއަކާ ގުޅިގެންނެވެ. ފޭސްބުކުން ފޯނުގެ ގެލެރީއަށް ވަނުމުގެ ހުއްދަ ހޯދާފައިވަނީ މުޅި އެޕްލިކޭޝަނަށް އެއްފަހަރާ ދެވޭ އެއް ހުއްދައިގެ ތެރެއިންނެވެ. ނަމަވެސް، މި ހުއްދައިގެ ސަބަބުން ގެލެރީގައި ހުރި ފޮޓޯތަކުގެ މައްޗަށް ބިނާކޮށް ޕޯސްޓްތަކުގެ ޚިޔާލުތައް ފޭސްބުކުން އުފައްދާނެކަން ކުރިން ދިން ނޯޓިހުގައި ސާފުކޮށްދީފައި ނުވާ ކަމަށް އެ ގައުމުގެ ރެގިއުލޭޓަރުން ބުނެފައިވެއެވެ.

މި މައްސަލައާ ގުޅިގެން އިޓަލީގެ އޮތޯރިޓީން ވަނީ އެ ފީޗާ އޮޓޮމެޓިކުން މަސައްކަތްކުރާ ގޮތަށް ހުންނަ ހުރުން ހުއްޓުވުމަށާއި، ވަކިވަކިން ޔޫޒަރުންގެ ހުއްދަ ހޯދުމަށް މެޓާއަށް 60 ދުވަހުގެ މުއްދަތެއް ދީފައެވެ.

ރެގިއުލޭޓަރުން ބުނެފައިވަނީ މި އަދަބު ކަނޑައެޅުމުގައި "މިކަމުގެ އަސަރު ފޯރި މީހުންގެ އަދަދު ގިނަކަމަށާއި"، އަދި "އެޕްލިކޭޝަން އަޕްޑޭޓް ނުކުރާ ފަރާތްތަކަށާއި މިހާރުވެސް މި ނިޒާމަށް ހުއްދަ ދީފައިވާ މީހުންނަށް މިކަމުގެ އަސަރު އަދިވެސް ކުރަމުންދާ" ކަމަށް ބަލާފައިވާ ކަމަށެވެ. މީގެ އިތުރުން މި މައްސަލައިގައި މެޓާގެ ފަރާތުން އެއްބާރުލުން ނުލިބޭކަން ވެސް އެ އިދާރާއިން ފާހަގަކުރިއެވެ. މި މައްސަލައާ ގުޅިގެން ބީބީސީން ވަނީ ބަހެއް ހޯދުމަށް މެޓާއަށް ހުށަހަޅާފައެވެ.

އިންސްޓަގްރާމާއި ވަޓްސްއެޕްގެ މައި ކުންފުނި ކަމަށްވާ މެޓާގެ ވިޔަފާރީގެ އުސޫލުތަކާ ގުޅިގެން މިދިޔަ މަހުވެސް ވަނީ އެ ކުންފުނީގެ ތާރީޚުގައި ކުރިމަތިވި އެންމެ ބޮޑު ޖޫރިމަނާއާ ކުރިމަތިލާން ޖެހިފައެވެ. އެގޮތުން ފޭސްބުކް ބޭނުންކުރާ މީހުންގެ ޑޭޓާ ގެންގުޅޭ ގޮތާ މެދު އަހަރުތަކެއް ވަންދެން އާންމުންނަށް އޮޅުވާލައި ދޮގުހަދާފައިވާ ކަމަށް ނިންމައި، އެމެރިކާގެ ނިއު މެކްސިކޯގެ ފަނޑިޔާރަކު ވަނީ އެ ކުންފުނި 25 ބިލިއަން ޑޮލަރުން (18.6 ބިލިއަން ޕައުންޑް) ޖޫރިމަނާކުރުމަށް އަމުރުކޮށްފައެވެ.