ވޯލްޑް ކަޕް 2026ގެ ފޯރިގަދަ ދެވަނަ ސެމީ ފައިނަލް މެޗުގައި، ފަހަތުން އަރައި އިނގިރޭސިވިލާތް 2-1 އިން ބަލިކޮށް، ދުނިޔޭގެ ޗެމްޕިއަން އާޖެންޓީނާއިން ޖެހިޖެހިގެން ދެވަނަ ފަހަރަށް ވޯލްޑް ކަޕްގެ ފައިނަލަށް ދަތުރުކޮށްފިއެވެ.

ނިއު ޖާޒީގެ އީސްޓް ރަދަފޯޑްގައި ކުޅުނު މި މެޗު ފެށުމުގެ ކުރިންވެސް ދެ ގައުމުގެ ސަޕޯޓަރުންގެ ފަރާތުން ވަރަށް ފޯރިގަދަ މާހައުލެއް ފެނިގެންދިޔައެވެ.

Ad
rt

މެޗުގެ ބޮޑުބައިގައި އިނގިރޭސިން ކުރީގައި އޮތީ އެންތަނީ ގޯޑަން ކާމިޔާބުކޮށްދިން ލަނޑުންނެވެ. މެޗުގެ ފަހު ފަސް މިނެޓަށް އެޅުނުއިރުވެސް އިނގިރޭސިން 1-0 އިން ކުރީގައި އޮތުމުން، އާޖެންޓީނާއަށް ވަގުތު ހުސްވަމުންދާ ކަމަށް ބެލެވުނެވެ.

އެންތަނީ ގޯޑަން އިންގްލެންޑްގެ ގޯލް ވައްދާލަނީ، ފޮޓޯ: ރޮއިޓާސް

ނަމަވެސް، ލިއޮނަލް މެސީގެ ކެޕްޓަންކަމުގެ ދަށުން ކުޅެމުންދިޔަ އާޖެންޓީނާއިން ދޫނުދީ ކުރި މަސައްކަތުން މެޗުގެ އޮއިވަރު ބަދަލުކޮށްލިއެވެ. މެޗުގެ 85 ވަނަ މިނެޓުގައި އެންޒޯ ފެނާންޑޭޒް، އޭރިއާ ބޭރުން ފޮނުވާލި ހިތްގައިމު ހަމަލާއަކުން ނަތީޖާ އެއްވަރުކޮށްދިނެވެ.

މެޗުގެ ނަތީޖާ ހަމަހަމަކުރި ގޯލަށްފަހު، ފޮޓޯ: ރޮއިޓާސް

އެއަށްފަހު، މެޗުގެ އިތުރު ވަގުތުގެ ތެރޭގައި ބަދަލު ކުޅުންތެރިއެއްގެ ގޮތުގައި ނުކުތް ލައުޓާރޯ މާޓިނޭޒް ބޮލުން ޖެހި ލަނޑާއެކު އާޖެންޓީނާއިން މެޗު ކާމިޔާބުކުރިއެވެ.

އާޖެންޓީނާ މޮޅުވި ލަނޑު ކާމިޔާބުކުރުން، ފޮޓޯ: ރޮއިޓާސް

މި ނަތީޖާއާއެކު އިނގިރޭސި ޓީމަށް ވަނީ ބޮޑު މާޔޫސްކަމަކާ ކުރިމަތިލާން ޖެހިފައެވެ. ގިނަ ފާޑުކިޔުންތެރިން ފާހަގަކުރާ ގޮތުގައި، މެޗުގެ ފަހުކޮޅު އިނގިރޭސި ކޯޗަށް ހެދުނު ޓެކްޓިކަލް ގޯސްތަކުގެ ސަބަބުން މެޗުގެ ކޮންޓްރޯލް ގެއްލި، މޮޅުވާން ލިބުނު ފުރުސަތު ބޭކާރުވީއެވެ. މެޗުގެ ފަހު ސިކުންތުކޮޅުގައި އިނގިރޭސި ޓީމުން އާޖެންޓީނާގެ އޭރިއާ ތެރެއަށް ގިނަ ހުރަސްތަކެއް ނެގި ނަމަވެސް، އާޖެންޓީނާގެ ދިފާއީ ފާރު ފޫއަޅުވާލެވޭ ގޮތެއް ނުވިއެވެ.

މެސީ، ދެވަނަ ފައިނަލް ކަށަވަރުވުމުގެ އުފަލުގައި، ފޮޓޯ: ރޮއިޓާސް

އަންނަ އާދިއްތަ ދުވަހު ކުޅޭ ފައިނަލް މެޗުގައި އާޖެންޓީނާ ނުކުންނާނީ ސްޕެއިންއާ ދެކޮޅަށެވެ. މި މެޗުން މޮޅުވެއްޖެނަމަ، އާޖެންޓީނާ ވެގެންދާނީ ވޯލްޑް ކަޕްގެ ތަށި ޖެހިޖެހިގެން ދެ ފަހަރު ދިފާއުކުރި ދުނިޔޭގެ ތިންވަނަ ގައުމަށެވެ.