ދިވެހީންގެ ތެރޭގައި އިހުއޮތް އެކަކު އަނެކަކަށް އިޙްތިރާމްކުރުމުގެ އާދަކާދަ އަލުން ދިރުވުމަށްޓަކައި، 2026 ވަނަ އަހަރު ޤައުމީ ފެންވަރުގެ މަޝްރޫޢެއް ފެށުމަށް ރައީސް ޑރ. މުޙައްމަދު މުޢިއްޒު އިއްޔެ އިޢުލާން ކުރައްވައިފިއެވެ.
މި މަޝްރޫޢުގައި ހުރިހާ ފަރާތްތަކެއްގެ ބައިވެރިވުން ހޯއްދެވުމަށްވެސް އެމަނިކުފާނު ގޮވާލައްވާފައިވެއެވެ.
އަރިއަތޮޅު ދެކުނުބުރީ މަހިބަދޫގައި ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، ތަރައްޤީގެ ކަންކަން ކުރިއަށްދާއިރު މީހުންގެ ވިސްނުމާއި، އުޅުމާއި ގުޅުންތައްވެސް ތަރައްޤީވާން ޖެހޭ ކަމަށެވެ. އަދި ސިޔާސީ އޮއިވަރުގެ ތެރެއިން، އެކަކު އަނެކަކަށް އިޙްތިރާމްކުރުމުގެ އާދަކާދަ ވަނީ ނެތިގޮސްފައިކަން އެމަނިކުފާނު ފާހަގަކުރެއްވިއެވެ.
މި މަޝްރޫޢުގެ ކާމިޔާބީއަށްޓަކައި ސަރުކާރުގެ އިދާރާތަކާއި، ސިޔާސީ ޕާޓީތަކާއި، އަދި އާންމު ރައްޔިތުންގެ ބައިވެރިވުން މުހިންމުކަމަށް ރައީސް މުޢިއްޒު ވިދާޅުވިއެވެ. މިކަމުގެ ޙަޤީޤީ ނަތީޖާ ފެންނާނީ އެންމެންގެ ބައިވެރިވުން ލިބިގެން ކަމަށް އެމަނިކުފާނު ވިދާޅުވިއެވެ.
ރާއްޖޭގެ ތަރައްޤީ ވަށާޖެހޭ ގޮތެއްގައި ޙާޞިލުކުރުމަށްޓަކައި މިފަދަ އިޖްތިމާޢީ ބަދަލުތައް މުހިންމުކަމަށް ރައީސް މުޢިއްޒު ފާހަގަކުރެއްވިއެވެ. އަދި މި މަޝްރޫޢު ކާމިޔާބުވާނެކަމުގެ ޔަޤީންކަން އެމަނިކުފާނަށް އޮތްކަންވެސް ފާހަގަކުރެއްވިއެވެ.
މި މަޝްރޫޢަކީ ދިވެހި މުޖުތަމަޢުގެ އިޖްތިމާޢީ ފޭރާން އަލުން ބިނާކުރުމަށް އަމާޒުކޮށްގެން ފަށާ އެންމެ ބޮޑު އެއް މަޝްރޫޢު ކަމަށްވާނެއެވެ. މީގެ ސަބަބުން ދިވެހިންގެ މެދުގައި އޮންނަ އެކުވެރިކަމާއި އެއްބައިވަންތަކަން އިތުރުވެ، މުޖުތަމަޢުގެ ގުޅުން ބަދަހިވެގެންދާނެ ކަމަށް އުންމީދު ކުރެވެއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!