ރައްޔިތުންގެ މަޖިލީހުގެ ކުރީގެ މެންބަރު ޢަބްދުލްޢަޒީޒް ޢަބްދުﷲ އަވަހާރަވުމާ ގުޅިގެން މިރޭ ކުރިއަށްދިޔަ މަޖިލީހުގެ ޖަލްސާގައި ސުކޫތެއް ގެނެސްފިއެވެ.

މިރޭ ބޭއްވި މަޖިލީހުގެ ޖަލްސާއަކީ މަޖިލީހުގެ 50 މެންބަރަކު ސޮއިކުރަށްވައި، ދައުރުން ބޭރުގައި ޖަލްސާއެއް ބާއްވަން އެދިވަޑައިގަތުމުން މަޖިލީހުގެ ގަވާއިދުގެ ދަށުން ބޭއްވި ޖަލްސާއެކެވެ.

Ad
rt

މި ޖަލްސާފެށުމުގައި ރިޔާސަތުން ރައީސް އަބުދުއްރަޙީމް ޢަބުދުﷲ ވަނީ މަޖިލީހުގެ ކުރީގެ މެންބަރު ޢަބްދުލްޢަޒީޒް ޢަބްދުﷲ މިއަދު އަވަހާރަވެފައިވާތީ، ޢަބްދުލްޢަޒީޒް ޢަބްދުﷲ އަށް ސުވަރުގޭގެ ދާއިމީ ނިއުމަތް ދެއްވުންއެދި ދުޢާކުރަށްވައި، ޢާއިލާއަށް ކެތްތެރިކަން ދެއްވުން އެދިވަޑައިގެންފައެވެ.

އެއަށްފަހު ވަނީ މަރްޙޫމްގެ ހަނދާނުގައި ތަޅުމުގައި ސްކޫތެއް ގެނެސްފައެވެ.

ޢަބްދުލްޢަޒީޒް ޢަބްދުﷲ ވަނީ، 24 ފެބްރުއަރީ 1985 އިން 23 ފެބްރުއަރީ 1990 ގެ ނިޔަލަށް ރައްޔިތުންގެ މަޖިލީހުގެ މެންބަރުކަން ކުރަށްވާފައެވެ.

ޢަބްދުލްޢަޒީޒު އަބްދުﷲ އަކީ ދިވެހި ދައުލަތަށް 45 އަހަރަށްވުރެ ދިގު މުއްދަތަކަށް ޚިދުމަތްކުރައްވާފައިވާ ބޭފުޅެކެވެ.

ރައީސް ޑރ. މުޙައްމަދު މުޢިއްޒު ވެސް މިއަދު ވަނީ ޢަބްދުލްޢަޒީޒް ޢަބްދުﷲ އަވަހާރަވުމުގެ ހިތާމައިގައި ބައިވެރިވެވަޑައިގެން އެ މަރުޙޫމްގެ ޢާއިލާއަށް ތަޢުޒިޔާ ވިދާޅުވެފައެވެ.