ބައެއް ޓީވީތަކުން ކެމްޕެއިން ކުރާ ކަމުގެ ޝަކުވާ ވަނީ ލިބިފައި: ހަބީބް

ރިޔާސީ އިންތިހާބުގެ ކެމްޕެއިން ކުރުން މަނާ ގަޑީގައި ބައެއް ޓީވީތަކުން ކެމްޕެއިން ކުރާ ޒާތުގެ ކަންކަން ކުރާ ކަމުގެ ޝަކުވާ ލިބިވަޑައިގެންފައިވާ ކަމަށް އިލެކްޝަންސް ކޮމިޝަން (އީސީ) ގެ ނައިބު ރައީސް އިސްމާއިލް ހަބީބް މިރޭ ވިދާޅުވެއްޖެއެވެ.

މާދަމާ އޮންނަ ރިޔާސީ އިންތިހާބުގެ ވޯޓުގެ ކުރިން ބޭއްވި ނޫސްވެރިންގެ ބައްދަލުވުމުގައި ހަބީބް ވިދާޅުވީ ގައުމީ ބައެއް ޓީވީ ޗެނަލްތަކުން މިހާރު ވެސް މަނާ ގަޑީގައި ކެމްޕެއިން ކުރެވޭ ޒާތުގެ ކަންކަން ކުރަމުންދާ ކަން ލަފާ ދޭ ކޮމިޓީގައި ހިމެނޭ މޯލްޑިވްސް ބްރޯޑްކާސްޓިން ކޮމިޝަންގެ ފަރާތުން މައުލޫމާތު ލިބިފައިވާ ކަމަށެވެ.

"ވަކި ކުލައެއްގެ ހެދުމެއް، ނޫނީ ވަކި ކުލައެއްގެ ބެކްގްރައުންޑެއް އަންނަ ގޮތަށް ކެމްޕެއިން ކުރެވޭ ޒާތަށް ކަންކަން ކުރެވެމުންދާ ތަން. އެހެންވީމަ އެކަން ނުކުރެއްވުމަކީ ކޮމިޝަންގެ ވަރަށް ބޮޑު އެދުމެއް،" ހަބީބް ވިދާޅުވިއެވެ.

ކެމްޕެއިން ކުރުން މަނާ ގަޑިއަކީ މިއަދު އިރުއޮއްސި ހަޔަކުން ފެށިގެން އާދިއްތަ ދުވަހުގެ ހަޔަކާ ހަމައަށެވެ. ހަބީބް ވިދާޅުވީ އެ ގަޑީގެ ތެރޭގައި ކެމްޕެއިން ކުރެވޭ ޒާތުގެ އެއްވެސް ކަމެއް ކުރުމަކީ މަނާ ކަމެއް ކަމަށެވެ.

މީގެއިތުރުން ކެމްޕެއިން ކުރުން މަނާ ގަޑީގައި ބައެއް ކެންޑިޑޭޓުންގެ ފަރާތުން މެސެޖް ލިބެމުންދާ ކަމުގެ ޝަކުވާ ލިބިވަޑައިގެންފައިވާ ކަމަށް ހަބީބް ވިދާޅުވިއެވެ. އެހެންވެ، މީސް މީޑިއާގެ ޒަރިއްޔާ އިންނާއި އެއްވެސް ގޮތަކަށް ކެމްޕެއިން ކުރެވޭ ޒާތުގެ އެއްވެސް ކަމެއް ކުރުމަކީ މަނާ ކަމެއް ކަމަށް އޭނާ ވިދާޅުވިއެވެ.

ކޮންމެ ފަސް އަހަރަކުން ރާއްޖޭގައި ބާއްވާ ރިޔާސީ އިންތިހާބުގައި މި ފަހަރު ވޯޓުލުމުގެ ހައްގު 282،395 މީހުންނަށް ލިބިދޭއިރު، ޖުމްލަ 574 ވޯޓުފޮށި ބެހެއްޓުމަށް ވަނީ ނިންމާފައެވެ.

އޭގެ ތެރޭގައި ހިމެނެނީ، މާލެ ސަރަހައްދުގައި 176 ފޮއްޓާއި އަތޮޅު ތެރޭގައި 319 ފޮއްޓާއި ރިސޯޓުތަކުގައި 65 ފޮއްޓެވެ. އަދި ރާއްޖެއިން ބޭރުގައި 8 ފޮއްޓާއި ޖަލުތަކާއި ސިނާއީ ރަށްރަށުގައި 6 ފޮއްޓި ބަހައްޓާނެއެވެ.

ރާއްޖެއިން ބޭރުގެ ގައުމުތަކުގެ ތެރެއިން ވޯޓުފޮށު ބަހައްޓަނީ އިންޑިޔާ، ސްރީލަންކާ، މެލޭޝިޔާ އަދި އިނގިރޭސިވިލާތުގެ ލަންޑަނާއި ޔުނައިޓެޑް އެރެބް އެމިރޭޓްސް ގައެވެ.

ރަށްވެހިވެފައިވާ ރަށް ނޫން އެހެން ތަންތަނަކަށް ރަޖިސްޓްރީވާން 40،000 އަށް ވުރެ ގިނަ މީހުން ފޯމު ހުށަހަޅާފައިވާއިރު، އޭގެތެރެއިން 35،849 މީހުންގެ ފޯމް ބަލައިގަނެ ރީރެޖިސްޓާ ވަނީ ކޮށްފައެވެ.

ރިޔާސީ އިންތިހާބުގެ ފުރަތަމަ ބުރުގެ ވޯޓުލުން މާދަމާ ކުރިއަށްދާއިރު، ދެ ވަނަ ބުރަކަށް ދާންޖެހިއްޖެނަމަ، އިންތިހާބު ބޭއްވުމަށް ކަނޑައަޅާފައި ވަނީ ސެޕްޓެމްބަރު މަހުގެ 30 ވަނަ ދުވަހުއެވެ.