އަތޮޅު ފިހާރަތަކުގެ ކުލި ކައުންސިލުތަކަށް ދިނުމަށް ނިންމަވައިފި

އަތޮޅު ފިހާރަތަކުގެ ކުލި އެއްކޮށް ކައުންސިލަރުން އެދޭ ގޮތަށް ކައުންސިލްތަކަށް ދިނުމަށް ރައީސުލްޖުމްހޫރިއްޔާ ނިންމަވައިފިއެވެ.

އެ މަނިކުފާނު އެ ގޮތަށް ނިންމެވީ އއ. އުކުޅަހުގައި ކުރިއަށް ގެންދާ "ވިޔަވަތި" ކޮންފަރެންސްގައި ކައުންސިލްތަކުން ހުށަހެޅި ކަންބޮޑުވުންތަކާއި ޝަކުވާތަކާ ގުޅޭގޮތުން ވާހަކަފުޅު ދައްކަވަމުންނެވެ.

2014 ވަނަ އަހަރުން ފެށިގެން މި ވެރިކަން އައުމާ ހަމައަށް ކައުންސިލްތަކަށް އަތޮޅު ފިހާރަތަކުގެ ކުލި ލިބިފައެއް ނުވެއެވެ. އަދި މި ވެރިކަމުގައި 2014 ވަނަ އަހަރުން ފެށިގެން 2016 ވަނަ އަހަރާ ހަމައަށްވާ ކުލި, މީގެކުރިން ކައުންސިލްތަކަށް ވަނީ ޖަމާކޮށްދީފައެވެ. ރައީސް ސޯލިހު ވިދާޅުވީ އަންނަ ހަފުތާ ތެރޭގައި 2017 ވަނަ އަހަރުން ފެށިގެން 2019 ވަނަ އަހަރަށްވާ 34 މިލިއަން ރުފިޔާގެ ކުލި ކައުންސިލްތަކަށް ދޫކުރައްވާނެ ކަމަށެވެ.

އަތޮޅު ފިހާރަތަކަށް ކުލީގެ ގޮތުގައި 2016 ގައި ސަރުކާރުން ދޫކޮށްފައި ވަނީ 17.9 މިލިއަން ރުފިޔާ އެވެ. ޖެހިގެން އައި އަހަރު 20.5 މިލިއަން ރުފިޔާ ވަނީ ދޫކޮށްފައެވެ.

އަތޮޅު ފިހާރަތައް ކައުންސިލްތަކަށް ދޫކޮށްލުމަކީ, ކައުންސިލްތައް މާލީ ގޮތުން އިތުރަށް ބާރުވެރިވާނެ ކަމެއްގެ ގޮތުގައި މިއަދު ކުރިއަށްދާ "ވިއަވަތި ރާއްޖެ" ކޮންފަރެންސްގައި ބައިވެރިވާ އަތޮޅު ކައުންސިލްތަކުގެ ގިނަ ރައީސުން ފާހަގަ ކުރެއްވިއެވެ.

ރައީސް ސޯލިހުގެ ރިޔާސީ ވައުދާ އެއްގޮތަށް ކައުންސިލުތަކަށް މާލީ ގޮތުން ބޮޑެތި ބާރު ތަކެއް ދީފައިވާއިރު އޭގެ ތެރޭގައި ދައުލަތުގެ އާމްދަނީގެ ފަސް ޕަސަންޓް ކައުންސިލްތަކަށް ހާއްސަ ކުރުމުގެ އިތުރުން ބިމާއި ރަށާއި ފަޅާއި ފަރު ފަދަ ތަންތަނުން ލިބޭ ކުލީގެ އާމްދަނީގެ 40 ޕަސެންޓު ކައުންސިލުތަކުން ދޫކޮށްލުން ހިމެނެއެވެ.