އީރާނާއެކު އެއްވެސް މަޝްވަރާއެއް ކުރިއަށް ނުދާ ކަމަށާއި، ހޮރްމޫޒް ކަނޑުއޮޅި އޮތީ އާންމު ދަތުރުފަތުރަށް ހުޅުވާލެވިފައި ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ. ނަމަވެސް، މުހިންމު މި ކަނޑުއޮޅި އަދިވެސް އޮތީ ބަންދުކޮށްފައި ކަމަށް އީރާނުން ދަނީ ބުނަމުންނެވެ.

ހަ މަސްދުވަހަށް ދެމިގެން ގޮސްފައިވާ ހަނގުރާމަ ނިމުމަކަށް ގެނައުމުގެ އުންމީދު ކުޑަވުމާ ގުޅިގެން ތެލުގެ އަގު ވަނީ އަނެއްކާވެސް އުފުލި، ހިއްސާގެ ބާޒާރުތަކަށް ވަނީ އަސަރުކޮށްފައެވެ.

Ad
rt

ހަނގުރާމަ މެދުކަނޑާލުމުގެ ވަގުތީ އެއްބަސްވުމުގެ މުއްދަތު ހޯމަ ދުވަހު ހަމަވެފައިވާއިރު، ޓްރަމްޕް ޓްރުތު ސޯޝަލްގައި ވިދާޅުވީ އީރާނާއެކު އެއްވެސް ވާހަކައެއް ނުދެކެވޭ ކަމަށާއި، އެމެރިކާގެ ނޭވަލް ބްލޮކޭޑް އަދިވެސް އެގޮތުގައި ކުރިއަށްދާ ކަމަށެވެ. އަދި ހޮރްމޫޒް ކަނޑުއޮޅީގައި އަޅާފައިވާ މައިންތައް ނައްތާލެވިފައިވާ ކަމަށްވެސް އޭނާ ވިދާޅުވިއެވެ. މިއާ ޚިލާފަށް، ޓްރަމްޕްގެ ޚާއްޞަ މަންދޫބު ޖެރެޑް ކުޝްނަރ ހޯމަ ދުވަހު ވިދާޅުވެފައިވަނީ ދެޤައުމުގެ ދެމެދުގައި ވަރުގަދަ މަޝްވަރާތަކެއް ކުރިއަށްދާ ކަމަށެވެ.

ހާލަތު ރަނގަޅުވަމުން އަންނަ ކަމަށް އެމެރިކާއިން ބުނި ނަމަވެސް، ސަރަހައްދުގެ ކަނޑުދަތުރުފަތުރަށް ހުރަސްއެޅުމުގެ އަމަލުތައް ދަނީ ހިނގަމުންނެވެ. އެގޮތުން ޔޫއޭއީގެ ޑިފެންސް މިނިސްޓްރީން ބުނީ އީރާނުން ފޮނުވާލި ދެ ބެލިސްޓިކް މިސައިލް ކަނޑަށް ވެއްޓިފައިވާ ކަމަށެވެ. މި ހާދިސާއާ ގުޅިގެން ޔޫއޭއީން ވަނީ އީރާނާއެކު ކުރާ ވިޔަފާރީގެ މުއާމަލާތްތައް މެދުކަނޑާލާފައެވެ. މީގެ އިތުރުން ޔޫކޭ މެރިޓައިމް ޓްރޭޑް އޮޕަރޭޝަންސްއިން ރިޕޯޓްކޮށްފައިވާ ގޮތުގައި ހޮރްމޫޒް ކަނޑުއޮޅިން ދަތުރުކުރި އުޅަނދަކަށް ހަމަލާއެއް އަރައި އިންޖީނު ރޫމަށް ވަނީ ގެއްލުން ލިބިފައެވެ.

އީރާނުގެ މަޖިލީހުގެ ރައީސް އަދި އިސް މަޝްވަރާވެރިޔާ މުހައްމަދު ބާޤިރު ޤާލީބާފް ވިދާޅުވީ، ޖޫން މަހު ވެވުނު ވަގުތީ އެއްބަސްވުމުގެ ޝަރުތުތަކަށް އެމެރިކާއިން އަމަލުނުކުރާހާ ހިނދަކު ކަނޑުއޮޅި ބަންދުކޮށްފައި ބާއްވާނެ ކަމަށެވެ. މީގެ ތެރޭގައި ދަތިކުރުމުގެ ފިޔަވަޅުތައް އުވާލުމާއި، ހިފަހައްޓާފައިވާ ފައިސާތައް ދޫކޮށްލުން ހިމެނެއެވެ.

އީރާނުގެ ރޫޙާނީ ލީޑަރުގެ މުޝީރު މުހައްމަދު މުޚްބަރް ވިދާޅުވީ، މަޝްވަރާއަށް އީރާނުން އަދިވެސް ތައްޔާރު ކަމަށާއި، ނަމަވެސް މަޝްވަރާއަކީ އަމާންދިނުން ނޫން ކަމަށެވެ. އަދި އަސްކަރީ ފިއްތުންތަކާއި ދަތިކުރުމުގެ ފިޔަވަޅުތަކުން އީރާނުގެ އަޒުމް ގުޑުވާނުލެވޭނެ ކަމަށް އޭނާ ފާހަގަކުރެއްވިއެވެ.

އެމެރިކާ އާއި އިސްރާއީލުން އީރާނަށް ދިން ހަމަލާތަކަށްފަހު ފެށުނު މި ހަނގުރާމައިގައި މިހާތަނަށް އެތައް ހާސް ބަޔަކު މަރުވެފައިވާއިރު، އެމެރިކާގެ އޮފިޝަލުން އިންޒާރު ދެނީ އީރާނުގެ އިގްތިސާދަށް އިތުރު ގެއްލުންތައް ދިނުމުގެ ފުރުސަތު އަދިވެސް އެބައޮތް ކަމަށެވެ.