1447 ވަނަ އަހަރުގެ ބަރަކާތްތެރި ރަމަޟާން މަހުގެ ފުރަތަމަ ދުވަހަކީ މި ހިނގާ ފެބުރުވަރީ މަހުގެ 19 ވާ ބުރާސްފަތި ދުވަސް ކަމުގައި، އޮމާން އާއި ތުރުކީ ހިމެނޭހެން ދުނިޔޭގެ 8 ގައުމަކުންނާއި ބައެއް ދީނީ މަޖިލިސްތަކުން މިއަދު ރަސްމީކޮށް އިޢުލާންކޮށްފިއެވެ.
ބައިނަލްއަގްވާމީ މީޑިއާ ރިޕޯޓުތައް ބުނާގޮތުގައި، މި ނިންމުންތައް ބިނާކޮށްފައިވަނީ ފަލަކީ ހިސާބުތަކާއި ހަނދު ބެލުމުގެ ރަސްމީ އުސޫލުތަކުގެ މައްޗަށެވެ. އެގޮތުން، ފެބުރުވަރީ 17 ވާ އަންގާރަ ދުވަހުގެ އިރުއޮއްސޭ ވަގުތު ހަނދު ނުފެންނާނެކަން ފަންނީ ގޮތުން ކަށަވަރުވުމާ ގުޅިގެން، ޝަޢުބާން މަސް 30 ދުވަހަށް ފުރިހަމަކުރުމަށް ވަނީ ނިންމާފައެވެ. އެހެންކަމުން، ފެބުރުވަރީ 18 ވާ ބުދަ ދުވަހަކީ ޝަޢުބާން މަހުގެ ފަހު ދުވަސް ކަމުގައި ބަލައި، ބުރާސްފަތި ދުވަހު ރޯދަ ހިފަން ފަށާނެއެވެ.
ފެބުރުވަރީ 19 ގައި ރޯދަ މަސް ފެށޭނެކަން އިޢުލާންކުރި ގައުމުތަކާއި ޖަމުޢިއްޔާތަކުގެ ތެރޭގައި ހިމެނެނީ:
މެދުއިރުމަތި: އޮމާން، ތުރުކީ
އޭޝިއާ: ސިންގަޕޫރު، މެލޭޝިއާ، ބުރުނާއީ، އިންޑޮނޭޝިއާ، ޖަޕާން، ފިލިޕީންސް
އޯޝޭނިއާ: އޮސްޓްރޭލިއާ (އޮސްޓްރޭލިއަން ފަތުވާ ކައުންސިލް)
ޔޫރަޕް: ފްރާންސް (ސީއެފްސީއެމް) އަދި ޔޫރަޕިއަން ކައުންސިލް ފޯ ފަތުވާ އެންޑް ރިސާޗް
ތާރީޚުތައް ތަފާތުވާ ސަބަބުއާންމު ގޮތެއްގައި ރަމަޟާން މަސް ފެށޭ ދުވަސް ކަނޑައަޅަނީ އައު ހަނދު ފެނުމުގެ މައްޗަށް ބިނާކޮށެވެ. ނަމަވެސް، ދުނިޔޭގެ އެކި ސަރަޙައްދުތަކަށް ހަނދު ފެންނަ ވަގުތާއި މޫސުމީ ޙާލަތު ތަފާތުވުމުން ތަފާތު އުސޫލުތައް ބޭނުންކުރެއެވެ. ތުރުކީ ފަދަ ގައުމުތަކުން ސައިންޓިފިކް ފަލަކީ ހިސާބުތަކަށް ބުރަވެ ކުރިއާލައި ތާރީޚު ކަނޑައަޅާއިރު، ސައުދީ އަރަބިއްޔާ އާއި ޔޫ.އޭ.އީ ފަދަ ގައުމުތަކުން ބޮޑަށް ބަލަނީ ލޮލަށް ހަނދު ފެނުމުގެ މައްޗަށެވެ.
ފަލަކީ ހިސާބުތަކުން ދައްކާ ގޮތުގައި ފެބުރުވަރީ 17 ވަނަ ދުވަހު އިރުއޮއްސުމުގެ ކުރިން ހަނދު އޮއްސޭނެތީ، ދުނިޔޭގެ ގިނަ ސަރަޙައްދުތަކަށް ހަނދު ފެނުމަކީ ފަންނީ ގޮތުން ނާދިރު ކަމެކެވެ. ނަމަވެސް، އުތުރު އެމެރިކާގެ ބައެއް އިދާރާތަކުން (މިސާލަކަށް އެފްސީއެންއޭ) ހަނދު ފެންނަ ވަގުތަށް ބަލައި ފެބުރުވަރީ 18 ވާ ބުދަ ދުވަހަކީ ރޯދަ މަހުގެ ފުރަތަމަ ދުވަސް ކަމަށް ވަނީ ކަނޑައަޅާފައެވެ.
ސައުދީ އަރަބިއްޔާގެ ސުޕްރީމް ކޯޓާއި ޔޫ.އޭ.އީގެ ހަނދު ބަލާ ކޮމިޓީން މިރޭ ބައްދަލުކުރާނެއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!