އޮސްޓްރޭލިއާގެ މުސްލިމުންގެ މުއްސަނދި ތާރީޚާއި ސަގާފީ ގުޅުންތައް ދައްކުވައިދޭ ޚާއްޞަ މައުރަޒެއް، "ބައުންޑްލެސް ޕްލެއިންސް: ދަ އޮސްޓްރޭލިއަން މުސްލިމް ކަނެކްޝަން" ގެ ނަމުގައި މާލޭގެ ނޭޝަނަލް އާޓް ގެލެރީގައި ހުޅުވައިފިއެވެ.

އާދީއްތަ ދުވަހު، 1 ފެބްރުއަރީ 2026 ގައި ރަސްމީކޮށް ހުޅުވި މި މައުރަޒަކީ އިސްލާމިކް މިއުޒިއަމް އޮފް އޮސްޓްރޭލިއާ (އައިއެމްއޭ) އާއި ދިވެހިރާއްޖޭގައި ހުންނަ އޮސްޓްރޭލިއާގެ ހައިކޮމިޝަން ގުޅިގެން އިންތިޒާމުކުރި ހަރަކާތެކެވެ.

Ad
rt

މި މައުރަޒުގެ މައިގަނޑު މަގްސަދަކީ އޮސްޓްރޭލިއާގައި ދިރިއުޅޭ މުސްލިމުންގެ ގިނަ ބަޔަކަށް ނޭނގި އޮތް ދިގު ތާރީޚަށް އަލިއަޅުވާލުމެވެ. އެގޮތުން ޔޫރަޕްގެ މީހުން އޮސްޓްރޭލިއާގައި ވަޒަންވެރިވުމުގެ މާ ކުރިން، 1700 ގެ އަހަރުތަކުން ފެށިގެން އޮސްޓްރޭލިއާގެ އުތުރުގެ އަސްލު ވަޒަންވެރިން ކަމަށްވާ 'ޔޮލްނޫ' މީހުންނާއެކު ވިޔަފާރިކުރި އިންޑޮނޭޝިއާގެ 'މަކަސަން' މަސްވެރިންގެ ވާހަކަތައް މި މައުރަޒުން ފެންނަން ހުންނާނެއެވެ.

މައުރަޒުގައި ހިމެނޭ މުހިންމު ބައިތަކުގެ ތެރޭގައި އޮސްޓްރޭލިއާގެ އެތެރެވަރި ހޯދުމުގައި މުހިންމު ދައުރެއް އަދާކުރި އަފްޣާނިސްތާނުގެ ޖަމަލު ދުއްވާ މީހުންނާއި، އުތުރުގެ މަލޭ ފަރުމަސްވެރިންގެ އިތުރުން ފަހުގެ ތާރީޚުތަކުގައި އެ ގައުމަށް ހިޖުރަކުރި މުސްލިމުންގެ ތަޖުރިބާތައް ހިމެނެއެވެ.

މީގެ އިތުރުން "އިންޑިއާ ކަނޑުގެ ގުޅުން" ތީމްގެ ދަށުން، ކަނޑުދަތުރުފަތުރާއި އިސްލާމީ އަގުތަކުގެ ސަބަބުން އޮސްޓްރޭލިއާ އާއި މުސްލިމް ދުނިޔެއާ ދެމެދު އޮތް ގަރުނުތަކީ ގުޅުންތައް ހާމަކޮށްދެއެވެ.

މި މައުރަޒު ބައްޓަންކޮށްފައިވަނީ ފޮޓޯގްރަފީއާއި، އަމިއްލަ ދިރިއުޅުމުގެ ވާހަކަތަކާއި، ތާރީޚީ ރެކޯޑްތަކުގެ މައްޗަށެވެ. މީގެ ބޭނުމަކީ މުސްލިމުންނާ މެދު މުޖުތަމައުގައި ހުންނަ ނުބައި ތަސައްވަރުތައް ނައްތާލައި، އޮސްޓްރޭލިއާގެ މުސްލިމުންގެ ދިރިއުޅުން އިންސާނީ ނަޒަރަކުން ދައްކުވައިދިނުމެވެ.

މައުރަޒު ހުޅުވުމުގެ ރަސްމިއްޔާތުގައި ވާހަކަދައްކަވަމުން އޮސްޓްރޭލިއާގެ ހައިކޮމިޝަނަރު ޑޭވިޑް ޖެސަޕް ވިދާޅުވީ، މިއަހަރުގެ އޮސްޓްރޭލިއާ ޑޭ އަޅުގަނޑުމެން ފާހަގަކުރީ އިސްލާމިކް މިއުޒިއަމް އާއި ހައިކޮމިޝަން ގުޅިގެން ތައްޔާރުކުރި މި މައުރަޒު ހުޅުވުމާއެކު ކަމަށެވެ. އަދި މިއީ ދެ ގައުމުގެ ދެމެދުގައި އޮތް ސަގާފީ ފާލަމެއް ކަމަށާއި، މީގެ ސަބަބުން ދެ ގައުމުގެ ދެމެދުގައި އޮތް އިހުތިރާމް އިތުރުވެގެންދާނެ ކަމަށް އޭނާ ފާހަގަކުރެއްވިއެވެ.