ފަލަސްތީނުގެ ޣައްޒާއަށް އިސްރާއީލުން ދެމުންގެންދާ ވަރުގަދަ ހަމަލާތަކުގައި އިއްޔެވެސް 42 ފަލަސްތީނުން ޝަހީދުވެފައިވާ ކަމަށް އެ ސަރަހައްދުގެ މީޑިއާތަކުން ރިޕޯޓްކޮށްފިއެވެ.
މި ހާދިސާގައި ޝަހީދުވި މީހުންގެ ތެރޭގައި ޑޮކްޓަރަކާއި އޭނާގެ ތިން ދަރިންވެސް ހިމެނެއެވެ.
މި ހަމަލާތަކުގެ ތެރެއިން އެންމެ ހިތާމަވެރި އެއް ހަމަލާއަކީ އިސްރާއީލުން "އިންސާނީ ސަރަޙައްދު" އެއްގެ ގޮތުގައި ކަނޑައަޅާފައިވާ އަލް-މަވާސީ ސަރަޙައްދުގައި ހުރި ޓެންޓަކަށް ދިން ހަމަލާއެކެވެ. މި ހަމަލާގައި ޑޮކްޓަރ މޫސާ ހަމްދާން ޚަފާޖާ އާއި އޭނާގެ ތިން ދަރިންވަނީ ޝަހީދުކޮށްލާފައެވެ.
ސުލްހަވެރިކަމަށް އެދި ހިމާޔަތް ހޯދަން މަސައްކަތްކުރާ ސަރަހައްދަކަށް މިފަދަ ބިރުވެރި ހަމަލާއެއް ދިނުމަކީ ބައިނަލްއަޤްވާމީ ޤާނޫނުތަކާއި ހިލާފު ޢަމަލެއް ކަމަށް ބައިނަލްއަޤްވާމީ ޖަމިއްޔާތަކުން ދަނީ ބުނަމުންނެވެ.
އޮކްޓޯބަރު 7 އިން ފެށިގެން ޣައްޒާއަށް ދެމުންގެންދާ ހަމަލާތަކުގައި ޝަހީދުވި ޞިއްޙީ މަސައްކަތްތެރިންގެ އަދަދު 1،580 އަށްވުރެ މައްޗަށް އަރާފައިވާ ކަމަށް ފަލަސްތީނުގެ ޞިއްޙީ ވުޒާރާއިން ބުނެއެވެ. މި އަދަދުތަކުގެ ތެރޭގައި 90 ޑޮކްޓަރުންނާއި 132 ނަރުހުން ހިމެނެއެވެ. މިއީ ސިއްހީ ހިދުމަތް ދިނުމުގައި ދިމާވެފައިވާ ގޮންޖެހުންތައް އިތުރުކުރާ ކަމެކެވެ.
ޣައްޒާގެ ހޮސްޕިޓަލްތަކުގެ ހާލަތު މިހާރު ވަނީ ނިހާޔަތަށް ދަށްވެފައެވެ. ތެލުގެ ދަތިކަމާއި، ކުޑަކުދިންގެ ކިރު ނުލިބުމުގެ ސަބަބުން ޞިއްޙީ ޚިދުމަތްތައް ދިނުމަށް ވަނީ ވަރަށް ބޮޑަށް ދަތިވެފައެވެ. މަދު ވަސީލަތްތަކާއެކު ގިނަ އަދަދެއްގެ މަރުވާ އާ އަދި ޒަޚަމްވާ މީހުންނަށް ފަރުވާދިނުމަކީ ޣައްޒާގެ ޞިއްޙީ ދާއިރާއަށް ކުރިމަތިވެފައިވާ ވަރަށް ބޮޑު ގޮންޖެހުމެކެވެ.
މި ހާލަތުގައި ހަމާސްއިން ވަނީ ހަނގުރާމަ ހުއްޓުވުމަށް މަޝްވަރާކުރުމަށް ތައްޔާރަށް ތިބިކަމަށް ބުނެފައެވެ. މިއީ މި ހަނގުރާމަ ނިމުމަކަށް ގެނައުމަށް އެޅިދާނެ ފުރަތަމަ ފިޔަވަޅެއްގެ ގޮތުގައި ބެލެވޭނެކަމަށް ބައިނަލްއަޤްވާމީ ފަރާތްތަކުން އުއްމީދުކުރެއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!