ރ. މަޑުއްވަރީ އިން ތިން މީހަކު ހައްޔަރުކޮށްފި

ރ. މަޑުއްވަރީގައި ފުލުހުން ކުރިއަށްގެންދާ އޮޕަރޭޝަނުގައި އެރަށުން ތިން މީހަކު ހައްޔަރުކޮށްފިއެވެ.

ހަރުކަށިފިކުރާ ދެކޮޅަށް ފުލުހުން ހިންގާ އެ އޮޕަރޭސަންސްގައި ރ. މަޑުއްވަރީއިން އިއްޔެ ހައްޔަރުކޮށްފައިވަނީ 22 އަހަރުގެ ފިރިހެނަކާއި 26 އަހަރުގެ ފިރިހެނެއްގެ އިތުރުން 28 އަހަރުގެ ފިރިހެނެކެވެ.

ފުލުހުންނާއި ކަމާބެހޭ އިދާރާތަކުން މަޑުއްވަރީގައި ހިންގާ އޮޕަރޭޝަނުގައި މީގެ ކުރިންވެސް ވަނީ ތިން މީހަކު ހައްޔަރުކޮށްފައެވެ. އެ ތިންމީހުންގެ ބަންދަށް މިދިޔަ މަހުގެ 28 ވަނަ ދުވަހު 10 ދުވަސް ޖަހާފައިވެއެވެ.

މަޑުއްވަރީގައި ހިންގާ އޮޕަރޭޝަނަކީ ހުސްވި 2019 ވަނަ އަހަރުގެ ޑިސެމްބަރުމަހުގެ 18 ވަނަ ދުވަހުން ފެށިގެން ކުރިއަށް ގެންދާ އޮޕަރޭޝަނެކެވެ. ހަރުކަށި ފިކުރު ފަތުރައި ވަކި ޖަމާޢަތް ހަދައިގެން އުޅޭ މީހުން ހޯދައި ދެނެގަތުމަށް ސަލާމަތީ ބާރުތަކުން ރ. މަޑުއްވަރީގައި ފެށި އޮޕަރޭޝަނުގައި އެދުވަހުވެސް 30 އަހަރުގެ ދިވެހި ފިރިހެނަކު އެރަށުން ހައްޔަރުކުރިއެވެ.