3 ބާޖު ވެލި ބޭރުކުރާކަމަށް ދެކެވޭ ވާހަކައަކީ ދޮގެއް، ދެނީ 25 ލޮރީ ވެލި: ފޯކައިދޫ ކައުންސިލް

އެރަށުން ވެލި ވިއްކާކަމަށް އެރަށު ރައްޔިތުން ގުޅުވަނީ، މިދިޔަ މަހުގެ 18 ވަނަ ދުވަހު ރައްޔިތުންގެ މަޖިލީހުގައި ޔޫތު މިނިސްޓަރު އަޙްމަދު މަހުލޫފު ދެއްކެވި ވާހަކަ އަކާއި ގުޅުވައެވެ.

މަހްލޫފް ވިދާޅުވެފައިވަނީ، ފުނަދޫ ފުޓުބޯޅަ ދަނޑުގެ މަސައްކަތަށް ބޭނުންވާ ވެލި އެރަށުން ނުލިބުމުގެ ސަބަބުން އެހެން ރަށަކުން 1.7 މިލިއަން ރުފިޔާ ދީފައި ވެލި ގަނެގެން ފުނަދޫއަށް ގެންގޮސްގެން އެމަސައްކަތްކުރަން ޖެހިފައިވާ ކަމަށެވެ.

"އަޅުގަނޑުމެން އެކި ގޮތްގޮތުން މަސައްކަތް ކޮށްފިން ނަމަވެސް އެ ފުރުސަތު ނުލިބިގެން އެންމެފަހުން 1.7 މިލިއަން ރުފިޔާ ދީގެން އެހެން ރަށަކުން ވެލި ފުނަދޫއަށް ގެންގޮސްގެން އެކަން ކުރަން ޖެހިފައިވަނީ،"

މިނިސްޓަރު މަހުލޫފު ވިދާޅުވިއެވެ.

ރައްޔިތުންގެ ކަންބޮޑުވުމަކަށް ވެފައިވަނީ، އެ ރަށުގެ ބަނދަރު ފުންކުރުމުގެ މަސައްކަތް ކުރިއިރު އެރަށަށް އަރުވާފައިވާ ވެލި ފަސްގަނޑުން ވެލި ނަގައިގެން ށ. ފުނަދޫއަށް ގެންދަން ހުއްދަދީފައިވާކަމަށް ބުނެއެވެ.

1.7 މިލިއަން ރުފިޔާ ދީގެން ވެލި ގެންދަންޖެހޭކަމަށް މިނިސްޓަރު ވިދާޅުވެފައިވާއިރު އެ ވެއްޔަކީ ވިއްކާ ވެލި ނޫން ކަމަށާއި، މިދަނޑިވަޅަކީ ވެލީގެ ބޭނުން އެރަށު ރައްޔިތުންނަށްވެސް ބޮޑުވެފައިވާ ދަނޑިވަޅެއްކަމަށް ފޯކައިދޫ މީހުން ބުނެއެވެ. އަދި އެ ރަށު ރައްޔިތުންގެ ބަހެއް ހޯދުމެއް ނެތި ރަށުގައި ހުރި ފަސްގަނޑަކުން ފަސް ނަގައިގެން ފުނަދޫއަށް ގެންދާތީ އެ ރަށުގެ ރައްޔިތުން ތިބީ ވަރަށް ބޮޑަށް ނުރުހިފަ އެވެ.