ރައީސް ވެކްސިންގެ 2 ޑޯޒް ފުރިހަމަކުރައްވައިފި

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ކޮވިޑް ވެކްސިންގެ ދެވަނަ ޑޯޒް ޖައްސަވައިފިއެވެ.

ރައީސުލްޖުމްހޫރިއްޔާ "ކޮވިޝީލްޑް" ވެކްސިންގެ ދެ ވަނަ ޑޯޒް ޖައްސަވާފައި ވަނީ މިއަދު އެވެ. ރައީސް ވެކްސިން ޖެއްސެވީ މޯލްޑިވްސް ސެންޓަރ ފޮރ ސޯޝަލް އެޑިއުކޭޝަންގައި ކުރިޔަށްދާ ވެކްސިން ސެންޓަރަށް ވަޑައިގެންނެވެ.

ވެެކްސިން ޖެއްސެވުމަށްފަހު އެ މަނިކުފާނު ވަނީ ފުރަތަމަ ވެކްސިން ޖެހިތާ 8 ހަފްތާވެފައިވާ ފަރާތްތަކުން ވެކްސިންގެ ދެވަނަ ޑޯޒް ޖެހުމަށް އެދިވަޑައިގަންނަވާފައެވެ. އަދި، ކޮވިޑްގެ ބަލިމަޑުކަމުން ސަލާމަތްވެވޭނީ ހުރިހާ ފަރާތްތަކެއްގެ އެއްބާރުލުމާއެކުކަމަށް އެމަނިކުފާނު ފާހަގަކުރެއްވިއެވެ.

ރައީސުލްޖުމްހޫރިއްޔާ ކޮވިޝިލްޑް ވެކްސިންގެ 2 ޑޯޒް ފުރިހަމަކުރައްވާފައިވާއިރު، ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުވެސްވަނީ ކޮވިޝިލްޑް ވެކްސިންގެ ދެވަނަ ޑޯޒް މިއަދު ޖައްސަވާފައެވެ. ރައީސް ނަޝީދު ވެކްސިންގެ ދެވަނަ ޑޯޒް ޖައްސަވާފައިވަނީ ސެނެހިޔާ ހޮސްޕިޓަލުންނެވެ.

"ކޮވިޑް-19 ދިފާޢު" ކެމްޕޭން ފެބުރުވަރީ މަހުގެ ފުރަތަމަ ދުވަހު ރަސްމީގޮތުން ފައްޓަވައިދެއްވާފައި ވަނީ ރައީސުލްޖުމްހޫރިއްޔާއެވެ. އަދި ހަމަ އެ ދުވަހު އެމަނިކުފާނު ވަނީ ކޮވިޑް ވެކްސިންގެ ފުރަތަމަ ޑޯޒް ޖައްސަވާފައެވެ. ކޮވިޑް ވެކްސިންގެ ދެވަނަ ޑޯޒް ދިނުން ރާއްޖޭގައި ފަށާފައި ވަނީ އެޕްރީލް 3 ވަނަ ދުވަހު އެވެ.

Got my second shot of Covishield vaccine today. If eight weeks have passed since your first shot, please go get your second dose now.

Those who haven’t got their first dose of vaccine, please go and get your shot now. Together we can beat COVID19. #AaUmmeedhu#COVID19Dhifaau pic.twitter.com/5Xn0zxsr4s

— Ibrahim Mohamed Solih (@ibusolih) April 5, 2021

ވެކްސިން ޖެހުމަށް މާލޭ ސަރަޙައްދުގައި 9 ސެންޓަރެއް ޤާއިމުކޮށްފައިވާއިރު ދެ މޮބައިލް ޓީމުވެސް ވެކްސިން ޖެހުމުގައި ހަރަކާތްތެރިވެއެވެ. އަތޮޅުތަކުގައި 237 ވެކްސިން ސެންޓަރު ޤާއިމުކޮށްފައިވެއެވެ.

ކޮވިޑް ވެކްސިންގެ ފުރަތަމަ ޑޯޒް މިހާތަނަށް 246،896 އަށްވުރެ ގިނަ މީހުން ޖަހާފައި ވާއިރު، ވެކްސިންގެ ދެ ވަނަ ޑޯޒް އިއްޔެއާ ހަމައަށް 3،737 މީހަކު ޖަހާފައިވެއެވެ.

ރާއްޖޭގައި ކޮވިޑް-19އާ ދެކޮޅަށް ބޭނުންކުރުމަށް މިހާރު ކޮވިޝީލްޑްގެ އިތުރުން ސިނޮފާރމް ވެކްސިންއާއި، ފައިޒާ ވެކްސިން ބޭނުންކުރުމަށް މޯލްޑިވްސް ފުޑް އެންޑް ޑްރަގްއޮތޯރިޓީން ވަނީ ހުއްދަދީފައެވެ.