"ކޯވިޑް-19" ފެތުރެމުންދާ މި ނާޒުކު ޙާލަތުގައި، ޢާންމު ދިރިއުޅުމަށް އެނބުރި ރުޖޫޢަވެ، ދިރިއުޅުމުގެ އައު އާދަތަކަށާއި، އައު ވައްޓަފާޅިއަކަށް ވާޞިލުވުމަށް ކުރަމުން އަންނަ މަސައްކަތްތައް މިވަނީ، ތަފާތު އެކި މަރުޙަލާތަކަކަށް ބަހާލެވިފައި. މިގޮތުން ތިރީގައި ބަޔާންކުރެވިފައި އެވަނީ، މިހާރު ޢަމަލުކުރަމުންދާ ފުރަބަންދުގެ ޙާލަތަށް، 1 ޖުލައި 2020 އިން ފެށިގެން ލުއިދިނުމަށް ހަމަޖެހިފައިވާ ގޮތުގެ ތަފްޞީލް.
ފުރަބަންދުގެ ޙާލަތަށް ދެވުނު ލުއިތަކާއިއެކު ކުރިޔަށް ދިޔުމާއި، އައު ޢާންމު ޙާލަތުގައި ރައްކާތެރިވުމުގެ ގޮތުން ޢަމަލުކުރާނެ ގޮތް
- ގްރޭޓަރ މާލެ ސަރަޙައްދުގައި ޢާންމުކޮށް މަގުތަކުގައި އުޅުމަށް ކަނޑައެޅިފައިވާ ގަޑިއަކީ، ކުރިއެކޭ ވެސް އެއްގޮތަށް ކޮންމެ ދުވަހެއްގެ ވެސް ފަތިހު 5:00 އިން ރޭގަނޑުގެ 11:00 އާ ދެމެދު.
- ޢާންމު ތަންތާގައި އެއްވެ އުޅެވޭނީ، އެއްފަހަރާ 30 މީހުންނަށްވުރެ ގިނަ ނުވާ ގޮތަށް.
- ބޭރަށް ނުކުމެވޭ ގަޑިތަކުގައި ކުރިޔާ ޚިލާފަށް ވަކި ބަޔަކަށް ވަކި ގަޑިއެއް ޚާއްޞަކުރެވިގެނެއް ނުވޭ.
- ނަމަވެސް އެންމެ ރަނގަޅު ގޮތަކީ ޒަރޫރީ ބޭނުންތަކުގައި މެނުވީ ބޭރުގައި ނޫޅުން.
- ބޭރަށް ނުކުންނަ ނަމަ، އެކަކު އަކެކަކާއި ދެމެދުގައި މަދުވެގެން 3 ފޫޓޫގެ ގައިދުރުކަން ބެހެއްޓުން.
- ރަނގަޅަށް ވައި ދައުރުނުވާ ގޮތަށް ހުންނަ ބަންދު ތަންތަނާއި، ޚިދުމަތް ދޭ އައުޓްލެޓްތަކުގައާއި، ގިނައިން މީހުން އެއްވެ އުޅޭ ތަންތަނުގައި މާސްކް އެޅުން
- ގިނަ ގިނައިން ސައިބޯނި ލައިގެން ރަނގަޅަށް އަތް ދޮވުން ނުވަތަ ސެނިޓައިޒްކުރުން.
- ކެއްސާ ކިނބިހި އަޅާއިރު އަނގަޔާއި ނޭފަތް ނިވާކުރުން.
- ބަލިވެ އުޅޭނަމަ ބޭރަށް ނުގޮސް ގޭގައި މަޑުކުރުން.
- ހުންއައިސް، ކެއްސާ، ބޮލުގައި ރިއްސާ، ނޭވާލާން އުނދަގޫވުން ފަދަ އެއްވެސް ޢަލާމާތެއް ފެންނަ ނަމަ ލަސްނުކޮށް ފްލޫ ކްލިނިކަކަށް ދިއުން.
ޖުލައި މަހުގައި ލުއިދެވޭއިރު މަނާކުރެވިފައިވާ ކަންކަން
- ކޯވިޑް-19 ގެ ބަލިމަޑުކަން ފެނިފައިވާ އެއްވެސް ރަށެއްގައި 12 އަހަރުން ދަށުގެ ކުދިން ސްކޫލް، ޓިއުޝަން ކްލާސް އަދި ޑޭކެއަރ ފަދަ ތަންތަނަށް ގެންދިޔުން މަނާ.
- ކުޅިވަރު އެކެޑެމީތަކާއި، ގިނަ ކުދިން އެއްވެގެން ބާއްވާ ޙަރަކާތްތައް ހިންގުން މަނާ.
- ގިނަ މީހުން އެއްވެގެން ބާއްވާ ޕާޓީތަކާއި، އަދި ރެލީ ފަދަ ޙަރަކާތްތައް ހިންގުން މަނާ.
- ކޯވިޑް-19 ގެ ބަލިމަޑުކަން ފެނިފައިވާ އެއްވެސް ރަށެއްގައި ގެސްޓް ހައުސް ވިޔަފާރި ހިންގުން މަނާ.
ރަށްތަކުގެ މެދުގައި ދަތުރުފަތުރުކުރުން
- ދަތުރުފަތުރުކުރުމުގައި އެޗް.ޕީ.އޭ އިން ނެރެފައިވާ ރައްކާތެރިކަމާއެކު ދަތުރުފަތުރުގެ ޚިދުމަތް ފޯރުކޮށްދިނުމުގައި ޢަމަލުކުރަންޖެހޭގޮތުގެ އުޞޫލާ އެއްގޮތަށް ޢަމަލުކުރުން.
- ކޯވިޑް-19 ފެނިފައިނުވާ ރަށްތަކުގެ މެދުގައި، ފެރީގެ ޚިދުމަތް ދިނުމާއި، ޢާންމު އުޞޫލުން ދަތުރުފަތުރު ކުރުމުގައި ކުރިޔެކޭ ވެސް އެއްގޮތަށް އެއްވެސް ހުރަހެއް ނެތް.
- ކޯވިޑް-19 ފެނިފައިވާ ރަށްރަށުގައި ޢަމަލުކުރަންވީ ގޮތް:
- އެހެން ރަށްރަށުން ގްރޭޓަރ މާލެ ސަރަޙައްދަށް ދަތުރު ކުރުމަށް އެއްވެސް ހުރަހެއް ނެތް.
- ފުރަބަންދުގެ ޙާލަތުގެ ސަބަބުން ގްރޭޓަރ މާލެ ސަރަޙައްދުގައި ތިބި، އެހެން ރަށްރަށުގައި ދިރިއުޅޭ މީހުން، އެމީހުންގެ ރަށަށް އަނބުރާ ދިޔުމުގައި ޢަމަލުކުރެވޭނީ މިހާރު ވެސް ޢަމަލުކުރަމުން އަންނަ އުޞޫލުން. އަދި، މާލެއިން ނުވަތަ ކޯވިޑް-19 ގެ ބަލިމަޑުކަން ފެނިފައިވާ ރަށަކުން އެނބުރި ދާ ރަށަކަށް ދިޔުމަށް ފަހު، އެމީހަކު ހުންނަން ހަމަޖެހިފައިވާ ގެއެއްގައި، 14 ދުވަސް ހަމަވަންދެން ގޭގައި ކަރަންޓީން ގައި ހުންނަންވާނެ.
ސައިހޮޓާ، ކެފޭ، ރެސްޓޯރަންޓްތައް
- ސައިހޮޓާ، ކެފޭ، ރެސްޓޯރަންޓް ފަދަ ތަންތަނުން ޑެލިވަރީ (ހެނދުނު 9 އަކުން ރޭގަނޑު 11 އަށް) އަދި ޓޭކްއަވޭ ޚިދުމަތް ދިނުން ކުރިއެކޭ ވެސް އެއްފަދައިން ކުރިޔަށް ގެންދިޔުން.
- ޖުލައި 1 ވަނަ ދުވަހުން ފެށިގެން ސައިހޮޓާ، ކެފޭ، ރެސްޓޯރަންޓް ފަދަ ތަންތަނުގެ އެތެރޭގައި ތިބެގެން ކެއިންބުއިމުގެ ޚިދުމަތް (ހެނދުނު 9 އަކުން ރޭގަނޑު 10 އަކަށް) ދިނުމަށް ހުޅުވައިލުން.
- ސައިހޮޓާ، ކެފޭ، ރެސްޓޯރަންޓް ފަދަ ތަންތަން ހިންގުމުގައި ޢަމަލުކުރަން ޖެހޭނީ އެޗް.ޕީ.އޭ އިން ކަނޑައަޅާފައިވާ އުޞޫލާ އެއްގޮތަށް.
- ސައިހޮޓާ، ކެފޭ، ރެސްޓޯރަންޓްތަކުގެ ޚިދުމަތް ދިނުމުގައި އެއްފަހާރާ އެތަނަކަށް ވަދެވޭނެ މީހުންގެ ޢަދަދު ފެންނަ ގޮތަށް ދޮރުމަތީގައި ބެހެއްޓުން. އަދި، 3 ފޫޓުގެ ގައިދުރުކަން ހިފެހެއްޓޭ މިންވަރަށް މީހުންނަށް ތިބެވޭގޮތަށް އެތަންތަނުގެ އެތެރޭގެ އިންތިޒާމް ހަމަޖެއްސުން.
- އެތެރޭގައި ޚިދުމަތް ހޯދާއިރު މާސްކް އެޅުން.
މިސްކިތްތައް
- ގްރޭޓަރ މާލެ ސަރަޙައްދުގެ މިސްކިތްތަކުގައި ޖަމާޢަތުގައި ނަމާދުކުރުމާއި ގުޅޭގޮތުން އެކުލަވާލައިފައިވާ އުޞޫލު މިނިސްޓްރީ އޮފް އިސްލާމިކް އެފެއަރޒް އިނ ވަނީ އިޢުލާންކޮށްފައި.
- މިސްކިތްތައް ބޭނުންކުރަން ވާނީ އިސްލާމިކް މިނިސްޓްރީން މިކަމާ ގުޅޭގޮތުން ކަނޑައަޅާފައިވާ އުޞޫލާ އެއްގޮތަށް.
ސަރުކާރުގެ އޮފީސްތައް
- ރައީސުލްޖުމްހޫރިއްޔާގެ އޮފީހުން ނިންމަވާ އުޞޫލެއްގެ ދަށުން ސަރުކާރު އޮފީސްތައް ހުޅުވައިލުން.
- ސަރުކާރު އޮފީސްތަކުގެ ވަޒީފާގެ މާޙައުލު ހުންނަންވާނީ އެޗް.ޕީ.އޭގެ ގައިޑްލައިން އޮން ވޯކްޕްލޭސް ސޭފްޓީ އާއި އެއްގޮތަށް.
ޕްރައިވެޓް އޮފީސްތައް
- ޕްރައިވެޓް އޮފީސްތަކާއި، ޕްރައިވެޓް ކުންފުނިތައް ހުޅުވުމުގައި ވަޒީފާގެ މާޙައުލު ހުންނަންވާނީ އެޗް.ޕީ.އޭގެ ގައިޑްލައިން އޮން ވޯކްޕްލޭސް ސޭފްޓީ އާއި އެއްގޮތަށް.
ބޭންކްގެ ޚިދުމަތްތައް
- ޖުލައި މަހުގެ 1 ވަނަ އަދި 2 ވަނަ ދުވަހުގައި އެމްއެމްއޭ އާއި ބޭންކްތަށް ހުޅުވާލައިފައި ހުންނާނީ ހެނދުނު 9.30 އިން މެނދުރުފަހު 14:00 އަށް.
- ކުރިޔަށް އޮތް ދުވަސްތަކުގައި އެޗް.ޕީ.އޭ ގެ އުޞޫލުތަކާއި އެއްގޮތަށް މިތަންތަން ހިންގުމުގައި ޢަމަލުކުރާނެ ގޮތުގެ އުޞޫލު އިޢުލާނުކުރެވޭނެ.
ތަޢުލީމީ ދާއިރާ
ކޯވިޑް-19 ފެނިފައިވާ ރަށްރަށުގައި ކިޔެވުން:
- ކީ ސްޓޭޖް 4 އަދި 5 (ގްރޭޑް 9-12) ގެ ދަރިވަރުންނަށް ސްކޫލްތައް ހުޅުވައިލުން. (ސްކޫލްތައް ހިންގާނެ ގޮތް ކަނޑައަޅާނީ އެޑިއުކޭޝަން މިނިސްޓްރީއާއި ސްކޫލްތަކާ ގުޅިގެން)
- މި ކީ ސްޓޭޖްތަކުގެ ދަރިވަރުން ސްކޫލަށް ހާޒިރުވި ކަމުގައިވިޔަސް ޓެލިކްލާހާއި، އޮންލައިން ގޫގްލް ކްލާސް ވެސް ކުރިޔަށްގެންދިޔުން.
- ކޮންމެ ސެޝަނެއް ކުރިޔަށް ގެންދެވޭނީ 4 ގަޑިއިރު.
- ދަރިވަރުން ސްކޫލަށް ހާޒިރުވެގެން ކިޔަވަންޖެހޭނީ ހަފްތާއަކު 4 ދުވަހު. (ޖުލައި 1 ގައި ސްކޫލް ހުޅުވޭއިރު – ސެޝަން ވަގުތު ބަދަލުވުން އެކަށީގެންވޭ)
- ދަރިވަރުން އަދި ސްކޫލްގައި މަސައްކަތްކުރާ އެންމެހާ މުވައްޒަފުންވެސް މާސްކް އެޅުން.
- ސްކޫލަށް ވަންނަން ހުންނަ ޕޮއިންޓްތަކުގައި ޓެމްޕަރޭޗަރ ބަލައި ސްކްރީންކުރުން.
- ސްކޫލް އެސެމްބްލީތަކާއި، އިތުރު ޙަރަކާތްތައް ހިންގުން މަނާ.
- މަދުވެގެން އެކަކު އަނެކަކާ ދެމެދުގައި 3 ފޫޓުގެ ގައިދުރުމިން ފަރިތަކުރުން.
- ސްކޫލްގައި އަތް ދޮވެވޭނެ/ ސެނިޓައިޒް ކުރެވޭނެ އިންތިޒާމް ހަމަޖެހިފައި ހުރުން.
- ކޮންމެ ސެޝަންއެއް ނިންމާލުމަށްފަހު ޤަވައިދުން ކްލާސްރޫމްތައް ޑިސްއިންފެކްޓްކުރުން.
- ކޮންމެ ދުވަހަކު އެއްފަހަރު ކްލާސްރޫމްތައް ސާފުކުރުން.
- ހަފްތާ ބަންދުގައި ކްލާސްރޫމްތައް 'ޑީޕް ކްލީން' ކުރުމަށްފަހު ޑިސްއިންފެކްޓްކުރުން.
- ފައުންޑޭޝަން ސްޓޭޖުން ފެށިގެން ކީ ސްޓޭޖް 3 (ޕްރީ ސްކޫލުން ފެށިގެން ގްރޭޑް 8 ގެ ދަރިވަރުން) ސްކޫލަށް ހާޒިރުނުވި ކަމުގައިވިޔަސް ޓެލިކްލާހާއި، އޮންލައިން ގޫގްލް ކްލާހުގައި ބައިވެރިވުން.
- އައިސޮލޭޝަން، ކަރަންޓީން، އަދި އިތުރު ސަބަބަކާއި ހުރެ ސްކޫލަށް ހާޒިރުވާން އުޒުރުވެރިވާ ނަމަ ޓެލިކްލާހާއި، އޮންލައިން ގޫގްލް ކްލާހުގައި ބައިވެރިވުން.
- އެޑިއުކޭޝަން މިނިސްޓްރީއިން ކަނޑައަޅާ އުޞޫލާ އެއްގޮތަށް ސެން ކްލާހުގައި ދަރިވަރުންނަށް ކިޔަވާ ދިނުން. ކޯވިޑް-19 ފެނިފައިނުވާ ރަށްރަށުގައި ކިޔެވުން:
- ކީ ސްޓޭޖް 1 އިން ފެށިގެން 5 (ގްރޭޑް 1-12) ގެ ދަރިވަރުންނަށް ސްކޫލްތައް ހުޅުވައިލުން. (ސްކޫލްތައް ހިންގާނެ ގޮތް ކަނޑައަޅާނީ އެޑިއުކޭޝަން މިނިސްޓްރީއާއި ސްކޫލްތަކުން ގުޅިގެން)
މަތީ ތަޢުލީމާއި ތަމްރީން ދިނުން
- މިނިސްޓްރީ އޮފް ހަޔަރ އެޑިޔުކޭޝަނުން ކަނޑައަޅާ އުޞޫލާ އެއްގޮތަކަށް ކިޔެވުން ކުރިޔަށް ގެންދިއުން.
- މަރުކަޒަށް ކިޔަވައިދޭ ޓީޗަރުން، މުވައްޒަފުން އަދި ދަރިވަރުން ޙާޒިރުވާނަމަ، މާސްކް ބޭނުންކުރުމުގައި ހެލްތް ޕްރޮޓެކްޝަން އެޖެންސީގެ 'މާސްކް އެޅުމުގައި ޢަމަލުކުރާނެ ގޮތުގެ އެޞޫލާ' އެއްގޮތަށް ޢަމަލުކުރުން.
- އެކަކު އަނެކަކާއި ދެމެދުގައި މަދުވެގެން 3 ފޫޓޫގެ ގައިދުރުކަން ހިފެހެއްޓުން.
ކުޅިވަރު އަދި ރިކްރިއޭޝަން
- ޖުލައި 1 ވަނަ ދުވަހުން ފެށިގެން މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓްއިން ކަނޑައަޅާފައިވާ އުޞޫލާއި އެއްގޮތަށް ޓީމް ކުޅިވަރުތައް ކުރިޔަށް ގެންދިއުން.
ޖިމް އަދި ފިޓްނަސް ސެންޓަރުތައް
- އެޗް.ޕީ.އޭ އިން ކަނޑައަޅާފައިވާ ކޯވިޑް-19 އާ ގުޅިގެން ޖިމް އަދި ފިޓްނަސް ސެންޓަރުތަކުގައި ޢަމަލުކުރަންވީ ގޮތުގެ އުޞޫލާ އެއްގޮތަށް މި ތަންތަން ކުރިޔަށް ގެންދިޔުމަށް ހުޅުވައިލުން.
ފަތުރުވެރިކަން
- ރިޒޯޓްތައް:
- ޖުލައި 15 ވަނަ ދުވަހުން ފެށިގެން ފަތުރުވެރިކަމަށް ރިޒޯޓްތައް ހުޅުވައިލުން.
- ރިޒޯޓްތައް ހިންގުމުގައި ޢަމަލުކުރަން ޖެހޭނީ މިނިސްޓްރީ އޮފް ޓޫރިޒަމުން ނެރެފައިވާ ގައިޑްލައިން ފޮރ ރީސްޓާޓިންގ ޓޫރިޒަމް އިން މޯލްޑިވްސް އާއި އެއްގޮތަށް.
- ގެސްޓް ހައުސްތައް:
- ޖުލައި 1 ވަނަ ދުވަހުން ފެށިގެން ކޯވިޑް-19 ފެނިފައިނުވާ ރަށްތަކުގެ ގެސްޓްހައުސްތައް ދިވެހިރާއްޖޭގައި ދިރިއުޅޭ މީހުންނަށް ހުޅުވައިލެވޭނެ.
- މި ރަށްތަކަށް ދަތުރުކުރެވޭނީ ޢާންމުންގެ ތެރެއިން ކޯވިޑް-19 ފެނިފައިނުވާ ރަށްރަށުގެ މީހުންނަށް.
- ބޭރުގެ ފަތުރުވެރިންނަށް ގެސްޓްހައުސްތަށް ހުޅުވައިލެވޭނީ އޮގަސްޓް މަހުގެ ތެރޭގައި.
އެއަރޕޯރޓް
ޑޮމެސްޓިކް އެއަރޕޯރޓް:
- ކޯވިޑް-19 ފެނިފައިނުވާ ރަށްތަކުގެ މެދުގައި، އެއް ރަށުން އަނެއް ރަށަށް ދަތުރުކުރުމަށް އެއަރޕޯރޓްތަކުގައި ޢަމަލުކުރަމުންދާނީ މިހާރުވެސް ޢަމަލުކުރަމުންދާ އުޞޫލާއި އެއްގޮތަށް.
- ދަތުރުކުރުމުގައި މާސްކްއެޅުމާއި، މަދުވެގެން 3 ފޫޓޫގެ ގައިދުރުކަން ހިފެހެއްޓުން. އިންޓަރނޭޝަނަލް އެއަރޕޯރޓް:
- ބައިނަލްއަޤްވާމީ ދަތުރުތަކަށް ބައިނަލްއަޤްވާމީ ވައިގެ ބަނދަރުތައް ހުޅުވިގެންދާނީ ޖުލައި މަހުގެ 15 ވަނަ ދުވަހުން ފެށިގެން.
- ދަތުރުކުރުމުގައި މާސްކްއެޅުމާއި، މަދުވެގެން 3 ފޫޓޫގެ ގައިދުރުކަން ހިފެހެއްޓުން.
- އިންޓަރނޭޝަނަލް އެއަރޕޯޓް ހިންގުމުގައި އެޗް.ޕީ.އޭ އިން ކަނޑައަޅާފައިވާ އުޞޫލު (ރެސްޕޮންސް ޤައިޑްލައިން ފޮރ ދި ޕޮއިންޓްސް އޮފް އެންޓްރީ) އާ އެއްގޮތަށް ޢަމަލުކުރުން.
ޕޯރޓް އޮފް އެންޓްރީ
- ޕޯރޓްތައް ހުޅުވައި ހިންގުމުގައި އެޗް.ޕީ.އޭ އިން ކަނޑައަޅާފައިވާ އުޞޫލު (ރެސްޕޮންސް ޤައިޑްލައިން ފޮރ ދި ޕޮއިންޓްސް އޮފް އެންޓްރީ) އާ އެއްގޮތަށް ޢަމަލުކުރުން.
ސްޕާ، ސެލޫންތަކާއި ބޯކޮށާ ތަންތަން
- ޖުލައި 1 ވަނަ ދުވަހުން ފެށިގެން ބޯކޮށާ ތަންތަނާއި، ސެލޫން އަދި ސްޕާތައް ހުޅުވައިލުން.
- މިފަދަ ތަންތަން ހިންގުމުގައި ޢަމަލުކުރަންވާނީ އެޗް.ޕީ.އޭގެ ގައިޑްލައިނާ އެއްގޮތަށް.
- ބޯކޮށާ ތަންތަނާއި، ސެލޫން އަދި ސްޕާތައް ހިންގުމުގައި އެއްފަހަރާ އެތަނަކުން ޚިދުމަތް ފޯރުކޮށްދެވޭނެ މީހުންގެ ޢަދަދު ބޭރުގައި ފެންނަގޮތަށް ބެހެއްޓުން. އަދިމަދުވެގެން 3 ފޫޓޫގެ ގައިދުރުކަން ހިފެހެއްޓޭނެގޮތަކަށް އިންތިޒާމް ހަމަޖެއްސުން. އަދި މިތަންތަނުގެ އެތެރޭގައި ޚިދުމަތް ހޯދުމުގައި މާސްކް އެޅުން.