‏މާފުށީ ޖަލުގައި ހަމަ ނުޖެހުމެއް ހިނގައި، ޤައިދީއަކަށާއި 2 އޮފިސަރަކަށް އަނިޔާވެއްޖެއެވެ.

މޯލްޑިވްސް ކަރެކްޝަނަލް ސާރވިސަސްއިން ކުރި ޓުވީޓެއްގައި ބުނީ މާފުށީ ޖަލުގެ ޔުނިޓު 9 ގައި ތިބި ޤައިދީންނަށް މިރޭ ކާންދިނުމަށްޓަކައި ޔުނިޓު ހުޅުވި ވަގުތު ބައެއް ޤައިދީން ވަނީ ގަދަކަމުން ޔުނިޓުން ނުކުމެފައި ވާކަމަށެވެ.

Ad
rt

އެ ހާދިސާގައި ޤައިދީއަކަށާއި 2 އޮފިސަރަކަށް ވަނީ އަނިޔާވެފައި ވާކަމަށާއި، ހާލަތު ވަނީ ކޮންޓުރޯލު ކުރެވިފައި ކަމަށްވެސް ކަރެކްޝަންސްއިން ބުންޏެވެ.

ކޮމިޝަނަރ އޮފް ޕްރިޒަންސް އަޙްމަދު މުޙައްމަދުފުޅު ކުރެއްވި ޓުވީޓެއްގައި ވިދާޅުވެފައިވަނީ މާފުށީގައި މިރޭ ހިނގި ހާދިސާއާއި ގުޅިގެން ހޯމް މިނިސްޓަރު އިމްރާނާއެކު، މާފުށި ޖަލަށް ދަތުރު ކުރަށްވަމުން ދާކަމަށެވެ.

‏ކޯވިޑް-19 އާ ގުޅިގެން، ރައީސުލްޖުމްހޫރިއްޔާ އަދަބު ލުއިކޮށްދެއްވާފައި ވާ 105 ޤައިދީން، އިއްޔެގެ ނިޔަލަށް މިނިވަންވެފައި ވާތީ މޯލްޑިވްސް ކަރެކްޝަނަލް ސަރވިސްއިން އެ ފަރާތްތަކު ގެތަކަށް ގެންފޮސްދީފައި ވާކަމަށް ކަރެކްޝަންސްއިން ވަނީ ކުރިން ބުނެފައެވެ.