އެމެރިކާގެ ރައީސް ޑޮނަލްޑް ޓްރަމްޕްގެ ރިޔާސީ ދައުރު 2029 ވަނަ އަހަރު ނިމެންދެން، އެ ގައުމުގެ ސަރުކާރާއެކު އެއްވެސް ސީދާ މަޝްވަރާއެއް ނުކުރުމަށް އީރާނުން ނިންމައިފިއެވެ.
އީރާނުގެ އިސް އޮފިޝަލުން ވިދާޅުވާ ގޮތުގައި، އެމެރިކާއާއެކު ސީދާ ވާހަކަތައް ދެއްކޭނީ އީރާނުން ހުށަހަޅާފައިވާ ޝަރުތުތަކެއް ފުރިހަމަވުމުންނެވެ.
އީރާނުގެ ފޮރިން މިނިސްޓަރު އައްބާސް އަރަގްޗީ އާއި ޚާރިޖީ ވުޒާރާގެ ތަރުޖަމާނު އިސްމާއިލް ބަގާއީ ވަނީ އެމެރިކާއާއެކު އެއްވެސް ރަސްމީ އަދި ސީދާ މަޝްވަރާއެއް ކުރިއަށް ނުދާކަން ކަށަވަރުކޮށްދެއްވާފައެވެ. އޭނާ ވިދާޅުވި ގޮތުގައި މިހާރު ކުރިއަށްދާ މުއާމަލާތްތަކަކީ ތިންވަނަ ފަރާތްތައް މެދުވެރިކޮށް ބަދަލުކުރެވޭ ނުސީދާ މެސެޖުތަކެކެވެ.
ތެހެރާނުން ގަބޫލުކުރާ ގޮތުގައި މަޝްވަރާތައް އަލުން ފެށޭނީ އެމެރިކާއިން ކުރީގެ އެއްބަސްވުންތަކާ ޚިލާފަށް ކޮށްފައިވާ ކަންކަން އިސްލާހުކޮށް، އީރާނާ ދެކޮޅަށް އަޅާފައިވާ އިގްތިސާދީ ދަތިކުރުމުގެ ފިޔަވަޅުތައް އުވާލުމުންނެވެ. މީގެ އިތުރުން ސަރަހައްދީ ގޮތުން އެމެރިކާއިން ހިންގާ އަސްކަރީ ހަރަކާތްތައް ހުއްޓާލުމަކީ ވެސް އީރާނުގެ ޝަރުތެކެވެ.
ސީދާ ވާހަކަތައް މެދުކަނޑާލާފައިވީ ނަމަވެސް، އޮމާން، ގަތަރު އަދި ސައުދީ އަރަބިއްޔާ ފަދަ ގައުމުތަކުން ދަނީ ދެ ގައުމުގެ ދެމެދުގައި މެދުވެރިއެއްގެ ދައުރު އަދާކުރަމުންނެވެ. މި މުއާމަލާތްތައް ބިނާވެފައިވަނީ ސަރަހައްދީ ސަލާމަތާއި، ނިއުކްލިއާ މައްސަލަތަކާއި، ހޮރްމޫޒް ކަނޑުއޮޅީގެ ސަލާމަތާ ގުޅޭ ކަންކަމުގެ މައްޗަށެވެ.
އެމެރިކާގެ ވެރިން މަޝްވަރާތައް ކުރިއަށްދާ ކަމަށާއި އެއްބަސްވުމަކާ ގާތްވެފައިވާ ކަމަށް ވިދާޅުވި ނަމަވެސް، އީރާނުން ބުނަނީ އެއީ ހަގީގަތެއް ނޫން ކަމަށެވެ. "އެމެރިކާއިން ދައްކާ ވާހަކަތަކަކީ އެ ގައުމުގެ ދާޚިލީ ސިޔާސީ މަސްލަހަތަށްޓަކައި ދައްކާ ވާހަކަތަކެއް" ކަމަށް އީރާނުގެ އޮފިޝަލުން ފާހަގަކުރައްވައެވެ. މިހާލަތުގައި އީރާނުން ނިންމާފައިވަނީ ޓްރަމްޕްގެ ވެރިކަން ނިމެންދެން މަޑުޖައްސާލުމަށެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!