ވޯލްޑް ކަޕްގެ ގްރޫޕް ސްޓޭޖުގައި ބުދަ ދުވަހު ކޮންގޯއާ ދެކޮޅަށް ކުޅުނު މެޗުން 2-1 އިން މޮޅުވެ، އިންގްލެންޑް މުބާރާތުގެ ގަދަ 16 އިން ޖާގަ ހޯދައިފިއެވެ.

މާސިޑީޒް ބެންޒް ސްޓޭޑިއަމްގައި ކުޅުނު މި މެޗުގައި އިންގްލެންޑް މޮޅުވީ ފަހަތުން އަރައި ކެޕްޓަން ހެރީ ކޭން ކާމިޔާބުކުރި ދެ ލަނޑުންނެވެ.

Ad
rt

މެޗުގެ ފުރަތަމަ ހާފުގައި ކޮންގޯއިން ވަނީ ހައިރާންކުރުވަނިވި ކުޅުމެއް ދައްކައި ލީޑު ނަގާފައެވެ. މެޗުގެ ހަތްވަނަ މިނެޓުގައި ބްރަޔަން ސިޕެންގާ ވަނީ އިންގްލެންޑްގެ ގޯލްކީޕަރު ޖޯޑަން ޕިކްފޯޑް ބަލިކޮށް ގޯލެއް ކާމިޔާބުކޮށްފައެވެ. މީގެ އިތުރުން ފުރަތަމަ ހާފުގައި ކޮންގޯގެ ޔޯން ވިސާ ފޮނުވާލި ހަމަލާއެއް ގޯލުގެ ދަނޑިއަށްވެސް ވަނީ އަރާފައެވެ.

އިންގްލެންޑަށް މެޗުގެ ނަތީޖާ ހަމަހަމަކޮށްދިނީ 75 ވަނަ މިނެޓުގައި ކޭންއެވެ. ބަދަލު ކުޅުންތެރިއެއްގެ ގޮތުގައި ކުޅެން އެރި އެންތަނީ ގޯޑަން ނަގައިދިން ހުރަހަކުން ކޭން މި ލަނޑު ޖެހީ ބޮލުންނެވެ. އޭގެ 11 މިނެޓު ފަހުން، މެޗުގެ 86 ވަނަ މިނެޓުގައި ކޭން ވަނީ އިންގްލެންޑް މޮޅުކޮށްދިން ލަނޑު ގޯލުގެ މަތީ ކަނަށް ފޮނުވާލައިގެން ކާމިޔާބުކޮށްފައެވެ.

މެޗަށްފަހު ވާހަކަދައްކަމުން ކޭން ބުނީ "އަހަރެމެންނަށް އެނގޭ މަސައްކަތް ހުއްޓާނުލައި ކުރިއަށްދިޔަނަމަ ފުރުސަތު ލިބޭނެކަން. ޓީމުގެ ކޮންމެ ކުޅުންތެރިއަކީވެސް ހީރޯއަކަށް ވުމުގެ ފުރުސަތު އޮތް ކުޅުންތެރިއެއް. މިއަދު އެ ފުރުސަތު ލިބުނީ އަހަރެންނަށް" ކަމަށެވެ.

މި މެޗުގައި ކޮންގޯގެ ކީޕަރު ލިއޮނަލް އެމްޕާސީ ވަނީ މޮޅު ކުޅުމެއް ދައްކާފައެވެ. އޭނާ ވަނީ ޖޫޑް ބެލިންހަމް ފޮނުވާލި ތިން ހަމަލާއެއް ދިފާއުކޮށްފައެވެ. މީގެ އިތުރުން ފުރަތަމަ ހާފުގައި ކޭންއަށް ކުރި ފައުލަކަށް ޕެނަލްޓީއެއް ހޯދުމަށް އިންގްލެންޑުން އެޕީލް ކުރި ނަމަވެސް، ރެފްރީ ނިންމީ ޕެނަލްޓީއެއް ނޫން ކަމަށެވެ.

މި ދެ ލަނޑާއެކު ކޭން ވަނީ މިފަހަރުގެ ވޯލްޑް ކަޕްގައި ޖެހި ލަނޑުގެ އަދަދު ފަހަކަށް އަރުވާފައެވެ. އަދި ގައުމީ ޓީމަށް އޭނާ ޖަހައިދިން ލަނޑުގެ އަދަދު ވަނީ 84 އަށް އަރާފައެވެ. ގަދަ 16 ގައި އިންގްލެންޑް އަންނަ އާދީއްތަ ދުވަހު މެކްސިކޯ ސިޓީގައި ނުކުންނާނީ މުބާރާތް ބާއްވާ އެއް ގައުމު ކަމަށްވާ މެކްސިކޯއާ ދެކޮޅަށެވެ.