ތުރުކީން ވިޔަފާރި ހުއްޓާލުމުން އިސްރާއީލުގެ ދަގަނޑު ކުންފުންޏެއް ބަނގުރޫޓުވެއްޖެ

ޣައްޒާގައި އިސްރާއީލުން ހިންގަމުންދާ ނަސްލުނައްތާލުމުގެ ހަނގުރާމައާ ގުޅިގެން ތުރުކީން އެ ޤައުމާ ކުރާ ވިޔަފާރި މުޅިން ހުއްޓާލުމާ ގުޅިގެން، އިސްރާއީލުގެ ދަގަނޑާއި ދަގަނޑު ކުނޑި ވިޔަފާރިކުރާ ބޮޑު ކުންފުންޏެއް ކަމަށްވާ "ޝައުލް ގުއެޓާ" ކުންފުނި ބަނގުރޫޓުވެއްޖެއެވެ.

އިސްރާއީލުގެ މަޝްހޫރު ވިޔަފާރި ނޫސް "ކަލްކަލިސްޓް" ގައި ބުދަ ދުވަހު ރިޕޯޓުކޮށްފައިވާ ގޮތުގައި، އިސްރާއީލުގެ ދެކުނުގައިވާ އަޝްދޯދުގައި ހުންނަ ޝައުލް ގުއެޓާ ކުންފުނި ބަނގުރޫޓުވެފައިވަނީ، ޣައްޒާގައި އިސްރާއީލުން ހިންގަމުންދާ ނަސްލުނައްތާލުމުގެ ހަނގުރާމައާ ގުޅިގެން ތުރުކީން އެ ޤައުމާއެކު ކުރާ ވިޔަފާރި މުޢާމަލާތްތައް މުޅިން ހުއްޓާލުމުގެ ސަބަބުންނެވެ.

ކުންފުނީގެ މަސައްކަތާއި ތުރުކީއަށް ބަރޯސާވުން

ޝައުލް ގުއެޓާ ކުންފުންޏަކީ ދަގަނޑު އެއްކޮށް، ގަނެ، ބައިބައިކޮށް، މުގުރައި، ފިތައި، ޕެކްކޮށް، ދަގަނޑު ކުނޑި އެއްކޮށް،، ވިއްކުމުގެ މަސައްކަތް ކުރާ ކުންފުންޏެކެވެ. މި ކުންފުނީގެ މައިގަނޑު މަސައްކަތްތައް ކުރަމުން އައީ އަޝްދޯދު ސިނާޢީ ސަރަޙައްދުގައި ގާތްގަނޑަކަށް 2.7 އޭކަރުގެ ބޮޑު ބިމެއްގައި ޤާއިމުކޮށްފައިވާ ޕްލާންޓެއްގައެވެ. ކަލްކަލިސްޓުން ހާމަކޮށްފައިވާ ގޮތުގައި، މި ކުންފުނީގެ ވިޔަފާރީގެ 70 އިންސައްތަ ބަރޯސާވެފައިވަނީ ތުރުކީއަށް ކުރާ އެކްސްޕޯޓަށެވެ. ޣައްޒާއަށް އިސްރާއީލުން ހަމަލާ ދޭން ފެށުމުގެ ކުރިން ވެސް، މި ކުންފުނީގެ އާމްދަނީގެ 70 އިންސައްތަ ލިބެމުން އައީ ތުރުކީ މާކެޓަށް ކުރާ އެކްސްޕޯޓުންނެވެ.

ވިޔަފާރީގެ ހާލަތު ދަށަށް ދިއުން

އެ ނޫހުން ބުނެފައިވާ ގޮތުގައި، މި ކުންފުނީގެ ޖުމުލަ ދަރަނި 105 މިލިއަން ޝެކެލް (32 މިލިއަން އެމެރިކާ ޑޮލަރަށްވުރެ ގިނަ) އަށް އަރާފައިވެއެވެ. މިއީ 2022 ވަނަ އަހަރު 200 މިލިއަން ޝެކެލް (61 މިލިއަން އެމެރިކާ ޑޮލަރު) އަށް އަރާފައިވާ ވިޔަފާރި މިންވަރު، މި އަހަރުގެ ފުރަތަމަ ދެ ކުއާޓަރުގައި 35 މިލިއަން ޝެކެލް (11 މިލިއަން އެމެރިކާ ޑޮލަރު) އަށް ދަށްވުމާ ގުޅިގެންނެވެ.

ކުންފުނި ބަނގުރޫޓްވެ ދަރަނިވެރިވުން

ޝައުލް ގުއެޓާ ކުންފުންޏަށް އެންމެ ގިނައިން ދަރަނި ދޫކޮށްފައިވާ ފަރާތަކީ އިންޓަނޭޝަނަލް ބޭންކު ކަމަށާއި، މި ބޭންކުން ކޯޓުގައި ހުށަހަޅާފައިވަނީ 18 މިލިއަން ޝެކެލްގެ ދަރަންޏެކެވެ. އެހެނިހެން ދަރަނިވެރިންގެ ތެރޭގައި ބޭންކް ހަޕޮއަލިމް (15 މިލިއަން ޝެކެލް)، މަރކަންޓައިލް ބޭންކް (11 މިލިއަން ޝެކެލް)، އަދި މިޒްރާހީ-ޓެފާހޮޓް ބޭންކް (1.5 މިލިއަން ޝެކެލް) ހިމެނެއެވެ. މީގެ އިތުރުން، މެކްސް ކްރެޑިޓް ކާޑު ކުންފުންޏަށް 5 މިލިއަން ޝެކެލް އަދި ބޭންކު ނޫން ކްރެޑިޓް ކުންފުނިތަކަށް ވެސް ޝައުލް ގުއެޓާ ކުންފުނިން ދަރަނިވެފައިވެއެވެ. މި ތެރޭގައި އެސް.އާރު. އެކޯޑް އަދި އެމްޕްލާ ކުންފުނިތަކަށް 4 މިލިއަން ޝެކެލްގެ ދަރަނި ހިމެނެއެވެ.

ކޯޓުގެ ނިންމުން

އިސްރާއީލުގެ ދެކުނުގައިވާ ބެއަރޝެބާ ޑިސްޓްރިކްޓް ކޯޓުން ވަނީ އިސްރާއީލް އިންޓަނޭޝަނަލް ބޭންކުން ހުށަހެޅި ޕެޓިޝަނެއް ބަލައިގަނެ، ވަކީލު ދޯރޮން ޓިޝްމަން، ޝައުލް ގުއެޓާ ކުންފުނީގެ ޓްރަސްޓީއެއްގެ ގޮތުގައި ޢައްޔަންކޮށްފައެވެ. މި ޓްރަސްޓީ ނިންމާނީ ކުންފުނި އުވާލާނީތޯ ނުވަތަ އަލުން އޮނިގަނޑު އެކުލަވާލާނީތޯއެވެ.

އެ ކުންފުނީގެ ފަރާތުން ކޯޓަށް ބުނެފައިވަނީ، ޣައްޒާއަށް އިސްރާއީލުން ދޭ ހަމަލާތަކާއި ތުރުކީން ވިޔަފާރި ހުއްޓާލުމަކީ ވިޔަފާރި ދަށްވުމުގެ އެންމެ ބޮޑު ސަބަބު ކަމަށެވެ. އެއީ ކުންފުނީގެ އާމްދަނީގެ ބޮޑު ބައެއް ބަރޯސާވެފައިވަނީ ތުރުކީއަށް ކުރާ އެކްސްޕޯޓަށް ކަމަށްވާތީއެވެ.

ތުރުކީގެ ފިޔަވަޅުތައް

އިސްރާއީލުން ހިންގަމުންދާ ޣައްޒާގައި އާންމުން ޝަހީދުކުރުމުގެ ހަނގުރާމަ ފެށުނު ފަހުން، 2024 ގެ މޭ 2 އާ ހަމައަށް ތުރުކީން އިސްރާއީލާއެކު ކުރާ ވިޔަފާރި ގާތްގަނޑަކަށް 30 އިންސައްތަ ދަށްކޮށްފައިވެއެވެ. އަދި 2024 ގެ މޭ 2 ގައި ތުރުކީން ވަނީ އިސްރާއީލާއެކު ކުރާ އެންމެހައި އެކްސްޕޯޓް، އިމްޕޯޓް އަދި ޓްރާންސިޓް ވިޔަފާރި މުޢާމަލާތްތައް މުޅިން ހުއްޓާލާފައެވެ. މީގެ ތެރޭގައި ހުރިހާ ބާވަތެއްގެ އުފެއްދުންތަކާއި، ކަސްޓަމްސް އަދި ފްރީ ޒޯން މުޢާމަލާތްތައް ވެސް ހިމެނެއެވެ. މިއާއެކު ދެ ޤައުމުގެ ދެމެދުގައި ހިންގަމުން އައި އެންމެހައި ވިޔަފާރި ޙަރަކާތްތައް ވަނީ ނިމުމަކަށް އައިސްފައެވެ.