ރައީސް ޑރ. މުޙައްމަދު މުޢިއްޒު، "އެންވަޔަރަންމަންޓަލް ޕްރޮޓެކްޝަން އެޖެންސީ" (އީޕީއޭ) ގެ ނަން، "އެންވަޔަރަންމަންޓަލް ރެގިއުލޭޓަރީ އޮތޯރިޓީ" (އީއާރުއޭ) އަށް މިއަދު ބަދަލުކުރައްވައިފިއެވެ.

ރައީސް މި ބަދަލު ގެނެވިފައިވަނީ ޤާނޫނުއަސާސީއިން އެމަނިކުފާނަށް ލިބިވަޑައިގަންނަވާ އިޚްތިޔާރުގެ ދަށުންނެވެ. މިކަން އިޢުލާން ކުރައްވާފައިވަނީ ރައީސް އޮފީހުގެ ނަންބަރު 14/2025 ދެންނެވުމުންނެވެ.

Ad
rt

މި ބަދަލާއެކު، މި އިދާރާގެ ހިންގުމުގެ އޮނިގަނޑަށްވެސް ވަނީ މުހިންމު ބަދަލުތަކެއް ގެނެސްފައެވެ. މިގޮތުން މީގެ ކުރިން ގަވަރނިންގ ބޯޑެއްގެ ލަފާގެ ދަށުން ހިންގަމުން އައި އިދާރާ، މިހާރު ހިނގަމުންދާނީ ސީދާ މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓުގެ ދަށުންނެވެ.

ރައީސް އޮފީހުން ހާމަކުރި ގޮތުގައި، މި ބަދަލު ގެނެވިފައިވަނީ އިދާރާގެ މައިގަނޑު މަސައްކަތްތަކާ ގުޅޭގޮތުން އިތުރު ހަރުދަނާކަމެއް ގެނައުމުގެ ގޮތުންނެވެ.

އެންވަޔަރަންމަންޓަލް ރެގިއުލޭޓަރީ އޮތޯރިޓީގެ މައިގަނޑު މަސައްކަތްތަކަކީ ދިވެހިރާއްޖޭގެ ތިމާވެށްޓާބެހޭ ކަންކަން ރެގިއުލޭޓްކުރުމާ ގުޅުންހުރި މަސައްކަތްތަކަކަށްވުމާއެކު، އިދާރާގެ ނަން މިގޮތަށް ބަދަލުކުރުމަކީ އެ މަސައްކަތްތަކާ އިތުރަށް ގުޅުންހުރި ބަދަލެއް ކަމުގައި ފާހަގަކޮށްފައިވެއެވެ.

މި ބަދަލާއެކު އިދާރާގެ މަސައްކަތްތައް މިހާރަށްވުރެ ހަލުވިވެ، ހަރުދަނާވެގެންދާނެ ކަމަށް ސަރުކާރުން އުންމީދުކުރައްވައެވެ.