މިޔަންމާގައި ކުއްލިއަކަށް ކުރިމަތިވި ވަރުގަދަ ބިންހެލުމެއްގައި މަރުވި މީހުންގެ އަދަދު 1،600 އަށްވުރެ އިތުރުވެއްޖެއެވެ. މިއީ އެ ޤައުމުގެ ތާރީޚުގައި ދިމާވި އެންމެ ބޮޑު ޤުދުރަތީ ކާރިސާ ކަމަށް ބެލެވެއެވެ.

ޔޫ.އެސް. ޖިއޮލޮޖިކަލް ސަރވޭ (ޔޫ.އެސް.ޖީ.އެސް) އިން ބުނާ ގޮތުގައި މި ބިންހެލުމަކީ ރިކްޓަރ ސްކޭލްގައި 7.7 ގެ ބާރުމިނުގެ ބިންހެލުމެކެވެ. މި ބިންހެލުން އައި ސަރަޙައްދަކީ އެތެރޭގެ ހަނގުރާމައިގެ ސަބަބުން ވީރާނާވެފައިވާ ސަރަޙައްދެކެވެ. ޔޫ.އެސް.ޖީ.އެސް އިން ލަފާކުރާ ގޮތުގައި މި ކާރިސާގައި މަރުވާ މީހުންގެ އަދަދު 10،000 އަށްވުރެ އިތުރުވުމަކީ އެކަށީގެންވާ ކަމެކެވެ.

Ad
rt

މި ބިންހެލުމުގެ ސަބަބުން މިޔަންމާގެ އެއަރޕޯޓުތަކާއި، މަގުތަކާއި އަދި ބްރިޖުތަކަށް ބޮޑެތި ގެއްލުންތައް ވަނީ ލިބިފައެވެ. މިކަމުގެ ސަބަބުން ސަލާމަތްކުރުމުގެ މަސައްކަތަށް ބޮޑެތި ހުރަސްތަކެއް ކުރިމަތިވެފައިވާ ކަމަށް ރަސްމީ ފަރާތްތަކުން މަޢުލޫމާތު ދެއެވެ.

ޗައިނާ، ރަޝިޔާ އަދި އިންޑިޔާ ފަދަ ޤައުމުތަކުން ވަނީ ސަލާމަތްކުރުމުގެ ޓީމުތައް މިޔަންމާއަށް ފޮނުވާފައެވެ. މި ޤައުމުތަކުގެ އިތުރުން އދ. އިން ވެސް ވަނީ އެހީތެރިކަން ފޯރުކޮށްދޭނެ ކަމަށް ބުނެފައެވެ.

މިޔަންމާގެ ސަރުކާރުން ވަނީ ކުއްލި ނުރައްކަލުގެ ޙާލަތު އިޢުލާނުކޮށް، ސަލާމަތްކުރުމުގެ މަސައްކަތް އަވަސް ކުރުމަށް ގޮވާލާފައެވެ. އަދި ރައްޔިތުންނަށް ވީހާވެސް އަވަހަކަށް އެހީތެރިކަން ފޯރުކޮށްދިނުމަށް މަސައްކަތް ކުރަމުންދާ ކަމަށް ބުނެފައިވެއެވެ.