ސުލްހަވެރިކަމާއެކު ވެރިކަން ބަދަލުކުރުމަށް ތައްޔާރަށް ހުންނެވިކަމަށް އެމެރިކާގެ ރައީސް ޖޯ ބައިޑެން ވިދާޅުވެއްޖެއެވެ.

އެމެރިކާގެ ރިޔާސީ އިންތިޚާބު 2024ގެ ފަހުން މިދިޔަ ބުރާސްފަތި ދުވަހު ވައިޓް ހައުސްގައި އެމެރިކާގެ ރައީސް ޖޯ ބައިޑެން ވަނީ ފުރަތަމަ ފަހަރަށް އާންމުކޮށް ވާހަކަފުޅު ދައްކަވައި، ސުލްހަވެރިކަމާއެކު ވެރިކަން ބަދަލުކުރުމަށް ތައްޔާރަށް ހުންނެވި ކަމަށް ވިދާޅުވެފައެވެ.

Ad
rt

މި ވާހަކަފުޅުގައި އެމެރިކާގެ ރިޔާސީ އިންތިޚާބުގައި ޑޮނަލްޑް ޓްރަމްޕް ހޯއްދެވި ސިހުންދެނިވި ކާމިޔާބީއަށް ފަހު، ބައިޑެން ވަނީ ސުލްހަވެރިކަމާއެކު ވެރިކަން ބަދަލުކުރުމަށް އެހީތެރިކަން ފޯރުކޮށްދޭނެ ކަމުގެ ޔަގީންކަން ދެއްވާފައެވެ.

"ވޭތުވެދިޔަ 200 އަހަރު ތެރޭގައި، އެމެރިކާ ވަނީ ދުނިޔޭގެ ތާރީޚުގައި އަމިއްލަ ވެރިކަމުގެ އެންމެ މަތިވެރި ތަޖުރިބާ ކުރަމުން ގެންގޮސްފައި. މިއީ އިއްތިފާގެއް ނޫން، މިއީ ހަގީގަތް. މީހުން ވޯޓުލައި އެމީހުންގެ އަމިއްލަ ލީޑަރުން ހޮވަނީ، އަދި އެކަން ކުރަނީ ސުލްހަވެރިކަމާއެކު. އަޅުގަނޑުމެން މިތިބީ ޑިމޮކްރަސީއެއްގައި، ރައްޔިތުންގެ އުންމީދުތައް އަބަދުވެސް ކާމިޔާބުވާނެ" ބައިޑެން ވިދާޅުވިއެވެ.

މި ބަޔާނުގައި ބައިޑެން ވަނީ އެމެރިކާގެ ޑިމޮކްރަސީގެ ވަރުގަދަކަމާއި، ރައްޔިތުންގެ އެދުންތަކަށް އިޙްތިރާމްކުރުމުގެ މުހިންމުކަން ފާހަގަކުރައްވާފައެވެ. އަދި އިންތިޚާބުގެ ނަތީޖާއަށް އިޙްތިރާމްކޮށް، ސުލްހަވެރިކަމާއެކު ވެރިކަން ބަދަލުކުރުމަށް ތައްޔާރަށް ހުރި ކަމުގެ މެސެޖެއް ދެއްވާފައެވެ.

"އިއްޔެ އަޅުގަނޑު ރައީސްކަމަށް އިންތިޚާބުވި ޓްރަމްޕާ ވާހަކަދައްކައި، އޭނާގެ ކާމިޔާބީއަށް މަރުޙަބާ ދެންނެވިން. އަދި ސުލްހަވެރި އަދި ރަނގަޅު ގޮތެއްގައި ވެރިކަން ބަދަލުކުރުމަށްޓަކައި އަޅުގަނޑުގެ މުޅި އިދާރާ އޭނާގެ ޓީމާއެކު މަސައްކަތްކުރުމަށް އަޅުގަނޑު އިރުޝާދު ދޭނެކަމުގެ ޔަގީންކަން އަރުވައިފިން. އެއީ ރައްޔިތުންނަށް ޙައްޤުވާ ގޮތް" ބައިޑެން އިތުރަށް ވިދާޅުވިއެވެ.

އެމެރިކާގެ 47 ވަނަ ރައީސްކަމަށް ހޮވިވަޑައިގަތް ޑޮނަލްޑް ޓްރަމްޕް ވަނީ ވަރަށް ވާދަވެރި އިންތިޚާބެއްގައި ނައިބު ރައީސް ކަމަލާ ހެރިސްއަށްވުރެ ސާފު އަޣުލަބިއްޔަތަކުން ކާމިޔާބު ހޯއްދަވާފައެވެ. މިހާތަނަށް ޓްރަމްޕަށް 295 އިލެކްޓޯރަލް ވޯޓު ލިބިވަޑައިގެންފައިވާއިރު، ހެރިސްއަށް ލިބިވަޑައިގެންފައިވަނީ 226 އިލެކްޓޯރަލް ވޯޓެވެ.