ރާއްޖެ އައި ނެދަލޭންޑްގެ ރައްޔިތެއްގެ ލަގެޖުން ގިނަ އަދަދެއްގެ މަސްތުވާތަކެތި އަތުލައިގަނެފިއެވެ.

މޯލްޑިވްސް ކަސްޓަމްސް ސަރވިސްއިން މިއަދު ހާމަކުރި މަޢުލޫމާތުގައިވާ ގޮތުން، އެ މީހާގެ އަތުން އަތުލައިގަތް މަސްތުވާތަކެއްޗަކީ ކެތިނޯންއެވެ. އަދި އޭގެ ޖުމްލަ ބަރުދަނަކީ 6.070 ކިލޯގްރާމެވެ.

Ad
rt

މި މަސްތުވާތަކެތީގެ މަގުމަތީ އަގު 9,105,000.00 (ނުވަ މިލިއަން އެއްލައްކަ ފަސް ހާސް) ދިވެހި ރުފިޔާއަށް އަރާ ކަމަށް ކަސްޓަމްސްއިން ބުނެފައިވެއެވެ.

މި މައްސަލައާ ގުޅިގެން އިތުރު ތަފްސީލެއް ކަސްޓަމްސްއިން ހާމަކޮށްފައެއް ނުވެއެވެ. ނަމަވެސް، މިފަދަ މައްސަލަތަކުގައި އާންމު އުސޫލުން ޢަމަލުކުރާ ގޮތަށް، މި މައްސަލަ ތަޙްޤީޤުކުރުމަށް ކަމާބެހޭ އިދާރާތަކާ ޙަވާލުކުރެވޭނެ ކަމަށް ލަފާކުރެވެއެވެ.

ގިނަ ޤައުމުތަކުގައި ކެތިނޯން ބޭނުންކުރުމާއި ގެންގުޅުމަކީ މަނާކަމެކެވެ. ބައިނަލްއަޤްވާމީ މުޢާހަދާތަކުގެ ދަށުން މިއީ ކޮންޓްރޯލްކުރެވޭ މާއްދާއެކެވެ. ކެތިނޯން ބޭނުންކުރުމުގެ ސަބަބުން ހިތުގެ އަވަސް މިން އިތުރުވެ، ލޭގެ ޕްރެޝަރ މައްޗަށް ދިއުމާއި، ސިކުނޑީގެ މައްސަލަތައް ކުރިމަތިވުން ފަދަ ނުރައްކާތެރި ކަންކަން ދިމާވެދާނެއެވެ.

"ބާތު ސޯލްޓްސް" އަދި "ޕްލާންޓް ފުޑް" ފަދަ ނަންނަމުގައިވެސް މި މާއްދާ ވިއްކާކަން ފާހަގަކުރެވެއެވެ.

ކެތިނޯނަކީ ވަރަށް ނުރައްކާތެރި މަސްތުވާ އެއްޗެއް ކަމަށްވާތީ، މިފަދަ މާއްދާތައް އެތެރެކުރުމާއި ބޭނުންކުރުން ހުއްޓުވުމަށް ސަރުކާރުތަކުން މަސައްކަތްކުރަމުންދެއެވެ.

ރާއްޖެއަށް މަސްތުވާތަކެތި އެތެރެކުރާމީހުންނަށް ޤާނޫނުގައި ކަނޑައަޅާފައިވާ އަދަބު އެންމެ ހަރުކަށިކޮށް، އެފަދަ މީހުންނަށް މަރުގެ އަދަބު ދެވޭ ގޮތަށް މަސްތުވާތަކެތީގެ ގާނޫނު އިސްލާހު ކުރުމުގެ ބިލެއް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން މިފަހުން ޑްރާފްޓްކޮށްފައި ވާކަން ފާހަގަކުރެވެ އެވެ.