ކުރިއަށް އޮތް ރިޔާސީ އިންތިހާބުގައި މޯލްޑިވްސް ނެޝަނަލް ޕާޓީ (އެމްއެންޕީ)ގެ ފަރާތުން ވާދަކުރައްވާ އެ ޕާޓީގެ ރައީސް، ދަނގެތީ ދާއިރާގެ މެންބަރު ކާނަލް ރިޓަޔާޑް މުހައްމަދު ނާޒިމްގެ އިންތިޚާބީ އެޖެންޓަކަށް އެމްއެންޕީގެ އެއް ފައުންޑާ، އަދި އެއް ނައިބު ރައީސް، ރައްޔިތުންގެ މަޖިލިހުގެ ވިލިމާލެ ދާއިރާގެ މެމްބަރު އަހުމަދު އުޝާމް މިއަދު ހަމަޖައްސައިފިއެވެ.
ނާޒިމްގެ ރިޔާސީ ކެމްޕޭން ތަރުޖަމާނު ގޮތުގައި ވެސް ހުންނެވި އުޝާމް އެ މަގާމަށް ހަމަޖެއްސިކަން އެމްއެންޕީން ވަނީ މިއަދު ހާމަކޮށްފައެވެ.
ނާޒިމްގެ ކެމްޕޭން މެނޭޖަރަކަށް ހަމަޖައްސާފައި ވަނީ ކުރީގެ ޑެޕިއުޓީ ޕޮލިސް ކޮމިޝަނަރުކަން ކުރެއްވި މުހައްމަދު ފަޔާޒް (އެފްއޭ)އެވެ.
ނާޒިމްގެ އިންތިޚާބީ އެޖެންޓާއި ކެމްޕޭންގެ އިސް ފަރާތްތައް ހަމަޖައްސާފައިވާއިރު އޭނާ ގެންދަވަނީ ‘’އުޖާލާ ޒަމާން’’ ޝިއާރުގެ ދަށުން ކެމްޕޭން ހަރަކާތްތައް ކުރިއަށް ގެންދަވަމުންނެވެ.
ރިޔާސީ އިންތިޚާބު އޮންނާނީ އަންނަ ސެޕްޓެމްބަރު މަހުގެ 9 ވަނަ ދުވަހުއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!