ޖިނާއީ މައްސަލައެއްގައި ކުރި ޖޫރިމަނާ ނުދެއްކުމުން އެ މީހާގެ އަދަބު ޖަލު އަދަބަކަށް ބަދަލުކޮށް، ޖަލު ހުކުމް ތަންފީޒު ކުރަން ޖެހިއްޖެ އެވެ.

ގާނޫނުލް އުގޫބާތުގެ ދަށުން ދައުވާކުރާ ކުށްތަކުގައި ކުށް ސާބިތުވާއިރު، ޖަލުގެ އަދަބު ޖޫރިމަނާއަށް ބަދަލު ކުރެވެ އެވެ. އެގޮތަށް ގިނަ ބައެއްގެ ޖަލު އަދަބު ޖޫރިމަނާއަށް ބަދަލުކޮށްފައިވެ އެވެ. އެކަމަކު ޖޫރިމަނާ ނުދައްކާ ނަމަ އަލުން ޖަލު އަދަބަކަށް ބަދަލު ކުރެވެ އެވެ.

Ad
rt

ކްރިމިނަލް ކޯޓުން މިދިޔަ ހަފުތާގައި، ޖަލު އަދަބަކަށް ބަދަލުކުރީ ފިހާރައަކުން ދެ ސެންޓް ފުޅި ވަގަށް ނެގި މައްސަލާގައި އިއްވާފައިވާ 17،800ރ. ގެ ޖޫރިމަނާގެ ހުކުމެކެވެ. އެ ފައިސާ ތިން މަސް ތެރޭގައި ދައްކަން މިދިޔަ އަހަރު ކޯޓުން އަންގާފައި ވިޔަސް، ކުށްވެރިވި މީހާ އެ ފައިސާ ދައްކާފައެއް ނުވެ އެވެ.

އޭނާގެ އަދަބު ޖަލު އަދަބަކަށް ބަދަލުކުރަން ދައުލަތުން ހުށަހެޅުމުން ކްރިމިނަލް ކޯޓުން މިދިޔަ ހަފުތާގައި ހުކުމްކުރީ ޖޫރިމަނާގެ އަދަބު ޖަލު އަދަބަކަށް ބަދަލު ކުރުމަށެވެ. އަދި ޖަލު އަދަބުގެ ތެރެއިން ތަންފީޒު ނުކޮށް އޮތް ދެ މަހާއި 11 ދުވަހަށް ޖަލަށްލާން ހުކުމްކުރީ ކަމަށް ހުކުމުގައިވެ އެވެ.

އަދަބު ކަނޑައެޅުމުގެ އުސޫލު އޮންނަ ގޮތުން ޖޫރިމަނާގެ ފައިސާ ނުދައްކާ ނަމަ އަދަބުގެ ބާވަތް ބަދަލު ކުރެވޭނެ އެވެ. މިއީ އެގޮތަށް ޖޫރިމަނާ ނުދައްކައިގެން ކްރިމިނަލް ކޯޓުން ޖަލު އަދަބެއް ތަންފީޒު ކުރަން އެންގި ފުރަތަމަ ފަހަރެވެ.