އެމެރިކާގެ 6 ސްޓޭޓަކަށް ނަގޫރޯޅިތަކެއް އަރައި 80 އަށް ވުރެ ގިނަ މީހުން މަރުވެއްޖެއެވެ.

އެމެރިކާގެ މެދު ތެރޭގެ ސްޓޭޓްތަކަކަށާއި ދެކުނުގެ ބައެއް ސްޓޭޓްތަކަށް ހުކުރު ދުވަހާއި ހޮނިހިރު ދުވަހު އަރާފައިވާ ނަގޫރޯޅިތަކާއި ގުޅިގެން 80 އަށްވުރެ ގިނަ މީހުން މަރުވެގެން ރިޕޯޓްކޮށްފައިވާކަމަށް އެގައުމުގެ ކަމާބެހޭ އޮފިޝަލުން ހާމަކޮށްފައިވައެވެ. ބާރުގަދަ ނަގޫރޯޅިތަކުގެ ސަބަބުން އިމާރާތްތައް ވެއްޓި މަރުވެފައިވާ މީހުންގެ އަދަދުވެސް އިތުރުވާނެކަމަށް ލަފާކުރެވޭކަމަށްވެސް އެފަރާތުން ހާމަކުރެއެވެ.

Ad
rt

އެންމެ ބޮޑަށް އަސަރުކޮށްފައިވާ އެމެރިކާގެ ކެންޓަކީ ސްޓޭޓްގައި އެކަނިވެސް 70 އަށްވުރެ ގިނަ މީހުން މަރުވެފައިވާކަމަށް އޮފިޝަލުންނާއި ހަވާލާދީ ބައިނައްލަޤްވާމީ ޚަބަރުތަކުގައި ބުނެފައިވެއެވެ. އަދި މިއީ ކެންޓަކީއަށް މިހާ ބޮޑެތި ގެއްލުންތަކެއް ލިބުނު ފުރަތަމަ ފަހަރުކަމަށްވެސް އެ ސްޓޭޓްގެ ގަވަރުނަރު މީޑިއާގައި ހާމަކޮށްފައިވެއެވެ.

ނަގޫރޯޅުތަކުގެ އަސަރު އެންމެ ބޮޑަށްކޮށްފައިވާ ސްޓޭޓްތަކުގެ ތެރެއިން ކެންޓަކީގައި ހުންނަ ކެންޑްލް ފެކްޓްރަރީއަކަށާއި، އިލިއޮންސްގައި ހުންނަ އެމޭޒަން ކުންފުނީގެ ވެއާ ހައުސްއަކާއި އަރްކަންސަސްގައި ހުރި ނާސިން ހައުސްއަކަށް ގެއްލުންތައް ލިބި ބަޔަކު މަރުވެގެންވެސް ވަނީ ރިޕޯޓްކޮށްފައެވެ.

ސީ.އެން.އެންގެ މީޓިއޮރޮލޮޖިސްޓް ހާމަކޮށްފައިވާ ގޮތުގައި ނަގޫރޯޅި އަރައި އެންމެ ބޮޑެތި ގެއްލުންތައް ލިބުނު 6 ސްޓޭޓްގެ ތެރެއިން ބޮޑެތި ގެއްލުންތައް ލިބިފަވާކަމަށް ރިޕޯޓްކޮށްފައިވަނީ ކެންޓަކީގެ އިތުރުން މިސޮއުރީ، ޓެނެއްސީގެ އިތުރުން މިސިސިޕީ އެވެ.

ކެންޓަކީގައި މަރުވެފައިވާ މީހުންގެ އަދަދު އިތުރުވަމުން އަންނަ އިރު، އަރްކަންސަސްގައި މިހާތަނަށް 2 މީހުން، ޓެނެއްސީގައި 4 މީހުން އަދި މިސިސިޕީގައި 2 މީހުން އަދި އިލިއޮންސްގައި 6 މީހުން މަރުވެފައިވާކަމަށް ވަނީ ރެކޯޑުކުރެވިފައެވެ.

އެންމެ ބާރުގަދަ ނަގޫރޯޅި އައިސްފައިވާކަމަށް ރެކޯޑު ކުރެވިފައިވަނީ އަރްކަންސަސްއާއި ކެންޓަކީއާއި 250 މޭލު ކައިރިންކަމަށް ސީ.އެން.އެންގެ މީޓިއޮރޮލޮޖީއިން ހާމަކޮށްފައިވެއެވެ.

އެމެރިކާގެ ކުއްލި ހާލަތްތަކުގައި މަސައްކަތްކުރާ ފަރާތްތަކުން އަންނަނީ ވެއްޓިފައިވާ އިމާރާތްތަކާއި ނަގޫރޯޅީގެ ސަބަބުން ހާލުގައި ޖެހިފައިވާ މީހުންނަށް އެހީތެރިވަމުންނެވެ.

މިއީ ފާއިތުވި އަހަރުތަކަށް ބަލާއިރު މިހާ ބާރުގަދަ ނަގޫރޯޅިތަކެއް އެމެރިކާއަށް އަރާފައިވާ ފަހަރެވެ.

ނަގޫރޯޅިތަކުގެ އަސަރުކޮށްފައިވާ ސަރަޚައްދުތަކުގެ ހާލަތު ވަރަށް ކައިރިން ބައްލަވާކަމަށާއި އެސަރަޚައްދުތަކަށް ޒިޔާރަތްކުރުމަށް އެމެރިކާގެ ރައީސް ޖޯ ބައިޑެން ވަޑައިގަންނަވާނެކަމަށް ބައިނައްލަޤްވާމީ ޚަބަރުތަކުގައި ބުނެފައިވެއެވެ.