މުޅި ދުނިޔެ އާސޯޚްކޮށްލި ފޯރިގަދަ ފައިނަލް މެޗުގައި، އާޖެންޓީނާ ބަލިކޮށް ސްޕޭނުން ދުނިޔޭގެ ފުޓްބޯޅަ ތަށި (ވޯލްޑް ކަޕް) ދެވަނަ ފަހަރަށް އުފުލާލައިފިއެވެ.

އެމެރިކާ، ކެނެޑާ އަދި މެކްސިކޯގައި ކުރިއަށްދިޔަ މި މުބާރާތުގެ ފައިނަލް މެޗު ސްޕޭނުން ކާމިޔާބުކުރީ 1-0 ގެ ނަތީޖާއަކުންނެވެ.

Ad
rt

ފައިނަލް މެޗަށްފަހު އޮތް އިނާމް ދިނުމުގެ ރަސްމިއްޔާތުގައި ސްޕޭނަށް ތައްޓާއި މެޑަލް ހަވާލުކޮށްދެއްވީ އެމެރިކާގެ ރައީސް ޑޮނަލްޑް ޓްރަމްޕެވެ. ފައިނަލް ބައްލަވާލަން ސްޕެއިންގެ ބޮޑުވަޒީރު ޕެޑްރޯ ސަންޗޭޒް ވެސް ވަޑައިގެންނެވިއެވެ.

ޓްރަމްޕް މެޑަލް ހަވާލުކޮށް ދެއްވަނީ، ފޮޓޯ: ގެޓީ

ފައިނަލްގައި މުޅި މެޗު ކޮންޓްރޯލްކޮށްގެން ކުޅުނު ސްޕޭނަށް ކާމިޔާބީ ހޯދައިދިން ހަމައެކަނި ލަނޑު ޖަހައިދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ފެރާން ޓޮރޭޒްއެވެ. މި ލަނޑު އޭނާ ކާމިޔާބުކުރީ މެޗުގެ އިތުރު ވަގުތުގެ ދެވަނަ ހާފުގައި، 106 ވަނަ މިނެޓުގައެވެ. އޭނާ ފޮނުވާލި ބާރު ހަމަލާ އަމާޒުވީ އާޖެންޓީނާގެ ގޯލުގެ މަތީ ދާގަނޑަށެވެ. މިއީ 2010 ވަނަ އަހަރަށްފަހު ސްޕޭނުން ވޯލްޑް ކަޕް ކާމިޔާބުކުރި ފުރަތަމަ ފަހަރެވެ.

މި ކާމިޔާބީއާއެކު ސްޕޭން ވެފައިވަނީ އެއްވަގުތެއްގައި ދުނިޔޭގެ ފިރިހެން އަދި އަންހެން ވޯލްޑް ކަޕް ތަށި އުފުލާލި ފުރަތަމަ ގައުމަށެވެ. ސްޕޭނުގެ އަންހެން ޓީމުން ވަނީ 2023 ވަނަ އަހަރު ދުނިޔޭގެ ތަށި އުފުލާލާފައެވެ. މީގެއިތުރުން، މުޅި މުބާރާތުގައި ސްޕޭން ކޮޅަށް ވަދެފައިވަނީ އެންމެ ލަނޑެކެވެ. މިއީ ވޯލްޑް ކަޕްގެ ތާރީޚުގައި ޗެމްޕިއަން ޓީމެއްގެ ކޮޅަށް އެންމެ މަދު ލަނޑު ވަތް ރެކޯޑެވެ.

ސްޕޭން ވޯލްޑް ކަޕްގެ ތަށި ދެވަނަ ފަހަރަށް އުފުލާލުން، ފޮޓޯ: ގެޓީ

ވޯލްޑް ކަޕް 2026ގެ ވަނަތައް ހޯދި ކުޅުންތެރިން

  • ރަން ބޯޅަ (އެންމެ މޮޅު ކުޅުންތެރިޔާ): ސްޕޭންގެ ރޮޑްރީ
  • ރިހި ބޯޅަ: އާޖެންޓީނާގެ ލިއޮނަލް މެސީ،
  • ލޯ ބޯޅަ: ފްރާންސްގެ ކިލިއަން އެމްބާޕޭ
  • ރަން ބޫޓު (އެންމެ ގިނަ ލަނޑު ޖެހި ކުޅުންތެރިޔާ): ފްރާންސްގެ ކިލިއަން އެމްބާޕޭ
  • ރިހި ބޫޓު: އާޖެންޓީނާގެ ލިއޮނަލް މެސީ
  • ލޯ ބޫޓު: އިނގިރޭސިވިލާތުގެ ޖޫޑް ބެލިންހަމްރަން
  • ގޯލްޑަން ގްލޯވ (އެންމެ މޮޅު ގޯލްކީޕަރު): ސްޕޭންގެ އުނާއި ސިމޮން
  • އެންމެ މޮޅު ޒުވާން ކުޅުންތެރިޔާގެ އެވޯޑު: ސްޕޭންގެ ޕާއު ކުބާސީ
  • ފެއާ ޕްލޭ ޓްރޮފީ (އަޚުލާގީ ގޮތުން އެންމެ ރަނގަޅު ޓީމު): ނެދަލޭންޑްސް
އެންމެ މޮޅު ކުޅުންތެރިޔާގެ މަގާމު ހޯދި ރޮޑްރީ (މ)، އެންމެ މޮޅު ކީޕަރު ސިމޮން (ކ) އަދި އެންމެ މޮޅު ޒުވާން ކުޅުންްތެރިޔާ ކުބާސީ (ވ)، ފޮޓޯ: ގެޓީ

މިއީ ފުޓްބޯޅައިގެ ލެޖެންޑް ލިއޮނަލް މެސީގެ ފަހު ވޯލްޑް ކަޕް ކަމަށް ބެލެވޭއިރު، މެޗަށްފަހު އޭނާ ހުރީ ވަރަށް ބޮޑަށް މާޔޫސްވެފައެވެ. މެސީ ބުނިގޮތުގައި ސްޕޭން މިއަދު ކުޅުނީ މާ މޮޅަށެވެ. އާޖެންޓީނާގެ ކީޕަރު އެމިލިއާނޯ މާޓިނޭޒް 12 ސޭވްކޮށްގެން ޓީމު މެޗުގެ ތެރޭގައި ހިފެހެއްޓި ނަމަވެސް، އެންޒޯ ފެނާންޑޭޒަށް ދެއްކި ރަތް ކާޑާއެކު މެޗުގެ ފަހުބައި އާޖެންޓީނާ ފުރިހަމަކުރީ 10 ކުޅުންތެރިންނާއެކުގައެވެ.

އާޖެންޓީނާ އަށް ނޭވާލާން ވެސް ފުރުސަތެއް ނުދީ ސްޕޭނުން ވޯލްޑް ކަޕް ކާމިޔާބުކޮށްފި

ސްޕޭނުގެ ކޯޗު ލުއިސް ޑެލަ ފުއެންޓޭ، އުމުރުން 65 އަހަރުގައި މި ތަށި ކާމިޔާބުކުރުމާއެކު، އޭނާ ވެފައިވަނީ ވޯލްޑް ކަޕް ކާމިޔާބުކުރި އެންމެ ދުވަސްވީ ކޯޗަށެވެ. މި މެޗު ބަލަން ދުނިޔޭގެ މަޝްހޫރު އެތައް ފަންނާނުންނާއި ކުޅިވަރު ތަރިންނެއް ވަނީ ހާޒިރުވެފައެވެ.

މި މުބާރާތަކީ 48 ޓީމާއެކު ބޭއްވި ފުރަތަމަ ވޯލްޑް ކަޕެވެ. މުބާރާތުގައި 300 އަށްވުރެ ގިނަ ލަނޑު ފެނިގެން ގޮސްފައިވާއިރު، ސްޕޭނުން ވަނީ ފާއިތުވި 38 މެޗުން ބަލިނުވެ، ޔޫރަޕްގެ ޓީމަކުން ހެދި އެންމެ ދިގު ރެކޯޑްވެސް މުގުރާލާފައެވެ.