''އެމެރިކާ އާއި އިސްރާއީލުގެ މަޅީގައި އީރާނުން ނުޖެހޭނެ''

އެމެރިކާ އާއި އިސްރާއީލުން އީރާނާ މެދު ގެންގުޅޭ ދުޝްމަންކަން ދެމިއޮތްހާ ހިނދަކު، ބޭރުގެ ގައުމުތަކާއެކު ކުރެވޭ މަޝްވަރާތަކުގެ މަޅީގައި އީރާނު ނުޖެހޭނެ ކަމަށް ތެހެރާންގެ ޔުނިވަރސިޓީ އޮފް އެޕްލައިޑް ސައިންސް އެންޑް ޓެކްނޮލޮޖީގެ ޕްރޮފެސަރެއް ކަމަށްވާ މުސްތަފާ ޚޯޝްޗޭޝްމް ވިދާޅުވެއްޖެއެވެ.

އޭނާ ވިދާޅުވެފައިވާ ގޮތުގައި އީރާނުގެ ކުރީގެ ރޫހާނީ ލީޑަރ އާޔަތުﷲ ޢަލީ ހަމަނާއީގެ ޖަނާޒާގައި ބައިވެރިވި މީހުންގެ ފަރާތުން ލިބުނު މެސެޖަކީ ވަރަށް ސާފު މެސެޖެކެވެ.

"އީރާނުގެ ރައްޔިތުންނަކީ ހޭލުންތެރި ބައެއް، އެމެރިކާ އާއި އިސްރާއީލުގެ ދުޝްމަންކަން ނިމުމަކަށް ނާންނަކަން އެމީހުން ދަނޭ" ޚޯޝްޗޭޝްމް އަލްޖަޒީރާއަށް ދެއްވި ބަސްދީގަތުމެއްގައި ވިދާޅުވެފަވެއެވެ.

އެކި ކަހަލަ އެއްބަސްވުންތަކުގެ ނަމުގައި ދައްކާ ދަޅަތަކަށް އީރާނުން ނުހެއްލޭނެ ކަމަށް ވެސް އޭނާ ވިދާޅުވިއެވެ.

ޚޯޝްޗޭޝްމް އިތުރަށް ވިދާޅުވި ގޮތުގައި، ނިއުކްލިއާ އެއްބަސްވުމަކަށް އާދެވުނު ކަމުގައި ވިޔަސް، އީރާނާ ދެކޮޅަށް ހިންގާ އުދުވާނީ އަމަލުތައް ހުއްޓުމަކަށް އަންނާނެ ކަމަށް ރައްޔިތުން ގަބޫލެއް ނުކުރެއެވެ. ކުރިއަށް އޮތް މަސްތަކުގައި އެއްބަސްވުމެއްގައި ސޮއިކުރި ނަމަވެސް، އިގްތިސާދީ ދަތިކުރުމުގެ ފިޔަވަޅުތަކާއި، ސައިބަރ ހަމަލާތަކާއި، އަދި އަސްކަރީ ހަމަލާތަކުގެ ސިފައިގައި އެމެރިކާ އާއި އިސްރާއީލުގެ ނުފޫޒު ފޯރުވުން ކުރިއަށްދާނެ ކަމަށް އޭނާ ލަފާކުރެއްވިއެވެ.

Full video of the funeral prayer for the pure bodies of the martyred members of the family of the martyred Leader of the Islamic Revolution: Martyr Dr. Misbah al-Huda Bagheri Kani, Martyr Sayyida Bushra Khamenei, and Martyr Zahra Haddad Adel#WeMustRise#MartyrKhamenei pic.twitter.com/MooMB96B0G

— Khamenei Media (@Khamenei_m) July 5, 2026

މަރްޙޫމް ޢަލީ ހަމަނާއީގެ ޖަނާޒާގައި ގިނަ އަދަދެއްގެ ރައްޔިތުން ބައިވެރިވުމުން ދޭހަވަނީ ސަރުކާރަށް އޮތް ތާއީދު ކަމަށް ވެސް އޭނާ ފާހަގަކުރެއްވިއެވެ.

"އީރާނުގެ ރައްޔިތުން އެ ދައްކައިދެނީ އެމީހުން ސާބިތުކަމާއެކު ތިބިކަން. އަދި ރޫހާނީ ލީޑަރުގެ ލަނޑުދަނޑިތައް ހާސިލްކުރުމުގައި އެމީހުން ދެމިތިބޭނެކަން" ޚޯޝްޗޭޝްމް ވިދާޅުވިއެވެ.

އީރާނުގެ ކަމާބެހޭ ފަރާތްތަކާއި ދައުލަތުގެ މީޑިއާތަކުން ރިޕޯޓްކުރާ ގޮތުގައި، މަރްޙޫމް އާޔަތުﷲ އަލީ ޚާމަނޭއީގެ ޖަނާޒާގެ ރަސްމިއްޔާތުތަކުގައި ހަމައެކަނި ތެހެރާނުންވެސް 15-20 މިލިއަނަށްވުރެ ގިނަ މީހުން ބައިވެރިވާނެ ކަމަށް ބެލެވެއެވެ. އަދި މުޅި އީރާނާއި އިރާގުގެ ބައެއް ސަރަހައްދުތަކުން ޖުމްލަ 30 މިލިއަނަށްވުރެ ގިނަ މީހުން ބައިވެރިވުން އެކަށީގެންވެއެވެ. މިއީ ތާރީޚުގައިވެސް އެއްތަނަކަށް އެންމެ ގިނަ މީހުން އެއްވި އެއް ހަރަކާތަށް ވެގެންދާނެއެވެ.

2026 ޖުލައި 4 ނުވަތަ 5 ހިސާބުގައި ފެށިގެން އެތައް ދުވަހަކަށް ދެމިގެންދާ މި ހަރަކާތްތަކުގެ ތެރޭގައި ތެހެރާން، ގޮމް، މަޝްހަދު އަދި އިރާގުގެ ޝިއައީންގެ މުުގައްދަސް ބައެއް ބިނާތަކަށް ހަށިކޮޅު ގެންދިއުން ހިމެނެއެވެ. މި ހަރަކާތްތަކުގައި އާދަޔާ ހިލާފަށް ގިނަ އަދަދެއްގެ މީހުން ބައިވެރިވަމުންދާއިރު، ސަލާމަތީ ކަންކަން ވަނީ ވަރުގަދަކޮށްފައެވެ. މީގެ އިތުރުން ބޭރު ގައުމުތަކުގެ ވަފުދުތަކާއި، ދެކޮޅުވެރިކަމުގެ ޝިއާރުތައް ފާޅުކުރާ އަޑުތައް ދަނީ އިވެމުންނެވެ. އީރާނުގެ އޮފިޝަލުން މި ހަރަކާތް ސިފަކުރައްވަނީ އެއްބައިވަންތަކަން ދައްކުވައިދޭ ތާރީޚީ ހަރަކާތެއްގެ ގޮތުގައެވެ.

މިފަދަ ހަރަކާތްތަކުގައި ބައިވެރިވާ މީހުންގެ ސީދާ އަދަދު ކަށަވަރުކުރުމަކީ ދަތި ކަމެއް ނަމަވެސް މިއީ އީރާނުގެ މިންގަނޑުތަކުން ބަލާއިރުވެސް މީގެ ކުރިން ފެނިފައިނުވާ ފަދަ ބޮޑު އެއްވުމެކެވެ.