އިންޑިއާއިން މިސައިލް ޓެސްޓުކުރާތީ "ޗައިނާގެ ޖާސޫސީ މަނަވަރުތައް" ރާއްޖެ ހިމެނޭހެން އިންޑިއާ ކަނޑަށް!

މިސައިލް ތަޖުރިބާ ފަސްކުރަން ޖެހުނު މައިގަނޑު ސަބަބަކީ ޗައިނާގެ މި ޖާސޫސީ އުޅަނދުތަކަށް މިސައިލް ދަތުރުކުރާ މަގާއި، ޓެލެމެޓްރީ ޑޭޓާ ފަދަ ވަރަށް ސެންސިޓިވް މައުލޫމާތުތައް ރެކޯޑުކުރުމުގެ ގާބިލިއްޔަތުކަން ލިބިފައިވުމެވެ. މިފަދަ މައުލޫމާތުތައް ޗައިނާއަށް ލިބިއްޖެނަމަ، އިންޑިއާގެ މިސައިލް ޕްރޮގްރާމްގެ ސިއްރުތައް ހާމަވެ، ގައުމީ ސަލާމަތަށް ބޮޑު ނުރައްކަލެއް ކުރިމަތިވެދާނެއެވެ. އެހެންކަމުން، މިސައިލް ތަޖުރިބާގެ ސިއްރު ހިފެހެއްޓުމަށްޓަކައި، އިންޑިއާއިން ވަގުތީ ގޮތުން މި މަސައްކަތް ވަނީ ހުއްޓާލާފައެވެ.

މީގެ ކުރިންވެސް އިންޑިއާއިން މިފަދަ ތަޖުރިބާތައް ކުރަން އުޅޭ ކޮންމެ ފަހަރަކު، ޗައިނާގެ އުޅަނދުތައް މި ސަރަހައްދަށް އައިސްފައިވާކަން ފާހަގަކުރެވެއެވެ. މިފަދަ ހަރަކާތްތަކަކީ އިންޑިއާގެ އަސްކަރީ ހަރަކާތްތަކަށް ފާރަލުމަށް ޗައިނާއިން ކުރާ މަސައްކަތުގެ ބައެކެވެ. މިފަދަ އުޅަނދުތަކުގެ ސަބަބުން އިންޑިއާގެ ދިފާއީ ޕްރޮގްރާމްތަކަށް ބޮޑެތި ގޮންޖެހުންތަކެއް ކުރިމަތިވެއެވެ.

އިންޑިއާއިން މިސައިލް ތަޖުރިބާ ކުރުމަށްޓަކައި ޑިސެމްބަރު 1 އިން 4 އަށް ވަނީ ނޯޓަމް (NOTAM) އެއް ނެރެފައެވެ. މި މުއްދަތުގައި 3،484 ކިލޯމީޓަރުގެ ސަރަހައްދެއް ވަނީ ނޯ-ފްލައި ޒޯނެއްގެ ގޮތުގައި ކަނޑައަޅާފައެވެ.

އިންޑިއާ ކަނޑު ސަރަހައްދުގައި މިހާރުވެސް ޗައިނާގެ ހަތަރު ޖާސޫސީ އުޅަނދު ހަރަކާތްތެރިވަމުންދެއެވެ. އޭގެ ތެރެއިން 'ޝީ ޔަން 6' ނަމަކަށް ކިޔާ ޖާސޫސީ އުޅަނދު ވަނީ އެންޑަމަން އަދި ނިކޯބާރ ރަށްތަކުގެ ކައިރީގައި މަޑުކޮށްފައެވެ. މި އުޅަނދު އިންޑިއާ ކަނޑަށް ވަދެފައިވަނީ މަލައްކާގެ ހަނިކަނޑު ހުރަސްކޮށެވެ. ދެވަނަ ޖާސޫސީ އުޅަނދު ކަމަށްވާ 'ޝެން ހެ ޔީ ހާއޯ' ހަރަކާތްތެރިވަނީ އެންޑަމަން އަދި ނިކޯބާރ ރަށްތަކުގެ ދެކުނު ސަރަހައްދުގައެވެ. މީގެ އިތުރުން ތިންވަނަ ޖާސޫސީ އުޅަނދު 'ލަން ހާއި 201' ވަނީ ދިވެހިރާއްޖޭގެ ކައިރީގައި މަޑުކޮށްގެން ކަނޑުގެ ސާވޭތައް ހަދަމުންނެވެ. ހަތަރުވަނަ އުޅަނދު ކަމަށްވާ 'ލަން ހާއި 101' ވަނީ މަލައްކާގެ ހަނިކަނޑު ހުރަސްކޮށް އިންޑިއާ ކަނޑާ ދިމާލަށް ދަތުރުކުރަނިކޮށް ފެނިފައެވެ.

ޗައިނާއިން އޭގެ ޖާސޫސީ އުޅަނދުތަކަށް ކިޔަނީ ސާވޭ އުޅަނދު ކަމަށާއި، މި އުޅަނދުތަކުން ޖާސޫސީ މަސައްކަތް ނުކުރާ ކަމަށް ބުނެ އެ ގައުމުން ވަނީ ތަކުރާރުކޮށް ދޮގުކޮށްފައެވެ. ނަމަވެސް، ޗައިނާއިން މި އުޅަނދުތައް ބޭނުންކުރަނީ އަސްކަރީ އަދި ސައިންސުގެ ބޭނުންތަކަށް ކަމަށް އިންޑިއާއިން ތުހުމަތުކުރެއެވެ. މީގެ ތެރޭގައި ކަނޑުތަކުގެ މެޕް ހެދުމާއި، ވައިގެ މަގުން ހޯދާ މައުލޫމާތުތައްވެސް ހިމެނެއެވެ. މި އުޅަނދުތަކުގައި ހަރުކޮށްފައިވާ ނިޒާމުތަކުގެ ސަބަބުން ދުޝްމަނުންގެ ވައިގެ ދަތުރުތައް މޮނިޓަރ ކުރެވޭނެއެވެ. އަދި ސޮނަރ ސިގްނަލްތައް ދެނެގަނެ، ހަނގުރާމަ ބޯޓުފަހަރުގެ އަދި ސަބްމެރީންތަކުގެ ކޯލް ސައިންތައް ވެސް ދެނެގަނެވޭނެއެވެ. މީގެ އިތުރުން ވައިގެ މަގުން ދޫކުރާ މިސައިލްތަކުގެ ސްޕެސިފިކޭޝަންތަކާ ބެހޭ މައުލޫމާތުވެސް އެއްކުރެވޭނެއެވެ.