ދުންފަތުން ރައްކާތެރިކުރެވިފައިވާ ޖީލެއް ބިނާކުރުމަށް "ޖެނެރޭޝަނަލް ބޭން" ތަޢާރަފްކޮށްފި އެވެ.

ރައީސް އޮފީހުން މިއަދު "ވަޒީރުންގެ މަޖިލީހުގެ ނިންމުންތައް" އިޢުލާނުކުރަމުން ވިދާޅުވީ، ދިވެހިރާއްޖޭގައި ދުންފަތުން ރައްކާތެރިކުރެވިފައިވާ ޖީލެއް ބިނާކުރުމަށްޓަކައި "ޖެނެރޭޝަނަލް ބޭން" އެއް ތަޢާރަފްކުރުމަށް ސަރުކާރުން ނިންމާފައިވާ ކަމަށެވެ.

Ad
rt

މި ނިންމުމުގެ ދަށުން، 2007 ވަނަ އަހަރުގެ ޖަނަވަރީ 1 ވަނަ ދުވަހުން ފެށިގެން އުފަންވެފައިވާ އަދި އުފަންވާ ހުރިހާ ކުދިންނަށް ދުންފަތުގެ ބާވަތްތައް ގަތުމާއި، ވިއްކުމާއި، އަދި އިސްތިޢުމާލުކުރުން މަނާކުރެވޭނެއެވެ.

މިއަދު ކެބިނެޓް ބައްދަލުވުމުގެ ކުރިން އާންމުކުރެއްވި ވީޑިއޯ މެސެޖެއްގައި، ރައީސް ޑރ. މުޙައްމަދު މުޢިއްޒު ވިދާޅުވި ގޮތުގައި، މި ފިޔަވަޅަކީ ރާއްޖޭގައި ގައިންގަޔަށް ނާރާ ބަލިތައް ފެތުރުމާއި ނުކުޅެދުންތެރިކަމަށް ހުށަހެޅުމުގެ އެންމެ ބޮޑު ސަބަބު ކަމުގައިވާ ދުންފަތުގެ އިސްތިޢުމާލުކުރުން ހުއްޓުވުމަށް އަޅާ މުހިންމު ފިޔަވަޅެއް ކަމުގަ އެވެ. 2022 ވަނަ އަހަރު ރާއްޖޭގައި ހެދުނު ދިރާސާއަކުން ދައްކާ ގޮތުގައި، ރާއްޖޭގައި 84 ޕަސެންޓު މީހުން މަރުވަނީ ދުންފަތުގެ އިސްތިޢުމާލުކުރުމުގެ ސަބަބުން ޖެހޭ ގައިންގަޔަށް ނާރާ ބަލިތަކުންނެވެ.

މި "ޖެނެރޭޝަނަލް ބޭން" ތަންފީޒުކުރުމަށްޓަކައި، ސަރުކާރުން ޤާނޫނާއި ގަވާއިދުތަކަށް ގެންނަންޖެހޭ އިޞްލާޙުތައް ގެނައުމަށް ނިންމާފައިވެއެވެ. މި ގޮތުން، ޤާނޫނަށް އިޞްލާޙު ގެނެސް ތަޞްދީޤުކުރާ ތާރީޚުން ފެށިގެން 6 މަސްދުވަހުގެ މުއްދަތެއް ދިނުމަށްފަހު، 2025 ވަނަ އަހަރުގެ ނޮވެންބަރު 1 ވަނަ ދުވަހުން ފެށިގެން މި ޤާނޫނު ތަންފީޒުކުރަން ފެށުމަށް ވަނީ ނިންމާފައެވެ.

މީގެ އިތުރުން، ޓޮބޭކޯ ސިޒޭޝަންގެ ޚިދުމަތްތައް އިތުރަށް ހަރުދަނާކުރުމަށްޓަކައި، މިނިސްޓްރީ އޮފް ފިނޭންސް އެންޑް ޕްލޭނިންގ އިން މިނިސްޓްރީ އޮފް ހެލްތަށް ބޭނުންވާ އެހީތެރިކަން ފޯރުކޮށްދިނުމަށްވެސް ވަނީ ނިންމާފައެވެ.

ރައީސް މުޢިއްޒު ވިދާޅުވި ގޮތުގައި، މިހާރު ރާއްޖޭގެ އާބާދީގެ 30.1 އިންސައްތަ އަކީ 2007 ވަނަ އަހަރުގެ ޖަނަވަރީ 1 ވަނަ ދުވަހުން ފެށިގެން އުފަންވެފައިވާ މީހުންނެވެ. މި "ޖެނެރޭޝަނަލް ބޭން" ގެ ސަބަބުން، މި ބޮޑު އާބާދީއެއް ދުންފަތުގެ ނޭދެވޭ އަސަރުތަކުން ސަލާމަތްކުރެވޭނެ ކަމަށް ސަރުކާރުން އުންމީދުކުރެއެވެ.

މި ނިންމުމަކީ ރާއްޖޭގެ ޒުވާނުންނާއި މުޅި އާބާދީ ދުންފަތުގެ އިސްތިޢުމާލުކުރުމުގެ ސަބަބުން ޖެހޭ ގައިންގަޔަށް ނާރާ ބަލިތަކުން، ޚާއްޞަކޮށް ކެންސަރު އަދި ހިތުގެ ބަލިތަކުން ސަލާމަތްކުރުމަށް އަޅާ މުހިންމު ފިޔަވަޅެއް ކަމުގައި ރައީސް މުޢިއްޒު ފާހަގަކުރެއްވިއެވެ.

މި ނިންމުމާ ގުޅިގެން، ކަމާ ގުޅުންހުރި އެކި ފަރާތްތަކުގެ ޚިޔާލު ހޯދާފައިވާ ކަމަށާއި، ދުޅަހެޔޮ ޖީލެއް ބިނާކުރުމަށްޓަކައި މި "ޖެނެރޭޝަނަލް ބޭން" އަކީ ވަރަށް މުހިންމު ފިޔަވިޔަވަޅެއްކަން ރައީސް މުޢިއްޒު ފާހަގަކުރެއްވިއެވެ.

މި ނިންމުމުގެ އަސަރު ފެންނަން ފަށާނީ ދިގު މުއްދަތެއްގެ ތެރޭގައި ކަމުގައިވިޔަސް، މިއީ ރާއްޖޭގެ ދުޅަހެޔޮ ޞިއްޙަތަށާއި އިޤްތިޞާދަށް ވަރަށް ބޮޑު ފައިދާތަކެއް ކުރާނެ ފިޔަވަޅެއް ކަމަށް ސަރުކާރުން ބެލެވެއެވެ. މި ފިޔަވަޅުގެ ސަބަބުން، ދުންފަތުގެ އިސްތިޢުމާލުކުރުމުގެ ސަބަބުން ޖެހޭ ބަލިތަކަށް ޚަރަދުކުރަންޖެހޭ ފައިސާ ސަލާމަތްވެ، އެ ފައިސާ ޤައުމު ތަރައްޤީކުރުމަށް ބޭނުންކުރެވޭނެ ކަމަށް ބެލެވެއެވެ.