ޓްރަމްޕް އާއި މޯދީ ވިޔަފާރީގެ ގުޅުން ހަރުދަނާކުރުމަށް މަޝްވަރާކޮށްފި

ޓްރަމްޕް އާއި މޯދީ ދެ ގައުމުގެ ވިޔަފާރީގެ ގުޅުން ހަރުދަނާކުރުމަށް މަޝްވަރާކޮށްފިއެވެ.

އެމެރިކާގެ ރައީސް ޑޮނަލްޑް ޓްރަމްޕް އަދި އިންޑިއާގެ ބޮޑުވަޒީރު ނަރެންދްރަ މޯދީ، ދެ ގައުމުގެ ވިޔަފާރީގެ ގުޅުން ހަރުދަނާކުރުމަށް މަޝްވަރާކުރުމަށް އެއްބަސްވެފައިވާއިރު، ވައިޓް ހައުސްގައި ބޭއްވުނު ބައްދަލުވުމުގައި، އިންޑިއާއިން އެމެރިކާގައި އުފައްދާ އިތުރު ހަނގުރާމަވެރި މަތިންދާބޯޓާއި، ތެޔޮ އަދި ގޭސް ގަތުމަށް އެއްބަސްވިއެވެ.

ޓްރަމްޕް ވިދާޅުވި ގޮތުގައި އިންޑިއާއަށް އެފް-35 ސްޓެލްތް ފައިޓަރ ޖެޓް ވިއްކުމުގެ މަގު ތަނަވަސްކުރެވޭނެއެވެ. އަދި އިންޑިއާއިން އެމެރިކާއާއެކު ކުރާ ވިޔަފާރި 2030 ވަނަ އަހަރާ ހަމައަށް ދެގުނަ ކުރުމަށް ބޭނުންވާކަމަށް މޯދީ ވިދާޅުވިއެވެ.

އިންޑިއާގެ އިމްޕޯޓް ޑިއުޓީތައް "ވަރަށް މަތި" ކަމަށް މި ބައްދަލުވުމުގައި ޓްރަމްޕް ފާހަގަކުރެއްވިއެވެ. އެހެންނަމަވެސް މި މައްސަލަ ހައްލުކުރުމަށް ދެ ފަރާތުން މަޝްވަރާކުރުމަށް އެއްބަސްވެފައިވެއެވެ.

މީގެ އިތުރުން، ދެ ލީޑަރުން އިންޑޯ-ޕެސިފިކް ސަރަޙައްދުގައި ސަލާމަތީ އެއްބާރުލުން އިތުރުކުރުމަށާއި، އާޓިފިޝަލް އިންޓެލިޖެންސް އަދި ނިއުކްލިއަރ ހަކަތައިގެ ދާއިރާއިން ގުޅިގެން މަސައްކަތްކުރުމަށް އެއްބަސްވިއެވެ.

އެމެރިކާއާއި އިންޑިއާއާގެ ވިޔަފާރީގެ ޑެފިސިޓް 45.6 ބިލިއަން ޑޮލަރުގައި ހުރިއިރު، އިންޑިއާގެ އިމްޕޯޓް ޑިއުޓީގެ ރޭޓް ހުރީ 12 ޕަސެންޓުގައެވެ. އެކަމަކު އެމެރިކާގެ ރޭޓް ހުރީ 2.2 ޕަސެންޓުގައެވެ.

މި ދަތުރުފުޅުގައި މޯދީ، ޓެސްލާގެ ސީއީއޯ އީލޮން މަސްކްއާވެސް ބައްދަލުކުރެއްވިއެވެ. އަދި އެމެރިކާގެ ޑިރެކްޓަރ އޮފް ނެޝަނަލް އިންޓެލިޖެންސް ޓުލްސީ ގަބާޑްއާ ބައްދަލުކުރައްވައި، ޓެރަރިޒަމާ ދެކޮޅަށް މަސައްކަތްކުރުމާއި ސައިބަރ ސެކިއުރިޓީގެ އެއްބާރުލުން އިތުރުކުރުމާ ބެހޭގޮތުން ވެސް މަޝްވަރާކުރެއްވިއެވެ.