މާލޭގައި ދިރިއުޅޭ ރައްޔިތުންގެ ފެނާއި ކަރަންޓު ބިލަށް ލުޔެއް ދިނުމަށް މޭޔަރު ގޮވާލައިފި

މުއިއްޒު މިހެން ގޮވާލެއްވީ، މާލޭގެ ކޯވިޑްގެ ހާލަތު އިހުނަށްވުރެއް ގޯސްވެ ވަކި ގަޑިތަކެއްގައި ކާފިއު ހިންގާފައިވާ ދަނޑިވަޅެއްގައެވެ.

މިރޭ ކުރެއްވި ޓްވީޓެއްގައި މުއިއްޒު ވިދާޅުވީ ކޯވިޑް 19 ގެ ނުރައްކާތެރި މި ޙާލަތުގައި، މާލޭގައި ގިނަ ވަގުތު ކާފިޔު އިޢުލާންކޮށްފައި އޮންނާތީ، ގިނަ ބައެއްގެ ޢާމްދަނީއަށް އަސަރުކޮށްފައިވާ ކަމަށެވެ.

"މާލޭގައި ދިރިއުޅޭ ރައްޔިތުންގެ ފެނާއި ކަރަންޓު ބިލަށް ލުޔެއް ދިނުމަށް ގޮވާލަން"

ސްޓެލްކޯ އާއި އެމްޑަބްލިއުއެސްސީ ޓެގް ކުރައްވާ މުއިއްޒު ގޮވާލާފައިވެއެވެ.

ކޮވިޑްގެ ނުރައްކާ މިދިޔަ އަހަރު ރާއްޖޭގައި ބޮޑުވިއިރު ސަރުކާރުން ވަނީ 2 މަސް ދުވަހަށް ފެނާއި ކަރަންޓު ބިލު ކުޑަކޮށްދީފައެވެ.

މާލެ ސަރަހައްދުގައި ހަލުވިކަމާއެކު ކޮވިޑް ފެތުރެމުންދާއިރު ފާއިތުވި 24 ގަޑިއިރު ރާއްޖެއިން ވަނީ 1،603 މީހުން ކޯވިޑް-19އަށް ޕޮޒިޓިވްވެ، މިވަގުތު ފަރުވާހޯދަމުންދާ މީހުންގެ ޢަދަދު 21،000 އިން މައްޗަށް އަރާފަ އެވެ.

އަލަށް ޕޮޒިޓިވްވި މީހުންގެ ތެރޭގައި ގިނައީ މާލެ ސަރަހައްދުން ޕޮޒިޓިވްވި މީހުންނެވެ. ކޯވިޑް-19އަށް ޕޮޒިޓިވާ މީހުންގެ ޢަދަދު އިންތިހާއަށް އިތުރުވެފައިވާއިރު، ބަލިޖެހިގެން ފަރުވާ ހޯދާ މީހުންގެ ޢަދަދުވެސް މިހާރުވަނީ 21،079 އަށް އަރާފައެވެ. މިވަގުތު އެޑްމިޓްކޮށްގެން ފަރުވާ ދެމުންދަނީ 286 މީހުންނަށެވެ.