މިމަހުގެ 10 ވަނަ ދުވަހު އޮތް ލޯކަލް ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ އިންތިހާބުގައި ނަތީޖާ ފަރަގު ކުޑަކޮށް ހުރި ގޮނޑިތައް އެމްޑީޕީއަށް ލިބޭ ގޮނޑިތަކެއް ކަމަށް ނިންމަމުންދާ ކަމަށާއި، އެހެން އެކަން ކުރިނަމަވެސް ރައްޔިތުންނަށް ވާނުވާ އިނގޭ ކަމަށް ދިއްދޫ ދާއިރާގެ ކުރީގެ މެންބަރު އަބުދުއްލަޠީފް މުޙައްމަދު ވިދާޅުވެއްޖެއެވެ.

މިހާރު އިދިކޮޅު ކޯލިޝަނާއިއެކު އިސްސަފުގައި މަސައްކަތް ކުރަށްވާ ލަޠީފް މި މޭރުމުން ވިދާޅުވީ، މިރޭ ކުރެއްވި ޓްވީޓެއްގަ އެވެ.

Ad
rt

ލަޠީފް ވަނީ އެ ޓްވީޓްގައި މަޖިލިސް ރައީސް އަދި އެމްޑީޕީގެ ރައީސް މުޙައްމަދު ނަޝީދަށް އަމާޒުކޮށް ''ނަޝީދު ބާވެއްޖެ ކަމަށް'' ވެސް ވިދާޅުވެފަ އެވެ. އަދި ''މޮޔަނުވުމަށް'' ވެސް އޭނާ ވަނީ ވިދާޅުވެފަ އެވެ.

ލަޠީފް ވަނީ މިރޭ އެ މައުލޫއަށް އިތުރު ޓްވީޓެއް ވެސް ކުރަށްވާފަ އެވެ. އެ ޓްވީޓްގައި ވެސް ބަހުގެ ހަމަލާ އަމާޒުކުރަށްވާފައި ވަނީ، ރައީސް ނަޝީދަށެވެ. އޭނާ ވިދާޅުވީ އިންތިޚާބުން ބަލިވީމާވެސް ނަޝީދު އުޅުއްވަނީ ބަލި ޤަބޫލު ނުކުރަށްވާ އިލެކްސަން ކޮމިޝަންގެ ރައީސް އަޙްމަދު ޝަރީފްއާއި ގުޅިގެން އިންތިޚާބު ވަގަށް ނަގަން ކަމަށެވެ.

''ބަލިވީމަ ބަލި ޤަބޫލުކޮށް މައިތިރިވެބަލަ'' ލަޠީފް ވިދާޅުވެފަ ވެއެވެ.

ލަޠީފް މި މޭރުމުން ޓްވީޓްތަކެއް ކުރަށްވާފައި މިވަނީ، ލޯކަލް ކައުންސިލް އިންތިހާބުގައި ވޯޓު ބާތިލްކަމަށް ކަނޑައެޅި ގޮތާއިމެދު ހިތްހަމަނުޖެހި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ބައެއް ދާއިރާތަކުގެ މައްސަލަ ކޯޓަށް ހުށަހެޅުމަށް ނިންމާފައިވާ ކަމަށް މިރޭ ޚަބަރުތައް ފެތުރިފައި ވަނިކޮށެވެ.

އިންތިޚާބު ނަތީޖާ ފުރަތަމަ ލިބެމުން ދިޔައިރު ލަޠީފް ނިސްބަތްވާ ދިއްދޫ ދާއިރާއިން އެމްޑީޕީއޮތީ ބަލިކޮށެވެ. ނަމަވެސް ވަގުތީ ނަތީޖާ ޢިއުލާން ކުރިއިރު ދިއްދޫގެ 7 ގޮނޑި ތެރެއިން 5 ގޮނޑި އެމްޑީޕީ ވަނީ ކަށަވަރުކޮށްފަ އެވެ. ޕީޕީއެމްއަށް ދިއްދޫން ލިބުނީ ރަށު ކައުންސިލް ރައީސްގެ ގޮނޑިއާއި، މެންބަރެއްގެ ގޮނޑިއެކެވެ.

އީސީން އާންމުކުރި އިންތިހާބުގެ ވަގުތީ ނަތީޖާއިން މާލެ ސިޓީން ޕީޕީއެމަށް 13 ގޮނޑި ލިބިފައި ވެއެވެ. އެމްޑީޕީއަށް ލިބިފައި ވަނީ 6 ގޮނޑި އެވެ. ޖުމްހޫރީ ޕާޓީއަށް 1 ގޮނޑި ލިބިފައި ވެއެވެ.

މީގެ އިތުރުން 11 އަތޮޅެއްގެ އަތޮޅު ކައުންސިލްގެ ރައީސް ކަމަށް އިންތިހާބުވެފައި ވަނީ އެމްޑީޕީގެ ކެންޑިޑޭޓުންނެވެ. ޕީޕީއެމަށް ލިބިފައިވަނީ 7 އަތޮޅެއްގެ އަތޮޅު ކައުންސިލްގެ މަގާމެވެ.