ހުސް މަޤާމުތަކަށާއި އައު މަޤާމު އުފައްދާ މުވައްޒަފުން ނެގުމުގެ ހުއްދަ ކައުންސިލްތަކަށް ސިވިލް ސާވިސް ކޮމިޝަނުން ދީފި އެވެ.
ކައުންސިލްގެ އިދާރާތަކުގެ އިދާރީ އޮނިގަނޑުގައި ހުރި ހުސް މަޤާމުތަކަށް މުވައްޒަފުން ނެގުމާއި، އިދާރާތަކަށް އައު މަޤާމު އުފައްދައިދިނުން ވަގުތީ ގޮތުން މަޑުޖައްސާލުމަށް އަންގާފައިވާ އެންގުން ނިމުމަކަށް ގެނެސް މަޤާމުތަކަށް މުވައްޒިފުން ނެގޭގޮތް ހަދައިފައިވަނީ މިއަދު އެކޮމިޝަނުން ކައުންސިލްތަކަށް ފޮނުވި ސާރކިއުލަރ އަކުންނެވެ.
ސިވިލްސާވިސް ކޮމިޝަނުން ފޮނުވާފައިވާ ސާރކިއުލަރގައި ބުނެފައިވަނީ އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރުކުރުމުގެ ޚާއްޞަ ޤާނޫނުގެ ދަށުން ލޯކަލް ގަވަރމަންޓް އޮތޯރިޓީން ހޯދަންޖެހޭ ހުއްދައާއި މާލިއްޔަތާބެހޭ ސަރކިއުލަރގެ ދަށުން މިނިސްޓްރީ އޮފް ފިނޭންސުން ހޯދަންޖެހޭ ހުއްދަ ހޯދުމަށް ފަހު، ކައުންސިލްގެ އިދާރާތަކުގެ މަޤާމުތަކަށް މުވައްޒަފުން ހޯދުމުގެ މަސައްކަތް "ސިވިލް ސަރވިސްގެ ވަޒީފާތަކަށް މީހުން ހޮވުމާއި ޢައްޔަންކުރުމުގެ މިންގަނޑުތަކާއި ޢުޞޫލުތައް" އާ އެއްގޮތްވާ ގޮތުގެ މަތިން ކުރިއަށް ގެންދެވުމަށް ކައުންސިލްތަކަށް ދަންނަވާކަމަށެވެ.
ކައުންސިލްގެ އިދާރާތަކުގެ އިދާރީ އޮނިގަނޑުގައިވާ ހުސް މަޤާމުތަކަށް މުވައްޒަފުން ނެގުން ވަގުތީގޮތުން މަޑުޖައްސާލާފައި ވަނީ މިއަހަރުގެ ފެބުރުއަރީ މަހުގެ 6 ވަނަ ދުވަހުގައެވެ. މުވައްޒިފުން ނެގުން މަޑުޖައްސާލާފައި ވަނީ ކައުންސިލްތަކުގެ އިދާރީ ހިންގުން ހައިބްރިޑް މޮޑެލްއަށް ބަދަލުކުރުމާ ގުޅޭ މަސައްކަތް ލޯކަލް ގަވަރމަންޓް އޮތޯރިޓީއާއި ސީއެސްސީ އާއި ގުޅިގެން ކުރިއަށްގެންދިއުމަށެވެ.
އަދި ކައުންސިލް އިދާރާތަކުގެ އިދާރީ އޮނިގަނޑުތައް ރިވިއުކުރުމުގެ މަސައްކަތްވެސް ސީއެސްސީން ވަނީ މިމުއްދަތުގެ ތެރޭގައި ކޮށްފައެވެ. ނަމަވެސް، ކައުންސިލްގެ އިދާރާތަކުން ފޯރުކޮށްދެމުންދާ ޚިދުމަތްތައް މެދުނުކެނޑި ކުރިޔަށްގެންދިޔުމަށް ކޮންމެހެން ބޭނުންވާ މަގާމުތަކަށް މީހުން ހޯދުން ކޮމިޝަނުގެ ހުއްދައާއެކު ކުރިއަށް ގެންދިއުމަށް އޭރުވެސް ވަނީ ހުއްދަ ދެއްވާފައެވެ.
ލޯކަލް ގަވަމަންޓް އޮތޯރިޓީން ހޯދަން ޖެހޭ ހުއްދަ އާއި ފިނޭންސް މިނިސްޓްރީން ހޯދަންޖެހޭ ހުއްދަ ހޯދުމަށް ފަހު ކައުންސިލް އިދާރާތަކުގެ ހުސް މަގާމުތަކަށް މީހުން ނެގުމުގެ މަސައްކަތް މިހާރު ކުރިއަށް ގެންދެވޭނެ ކަމަށް ސިވިލް ސާވިސް ކޮމިޝަނުން ވަނީ އަންގައިފަ އެވެ. މީގެ ކުރިން އޮންނަނީ ފިނޭސް އަދި އެލްޖީއޭގެ ހުއްދަ އޮތަސް ސިވިލްސަރވިސްގައި ސަލާންޖަހަން ޖެހޭ ގޮތަކުންނެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!