ހައިޟުވުމާ ގުޅިގެން 1 ދުވަހުގެ ޗުއްޓީއެއް ދޭން ލާޒިމްކޮށް ވަޒީފާއާބެހޭ ޤާނޫނަށް އިސްލާހެއް ހުށަހަޅާފައިވާނެކަމަށް ރައްޔިތުންގެ މަޖިލީހުގެ ފޮނަދޫ ދާއިރާގެ މެންބަރު މޫސާ ސިރާޖު ވި ދާޅުވެއްޖެއެވެ.
މި އިސްލާހުގައި ބުނެފައިވަނީ ވަޒީފާގެ ޤާނޫނުގައި ބުނާ ސަލާމުގެ ޗުއްޓީގެ އިތުރުން ކޮންމެ އަންހެން މުވައްޒަފަކަަށް ހައިޟުވުމާއި ގުޅިގެން ދެވޭ ޗުއްޓީގެ ގޮތުގައި މުސާރަ ލިބޭގޮތަށް ކޮންމެ މަހަކު 1 ދުވަހުގެ ޗުއްޓީއެއް ދޭންވާނެ ކަމަށެވެ.
މި ޗުއްޓީއަށް އެދޭ މުވައްޒަފު އެ ޗުއްޓީ ހައްގުކަން ސާބިތު ކޮށްދިނުމަށް އެއްވެސް ލިޔުމެއް ހުށަހަޅަން ނުޖެހޭނެ
މޫސާ ސިރާޖު ހުށައެޅި އިސްލާހުގައި ބުނެފައި ވެއެވެ.
މީގެ އިތުރުން ދެވޭ ޗުއްޓީގެ ބޭނުން ނުކޮށް ވަޒީފާއަށް ނުކުންނަ ނަމަ ކޮންމެ މަހަކު ދެވޭ މުސާރައިގެ އިތުރުން އެ މުވައްޒަފުންގެ އަސާސީ މުސާރައިން އެއް ދުވަހަށް ޖެހޭ މިންވަރު އެމުވައްޒަފަަކަށް ދޭންވާނެ ކަމަށްވެސް އިސްލާހުގައި ބުނެފައި ވެއެވެ.
މި އިސްލާހު ގެންނަން ހުށަހެޅި ބޭނުމެއް ކަމަށް ބިލުގައި ސިރާޖު ވިދާޅުވެފައިވަނީ، އަންހެން މުވައްޒަފުން ހައިޟުވާ ދުވަސްވަރު އުފުލާ ތަކުލީފުތައް ގަބޫލުކޮށް ހައިޟުގެ މުއްދަތުގައި ޗުއްޓީ ދިނުމަކީ ތަހުޒީބު މުޖުތަމައުތަކުގައި ބަލައިގަނެ އަމަލު ކުރަމުން އަންނަ އުސޫލަކަށްވާތީ ކަމަށެވެ.
އޭގެ އިތުރުން އެ އުސޫލު ރާއްޖޭގައި ކަނޑައެޅިގެން ދިއުމަކީ ވަޒީފާ އަދާކުރާ އަންހެނުންނަށް ލިބޭ ލުޔަކަށް ވާނެތީ އާއި ވަޒީފާ އަދާކުރުމަށް އަންހެނުންނަށް ހިތްވަރަކަށް ވާތީ އެ އިސްލާހު ހުށަހެޅުއްވީ ކަމަށްވެސް މެންބަރު ވިދާޅުވެފައި ވެއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!