ކޯވިޑް-19 އާ ގުޅިގެން ފުރަބަންދުގެ މިދަނޑިވަޅުގައި، މާލެ ސަރަހައްދުގެ ގޭބީސީތަކުގެ ފެން މީޓަރު ފޮޓޯ އާއި ރީޑިން ފޮނުވޭނެ ހާއްސަ ފީޗާއެއް ގައުމީ ފެން ކުންފުނި، މޯލްޑިވްސް ވޯޓާ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ)ގެ މޯބައިލް އެޕްލިކޭޝަނަށް އިތުރު ކޮށްފިއެވެ.

އެމްޑަބްލިއުއެސްސީގެ މޯބައިލް އެޕްލިކޭޝަނަށް މި އިތުރު ކުރެވުނު ފީޗާގެ އެހީގައި އަމިއްލައަށް ފެން ބިލް ޖެނެރޭޓް ކުރެވޭނެ އިންތިޒާމުތައް މިހާރު ހަމަޖައްސާފައިވާ ކަމަށް އެ ކުންފުނިން ވަނީ ބުނެފައެވެ.

Ad
rt

އެ ކުންފުނިން ބުނީ، ފެން ބިލްގެ ރީޓިން އަޕްލޯޑް ކުރާތާ ކުޑަ ވަގުތުކޮޅެއްގެ ތެރޭގައި ފެން ބިލް ތައްޔާރުވެ، ކަސްޓަމަރުންނަށް އެ މައުލޫމާތުތައް ލިބޭނެ ކަމަށެވެ. މިގޮތަށް ފެން މީޓަރުގެ ފޮޓޯ އަޕްލޯޑް ކުރުމަށް ކަސްޓަމަރުންނަށް އެސްއެމްއެސް ނޯޓިފިކޭޝަން ފޮނުވާނެ އެވެ.

އެ ކުންފުނިގެ މޯބައިލް އެޕްލިކޭޝަނަށް ލޮގިން ވުމަށްފަހު، އެޕްގެ ހޯމް ސްކްރީން އިން ފެންނަ ރީނދޫ ކުލައިގެ ކެމެރާ އައިކަން އަށް ފިތުމުން އެޕްގައި ދީފައިވާ އިރުޝާދުތަކާ އެއްގޮތަށް މީޓަރުގެ ފޮޓޯ އަކާއި މީޓަރުގެ ޑައިލް އިން ފެންނަ އަށް ޑިޖިޓްގެ ނަންބަރު ޖަހަންޖެހޭނެ އެވެ. މި މައުލޫމާތުތައް ފޮނުވުމުން، ކުޑަ ވަގުތުކޮޅެއްގެ ތެރޭގައި ބިލް ތައްޔާރުވާނެ އެވެ.

މިގޮތަށް އެޕަށް އަޕްލޯޑް ކުރެވޭނީ، އެޕް މެދުވެރިކޮށް އެވަގުތުގައި ނަގާ ފޮޓޯ އެވެ. ފޯނުގެ ފޮޓޯ ގެލެރީން މި ފީޗާގެ ދަށުން ފޮޓޯ އަޕްލޯޑެއް ނުކުރެވޭނެ ކަމަށް އެކުންފުނިން ބުނެ އެވެ.
މިކަހަލަ ހާއްސަ ފީޗާއެއް ތައާރަފް ކުރެވުނީމުވައްޒަފުންނާއި ކަސްޓަމަރުންގެ ރައްކާތެރިކަމުގެ ފިޔަވަޅެއްގެ ގޮތުންނާއި، ކޯވިޑް-19 އާ ގުޅިގެން މާލެ ސަރަހައްދު ފުރަބަންދުގެ ހާލަތުގައި އެމްޑަބްލިއުއެސްސީގެ މުވައްޒަފުން ގޭގެއަށް ރީޑިން ނަގަން ދިއުމަކީ ކަސްޓަމަރުންނާއި މުވައްޒަފުން ނުރައްކަލަކަށް ހުށަހެޅިގެން ދާނެ ކަމަށް ވާތީއެވެ.
ރާއްޖޭގައި ޢިއުލާނު ކުރެވިފައިވާ ސިއްހީ ނުރައްކާތެރިކަމާއި ގުޅިގެން، ފެން ކުންފުނީގެ މުވައްޒަފުން ވީހާވެސް ބޮޑަށް ބޭރުގައި އުޅުން މަދުކުރަން އެޅޭ ފިޔަވަޅެއްގެ ގޮތުން އެ ކުންފުނިން ކުރިންވަނީ ފެން ބިލުތައް އެޕް މެދުވެރިކޮށް ފޯރުކޮށްދިނުމަށް ނިންމާފައެވެ.