އީރާނުގެ އަސްކަރީ މަރުކަޒުތަކަށް ޖާސޫސްކުރި ކަމުގެ ތުހުމަތުގައި އިސްރާއީލުގެ ޖާސޫސީ އިދާރާ، މޮސާޑާ ގުޅުން އޮތް 21 މީހަކު ހައްޔަރުކޮށްފައިވާ ކަމަށް އީރާނުން ބުނެފިއެވެ.
އީރާނުގެ މިނިސްޓްރީ އޮފް އިންޓެލިޖެންސުން ބުނި ގޮތުގައި މި މީހުން އަތުލައިގަނެފައިވަނީ އެ ގައުމުގެ އިރުދެކުނު ކަރްމާން ޕްރޮވިންސުންނެވެ.
ދައުލަތުގެ މީޑިއާތަކާއި އިންޓެލިޖެންސް އޮފިޝަލުން މި މީހުން ސިފަކޮށްފައިވަނީ "މޮސާޑް މާސިނަރީޒް" ނުވަތަ މޮސާޑަށް މަސައްކަތްކޮށްދޭ ކުލީ ސިފައިންގެ ގޮތުގައެވެ. މި މީހުންގެ މައްޗަށް ކުރެވޭ މައިގަނޑު ތުހުމަތަކީ ދައުލަތުގެ ނާޒުކު އަދި މުހިންމު ބިނާތަކުގެ މައުލޫމާތު ސިއްރުން އެއްކޮށް، އެ ތަންތަން ބަލައި ފާސްކުރުމެވެ.
އީރާނުގެ ކަމާބެހޭ ފަރާތްތަކުން ބުނާ ގޮތުގައި، މި ޖާސޫސީ ނެޓްވޯކުން ވަނީ ކަރްމާން ޕްރޮވިންސްގައި ހުރި އަސްކަރީ، ދިފާއީ އަދި ވައިގެ ދިފާއީ ނިޒާމުތަކާ ބެހޭ ކްލެސިފައިޑް މައުލޫމާތާއި އެ ތަންތަނުގެ ކޯޑިނޭޓްސް ހޯދާފައެވެ. އަދި މި މައުލޫމާތުތައް އިސްރާއީލުގެ ޖާސޫސީ އިދާރާތަކަށް ފޮނުވުމަށް އެމީހުން މަސައްކަތް ކުރި ކަމަށްވެސް ތުހުމަތު ކުރެވެއެވެ.
މި އޮޕަރޭޝަނުގައި ހައްޔަރުކުރި މީހުންގެ އައިޑެންޓިޓީ ނުވަތަ އެމީހުން ހައްޔަރުކުރި ސީދާ ވަގުތާއި ތަނެއް އީރާނުން ހާމައެއް ނުކުރެއެވެ. އިންސާނީ ހައްގުތަކަށް މަސައްކަތްކުރާ ޖަމިއްޔާތަކުން ބުނާ ގޮތުގައި، ގައުމީ ސަލާމަތާ ގުޅުންހުރި މިފަދަ މައްސަލަތަކުގައި ހައްޔަރުކުރެވޭ މީހުންނަށް ގާނޫނީ އެހީތެރިކަން ހޯދުމުގައި ބޮޑެތި ހުރަސްތަކެއް ކުރިމަތިވެއެވެ.
މި ހައްޔަރުކުރުންތައް އިއުލާނުކޮށްފައިވަނީ އީރާނުގެ އެތެރޭގެ މުޒާހަރާތަކާ ގުޅުންހުރި ބައެއް މީހުންވެސް ހައްޔަރުކޮށްފައިވާ ދަނޑިވަޅެއްގައެވެ. މިއީ ސަރަހައްދީ ގޮތުން މަސްލަހަތު ގޯސްވެ، އަސްކަރީ ކުރިމަތިލުންތައް އިތުރުވަމުންދާ ވަގުތެއްގައި، އީރާނުން އެ ގައުމުގެ ދާޚިލީ ސަލާމަތާއި ޖާސޫސީ ކަންކަން ވަރުގަދަ ކުރުމަށް ފަށާފައިވާ މަސައްކަތުގެ ބައެކެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!