ސައުދީ އަރަބިއްޔާ އިސްވެ އޮންނަ ކޯލިޝަން ފައުޖުތަކުން މިއަދު ޔަމަނުގެ ހޫޘީންގެ ކޮންޓްރޯލްގެ ދަށުގައިވާ ސަންޢާ އިންޓަނޭޝަނަލް އެއާޕޯޓަށް ވަރުގަދަ ވައިގެ ހަމަލާތަކެއް ދީފިއެވެ.

މިއާއެކު 2022 ވަނަ އަހަރުން ފެށިގެން ދެ ފަރާތުގެ ދެމެދުގައި އޮތް ހަނގުރާމަ ހުއްޓާލުމުގެ ނުވަތަ މަސްލަހަތު ހިފެހެއްޓުމުގެ މަރުހަލާ މިވަނީ ރަސްމީކޮށް ނިމުމަކަށް އައިސްފައެވެ.

Ad
rt

ސައޫދީ ކޯލިޝަނުން ދިން މި ހަމަލާތައް އަމާޒުކޮށްފައިވަނީ ސަންޢާ އެއާޕޯޓުގެ ސަރަހައްދުގައި ހުރި ހޫޘީންގެ އަސްކަރީ މަރުކަޒުތަކަށެވެ. ރިޕޯޓްތައް ބުނާގޮތުގައި މި ހަމަލާތަކުގެ މައިގަނޑު ބޭނުމަކީ ހޫޘީން ޑްރޯން ރައްކާކުރާ ތަންތަނާއި، ޑްރޯން ފޮނުވާލުމަށް ބޭނުންކުރާ ވަސީލަތްތައް ނައްތާލުމެވެ.

މީގެ އިތުރުން، ސައުދީން ހުއްދަ ނުދޭ އީރާނުގެ މަދަނީ މަތިންދާބޯޓެއް އެއާޕޯޓަށް ޖެއްސުން ހުއްޓުވުމަކީ ވެސް މި އޮޕަރޭޝަންގެ ބޭނުމެއް ކަމަށް ބެލެވެއެވެ.

ހޫޘީންގެ ރައްދުމި ހަމަލާތަކާ ގުޅިގެން ހޫޘީންގެ އަސްކަރީ ތަރުޖަމާނު ޔަހްޔާ ސަރީޢު ނެރުއްވި ބަޔާނެއްގައި ވިދާޅުވީ، ސައުދީގެ މި އަމަލަކީ ދެ ފަރާތުގެ ދެމެދުގައި އޮތް ހަނގުރާމަ ހުއްޓާލުމުގެ އެއްބަސްވުމަށް ދިން ނިމުމެއް ކަމަށެވެ. އަދި މި އުދުވާނަށް ހޫޘީންގެ ފަރާތުން ހަރުކަށި ރައްދެއް ދޭނެ ކަމުގެ އިންޒާރު ދެއްވައި، އެއާޕޯޓު ކައިރީގައި ދިރިއުޅޭ ރައްޔިތުން ރައްކާތެރި ސަރަހައްދުތަކަށް ބަދަލުވުމަށް ވަނީ އަމުރުކޮށްފައެވެ.

ވޭތުވެދިޔަ އަހަރުތަކުގައި އޮތް ހަނގުރާމަ ހުއްޓާލުމުގެ އެއްބަސްވުން އުވާލަން ޖެހުނީ ފަހަކަށް އައިސް ދެ ފަރާތުގެ ދެމެދުގައި އުފެދުނު ބޮޑެތި ޚިލާފުތަކާ ގުޅިގެންނެވެ. އޭގެ ތެރޭގައި ސައުދީން ޔަމަނަށް އަޅާފައިވާ ވައިގެ ބްލޮކޭޑާ ޚިލާފަށް އީރާނުގެ މަތިންދާބޯޓެއް ސަންޢާއަށް ޖެއްސުމަށް ކުރި މަސައްކަތާއި، ހޮޑައިދާ ބަނދަރުގެ ދެކުނުން ހޫޘީން ދިން ވަރުގަދަ އަސްކަރީ ހަމަލާތަކެއްގެ ސަބަބުން މަސްލަހަތު ގޯސްވުން ހިމެނެއެވެ.

ހޫޘީންގެ އުދުވާންތައް ހުއްޓާނުލައިފިނަމަ، "މީގެ ކުރިން ނުދޭ ފަދަ ވަރުގަދަ ބާރެއްގެ ބޭނުންކުރާނެ" ކަމަށް ސައުދީ ކޯލިޝަނުން ކުރިން އޮތީ އިންޒާރު ދީފައެވެ.

މި ހަމަލާތަކާއެކު ޔަމަނުގައި އޮތް ނިސްބަތުން އަމާން ދުވަސްތައް ނިމުމަކަށް އައިސް، އަނެއްކާވެސް މުޅި ސަރަހައްދު ނުރައްކާތެރި ހަނގުރާމައެއްގެ ތެރެއަށް ވެއްޓިދާނެ ކަމުގެ ބިރު މިވަނީ ބޮޑުވެފައެވެ.