އެމެރިކާގެ ރައީސް ޑޮނަލްޑް ޓްރަމްޕް، ވޯލްޑް ކަޕް ފުޓްބޯޅަ މުބާރާތުގައި އެމެރިކާގެ ފޯވާޑް ފޮލަރިން ބަލޯގަންއަށް ދެއްކި ރަތް ކާޑުގެ މައްސަލަ އަލުން މުރާޖައާ ކުރުމަށް ފީފާގެ ރައީސް ޖިއާނީ އިންފަންޓީނޯއަށް ގުޅުއްވައި ނުފޫޒު ފޯރުވިކަމުގެ ތުހުމަތާއެކު ބޮޑު ފާޑުކިޔުމެއް އަމާޒުވުމުން އޭނާގެ ޢަމަލުގެ ދިފާޢުގައި ވާހަކަދައްކަވައިފިއެވެ.

މިދިޔަ ހަފުތާގައި ބޮސްނިއާ-ހެރްޒެގޮވިނާ އަތުން އެމެރިކާ މޮޅުވި މެޗުގައި ބަލޯގަންއަށް ދެއްކި ރަތް ކާޑު އުވާލުމަށް ފީފާއިން ނިންމުމާ ގުޅިގެން، އޭނާއަށް މިރޭ ބެލްޖިއަމާ ދެކޮޅަށް ކުޅޭ މެޗުގައި ބައިވެރިވެވޭނެއެވެ.

Ad
rt

އޯވަލް އޮފީހުގައި ބޭއްވި އިވެންޓެއްގައި ވާހަކަދައްކަވަމުން ޓްރަމްޕް ވިދާޅުވީ، ރެފްރީގެ އެ ނިންމުމަކީ ވަރަށް "ގޯސް" ނިންމުމެއް ކަމަށެވެ.

"އަޅުގަނޑު އެދުނީ ހަމައެކަނި އެ ނިންމުން މުރާޖައާ ކޮށްދިނުމަށް. އަޅުގަނޑު ނުބުނަން މިވެނި ގޮތަކަށް ހަދާށޭ،" ޓްރަމްޕް ވިދާޅުވިއެވެ.

ބަލޯގަންއަކީ މި މުބާރާތުގައި މިހާތަނަށް އެމެރިކާއަށް ތިން ގޯލު ޖަހައިދީފައިވާ އެންމެ މުހިންމު ކުޅުންތެރިޔާއެވެ.

ފީފާއިން ބަލޯގަންގެ ސަސްޕެންޝަން އުވާލުމާ ގުޅިގެން ބައިނަލްއަގުވާމީ ފުޓްބޯޅަ ދުނިޔޭގައި ބޮޑެތި ފާޑުކިޔުންތަކެއް ވަނީ އަމާޒުވެފައެވެ. ބެލްޖިއަމްގެ ފުޓްބޯޅަ ފެޑެރޭޝަނުން ވަނީ މި ނިންމުން އިސްތިއުނާފުކޮށްފައެވެ. އަދި ޔޫރަޕްގެ ފުޓްބޯޅަ އިދާރާ (ޔޫއީއެފްއޭ) އިން ބުނި ގޮތުގައި ފީފާގެ މި ނިންމުމަކީ "ބަލައިގަނެވޭނެ އަދި އިންސާފުވެރި ނިންމުމެއް ނޫން" ކަމަށެވެ.

ފީފާގެ ރައީސް އިންފަންޓީނޯ ނެރުއްވި ބަޔާނެއްގައި ވިދާޅުވީ، ޓްރަމްޕާ ވާހަކަދެއްކެވި ނަމަވެސް، ފީފާގެ ޑިސިޕްލިނަރީ ކޮމިޓީއަކީ މިނިވަން މުއައްސަސާއެއް ކަމަށެވެ. އަދި ކޮންމެ މައްސަލައެއްވެސް ނިންމާނީ ފީފާގެ އުސޫލުތަކުގެ ތެރެއިން ކަމަށް އޭނާ ވިދާޅުވިއެވެ. އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވެސް ވަނީ މި ނިންމުމަށް ތާއީދުކުރައްވައި، އެންމެ މޮޅު ކުޅުންތެރިން ނުލައި މެޗު ކުޅުމަކީ އިންސާފެއް ނޫން ކަމަށް ވިދާޅުވެފައެވެ.

ބަލޯގަންއަށް ރަތް ކާޑު ދެއްކީ ބޮސްނިއާގެ ޑިފެންޑަރު ތާރިކް މުހަރެމޮވިޗްގެ ފައިގައި ކުޅިވަރުގެ ރޫހާ ހިލާފަށް ޖެހުމުންނެވެ. ބްރެޒިލްގެ ރެފްރީ ރަފައެލް ކްލައުސް ފުރަތަމަ ކާޑެއް ނުދެއްކި ނަމަވެސް، ވީއޭއާރު ބެލުމަށްފަހު ވަނީ ރަތް ކާޑު ދައްކާފައެވެ. ޓްރަމްޕް ވަނީ ވީއޭއާރު ބޭނުންކޮށްގެން ސްލޯ މޯޝަންގައި ބެލުމުން ކަންކަން އޮންނަ ވަރަށް ވުރެ ގޯސްކޮށް ފެންނަ ކަމަށް ވިދާޅުވެ އެކަމަށް ފާޑުވިދާޅުވެފައެވެ.

މި މައްސަލައިގައި އެމެރިކާގެ ކޯޗު މައުރީސިއޯ ޕޮޗެޓީނޯ ބުނީ، މެޗުގެ ބާކީ ބައިގައި ބަލޯގަން ނެތި ކުޅެން ޖެހުމުން އެމެރިކާއަށް ލިބެންޖެހޭ އަދަބު ލިބިފައިވާ ކަމަށެވެ. ނަމަވެސް ބެލްޖިއަމްގެ ކޯޗު ރޫޑީ ގާސިއާ ވަނީ މިއީ "އޭޕްރީލް ފޫލް" ގެ ޖޯކެއް ފަދަ ކަމެއްގެ ގޮތުގައި ސިފަކޮށްފައެވެ.