ވޯލްޑް ކަޕްގެ ގްރޫޕް ކޭގައި އަންގާރަ ދުވަހުގެ ރޭ ކުޅުނު ފޯރިގަދަ މެޗުގައި ޑެނިއަލް މުނޯޒް ކާމިޔާބުކޮށްދިން ލަނޑާއެކު 1-0 އިން ކޮންގޯ ބަލިކޮށް، ކޮލަމްބިއާ މުބާރާތުގެ ނޮކައުޓް ބުރަށް ދަތުރުކޮށްފިއެވެ.

މި މެޗުގެ ހަމައެކަނި ލަނޑު މުނޯޒް ކާމިޔާބުކުރީ މެޗުގެ 76 ވަނަ މިނެޓުގައެވެ. ކޮންގޯގެ ޑިފެންޑަރެއްގެ ގައިގައި ޖެހިފައި ލިބުނު ބޯޅަ މުނޯޒް ވަނީ އޭރިއާ ތެރެއިން ވާތު ފައިން ގޯލުގެ ތެރެއަށް ފޮނުވާލާފައެވެ. މިއީ މި މުބާރާތުގައި އޭނާ ކާމިޔާބުކުރި ދެވަނަ ލަނޑެވެ. މެޗުގެ ކުރީކޮޅު ކޮންގޯގެ ކީޕަރު ލިއޮނަލް އެމްޕާސީ ވަނީ ކޮލަމްބިއާގެ ނުރައްކާތެރި ފަސް ހަމަލާއެއް ދިފާއުކޮށްފައެވެ.

Ad
rt

މެޗުގެ ފަހުކޮޅު ކޮލަމްބިއާގެ ތަރި ލުއިސް ޑިއާޒް ޖެހި ދެ ލަނޑެއް ރެފްރީ ގަބޫލެއް ނުކުރެއެވެ. 79 ވަނަ މިނެޓުގައި ޖެހި ލަނޑު ފައުލަކާ ގުޅިގެން ކެންސަލް ކުރިއިރު، 80 ވަނަ މިނެޓުގައި ޖެހި ލަނޑު ނިންމީ އޮފްސައިޑް ކަމަށެވެ. މެޗުގެ އިތުރު ވަގުތުގައި ނަތަނިއަލް އެމްބޫކޫ އާއި ޗަންސެލް އެމްބެމްބާ ފޮނުވާލި ނުރައްކާތެރި ހަމަލާތައް ކޮލަމްބިއާގެ ކީޕަރު ކާމިލޯ ވަރްގަސް ވަނީ ހުށިޔާރުކަމާއެކު ދިފާއުކޮށްފައެވެ.

މި މޮޅާއެކު ގްރޫޕް ކޭގެ އެއްވަނައިގައި ކޮލަމްބިއާ އޮތީ ދެ މެޗުން ހަ ޕޮއިންޓް ހޯދައިގެންނެވެ. ހަތަރު ޕޮއިންޓާއެކު ދެވަނައިގައި އޮތީ ޕޯޗުގަލްއެވެ. ޕޯޗުގަލް ވަނީ އަންގާރަ ދުވަހު ކުޅުނު އަނެއް މެޗުގައި ކްރިސްޓިއާނޯ ރޮނާލްޑޯގެ ދެ ލަނޑާއެކު 5-0 އިން އުޒްބެކިސްތާން ބަލިކޮށްފައެވެ. ގްރޫޕްގެ އެއްވަނަ ކަށަވަރުކުރުމަށް އަންނަ ހޮނިހިރު ދުވަހު ޕޯޗުގަލްއާ ދެކޮޅަށް ކުޅޭ މެޗުން ކޮލަމްބިއާއަށް ބޭނުންވަނީ އެއްވަރުވުމެކެވެ.

ދުނިޔޭގެ ރޭންކިންގެ 11 ވަނައިގައި އޮތް ކޮލަމްބިއާ ވަނީ ފުރަތަމަ މެޗުގައި އުޒްބެކިސްތާން އަތުން 3-1 އިން މޮޅުވެފައެވެ. އަނެއްކޮޅުން، 52 އަހަރަށްފަހު ފުރަތަމަ ފަހަރަށް ވޯލްޑް ކަޕްގައި ކުޅޭ ކޮންގޯއަށް މި މުބާރާތަށް ތައްޔާރުވުމުގައި އެ ގައުމުގައި ފެތުރުނު އެބޯލާ ބަލިމަޑުކަމުގެ ސަބަބުން ގިނަ ގޮންޖެހުންތަކެއް ކުރިމަތިވިއެވެ. މި ބަލިމަޑުކަމާ ގުޅިގެން އެޅި ފިޔަވަޅުތަކުގެ ސަބަބުން ކޮންގޯގެ ގިނަ ސަޕޯޓަރުންނަށް މެޗު ބަލަން ދިއުމަށް ވަނީ ހުރަސްތަކެއް ކުރިމަތިވެފައެވެ.

މި މެޗަކީ ކޮލަމްބިއާގެ ޕްލޭމޭކަރު ޖޭމްސް ރޮޑްރިގޭޒް ވޯލްޑް ކަޕްގައި ކުޅުނު 10 ވަނަ މެޗެވެ. މިއާއެކު އޭނާ ވަނީ ކޮލަމްބިއާގެ ފުޓްބޯޅަ ލެޖެންޑުން ކަމަށްވާ ފްރެޑީ ރިންކޮން އަދި ކާލޯސް ވަލްޑެރާމާގެ ރެކޯޑާ އަރާ ހަމަކޮށްފައެވެ.